close
సినిమా రివ్యూ
Facebook Share Twitter Share WhatsApp Share Telegram Share
రివ్యూ: గులాబో సితాబో

చిత్రం: గులాబో సితాబో

నటీనటులు: అమితాబ్‌ బచ్చన్‌, ఆయుష్మాన్‌ ఖురానా, విజయ్‌ రాజ్‌, బ్రిజేంద్ర కాలా, ఫరూఖ్‌జఫర్‌, సృష్టి శ్రీవాస్తవ తదితరులు

సంగీతం: శంతన్‌, అభిషేక్‌ అరోరా, అంజూ గార్గ్‌

సినిమాటోగ్రఫీ:  అవిక్‌ ముఖోపాధ్యాయ

ఎడిటింగ్‌: చంద్రశేఖర్‌ ప్రజాపతి

రచన: జుహి చతుర్వేది

నిర్మాత: రోని లహ్రి, షీల్‌ కుమార్‌

దర్శకత్వం: సూజిత్‌ సర్కార్‌

విడుదల: అమెజాన్‌ ప్రైమ్‌

80ఏళ్ల వయసుకు దగ్గర పడుతున్నా నటుడిగా ఏ యువ కథానాయకుడు ఎంచుకోని పాత్రల్లో నటిస్తూ అదరగొడుతున్నారు బిగ్‌బి అమితాబ్‌. ఇక యువ కథానాయకుల్లో విభిన్న పాత్రలతో, కథలతో తనకంటూ ప్రత్యేక గుర్తింపు తెచ్చుకున్న నటుడు ఆయుష్మాన్‌ ఖురానా. రెగ్యులర్‌ కమర్షియల్‌ కథలకు దూరంగా ఆయన చిత్రాలు ఉంటాయి. ఈ ఇద్దరూ కలిసి నటిస్తున్నారంటే చిత్ర పరిశ్రమలో ఎంతో ఆసక్తి ఉంటుంది. అలా సూజిత్‌ సర్కార్‌ దర్శకత్వంలో వీరు నటించిన చిత్రం ‘గులాబో సితాబో’. ఎప్పుడో చిత్రీకరణ పూర్తి చేసుకున్న ఈ సినిమా విడుదల వాయిదా పడుతూ వస్తోంది. ఎట్టకేలకు ఏప్రిల్‌లో విడుదల చేద్దామనుకునే సరికి లాక్‌డౌన్‌ అడ్డుపడింది. దీంతో అమెజాన్‌ ప్రైమ్‌ వేదికగా విడుదల చేయాలని దర్శక-నిర్మాతలు నిర్ణయించారు. అలా ప్రేక్షకుల ముందుకు వచ్చిన ఈ చిత్రం ఎలా ఉంది? అసలు ఈ చిత్ర కథేంటి? అమితాబ్‌, ఆయుష్మాన్‌ ఎలా నటించారు?

కథేంటంటే: లఖ్‌నవూలోని అతి పురాతన భవనం ఫాతిమా మహల్‌లో పలు కుటుంబాలు అద్దెకు నివసిస్తుంటాయి. దాని యజమాని బేగమ్‌(ఫరూక్‌ జఫర్‌) వృద్ధురాలు. భర్త మీర్జా షేక్‌ (అమితాబ్‌ బచ్చన్‌) అక్కడ ఉండే వారి దగ్గర నుంచి అద్దెలు వసూలు చేస్తుంటాడు. బాన్‌కీ(ఆయుష్మాన్‌ ఖురానా) తన తల్లి, ముగ్గురు చెల్లెళ్లతో కలిసి అదే ఫాతిమామహల్‌లో ఏళ్లుగా అద్దెకు ఉంటాడు. అయితే, ఎప్పుడూ సరిగ్గా అద్దె చెల్లించడు. అడిగితే మీర్జాను దబాయించి బతుకుతుంటాడు. ఒకరోజు బాన్‌కీ కోపంతో చేసిన పని కారణంగా ఫాతిమా మహల్‌, దాని ఓనర్‌షిప్‌పై వివాదం మొదలవుతుంది. అసలు ఫాతిమా మహల్‌ ఎవరిది? మీర్జా, బాన్‌కీల మధ్య మొదలైన వివాదం ఎటువైపునకు దారి తీసింది. మధ్యలో పురావస్తుశాఖలో పనిచేసే గణేశ్‌ శుక్లా(విజయ్‌రాజ్‌), లాయర్ క్రిస్టోఫర్‌ క్లార్క్‌(బ్రిజేంద్ర కాలా) రావడంతో కథ ఎలా మలుపు తీసుకుంది? తెలియాలంటే సినిమా చూడాల్సిందే!

ఎలా ఉందంటే: సూజిత్‌ సర్కార్‌ చిత్రమంటే విభిన్న కథ, కథనాలు ఆశిస్తారు ప్రేక్షకులు. ‘విక్కీ డోనర్‌’, ‘పీకూ’, ‘అక్టోబరు’ చిత్రాలే అందుకు ఉదాహరణ. ఇక వయసు పెరుగుతున్న తన నటనా చాతుర్యంతో వైవిధ్యమైన పాత్రలు చేస్తున్నారు అమితాబ్‌. బాలీవుడ్‌లో ఆయుష్మాన్‌ ఖురానా చిత్రాల ఎంపిక భిన్నం. మరి ఈ ముగ్గురూ కలిశారంటే అంచనాలు భారీగా ఉంటాయి. కానీ, చాలా చిన్న పాయింట్‌ను ఎంచుకుని ‘గులాబో సితాబో’ తెరకెక్కించారు. ఈ కథ గురించి ఒక్క మాటలో చెప్పాలంటే ‘దురాశ దుఖాఃనికి చేటు’. ఫాతిమా మహల్‌ అద్దె కోసం మీర్జా, బాన్‌కీల మధ్య జరిగే చిన్న గొడవలతో సినిమాను మొదలు పెట్టాడు దర్శకుడు. ప్రథమార్ధం అంతా వీరిద్దరి మధ్య జరిగే టామ్‌ అండ్‌ జెర్రీ ఆటలతోనే సరిపోతుంది. ఆ సన్నివేశాలన్నీ సరదాగా అనిపిస్తాయి. ఎప్పుడైతే పురావస్తుశాఖ అధికారి గణేశ్‌ శుక్లా ఎంటర్‌ అవుతాడో అక్కడి నుంచి కథ మలుపు తీసుకుంటుంది. అది ప్రభుత్వపరం కాకుండా ఉండాలంటే ఆ మహల్‌ను దక్కించుకోవడమే సరైన నిర్ణయమని మీర్జా భావిస్తాడు. తను లాయర్‌ను కలవడం, బేగమ్‌ నుంచి పవర్‌ ఆఫ్‌ అటార్నీ తీసుకునేందుకు చేసే ప్రయత్నాలు నవ్వులు పూయిస్తాయి.

అయితే, ప్రథమార్ధంలో ఉన్నంత జోష్‌ ద్వితీయార్ధానికి వచ్చేసరికి ఉండదు. కథనం నెమ్మదిగా సాగుతుంది. మీర్జా లాయర్‌ను కలవడం, బాన్‌కీ పురావస్తుశాఖ అధికారిని కలవడం ఇవే సన్నివేశాలు తరచూ కనిపిస్తాయి. దీంతో చూసిన సన్నివేశాలే చూశామా? అన్నభావన ప్రేక్షకుడికి కలుగుతుంది. ఒక్కటి కూడా భావోద్వేగ సన్నివేశం ఉండదు. కథ ఫ్లాట్‌గా సాగుతుంది. పైగా కథ అంతా ఫాతిమా మహల్‌ చుట్టూ తిరగడం వల్ల తెరపై అది తప్ప మరొక నేపథ్యం కనిపించదు. చివరకు ఫాతిమా మహల్‌ను ప్రభుత్వ ఆస్తిగా ప్రకటించే సమయానికి బేగమ్‌ తీసుకున్న నిర్ణయాన్ని ఎవరూ ఊహించరు. అందరూ ఆశ్చర్యపోతారు. అదే కథలో కీలక, చివరి మలుపు.

ఎవరెలా చేశారంటే: చాలా తక్కువ పాత్రలతో, తక్కువ నిడివితో ఈ చిత్రాన్ని తెరకెక్కించారు. మీర్జా షేక్‌గా అమితాబ్‌ నటన మెచ్చుకోవాల్సిందే. ప్రొస్థటిక్‌ మేకప్‌, భూతద్దాల్లాంటి కళ్లజోడు, తలపై తువాలుతో ఆయన ఆహార్యం విభిన్నంగా అనిపిస్తుంది. ‘హ్యారీపోటర్‌’ సినిమాలో డంబెల్‌డోర్‌ను గుర్తు చేస్తుంది. ఇక వృద్ధుడి(ఆయన అసలు వయసు కూడా దాదాపు అదే)గా ఆయన నడక, నటన, మాట్లాడే విధానానికి హ్యాట్సాఫ్‌ చెప్పాల్సిందే. అయితే గుబురు గడ్డం కారణంగా హావభావాలు పెద్దగా కనిపించవు. ఇక ఫాతిమా మహల్‌లో అద్దెకు ఉండే వ్యక్తి బాన్‌కీగా ఆయుష్మాన్‌ మెప్పించాడు. తల్లి, ముగ్గురు చెల్లెళ్ల బాధ్యతను చూసే అన్నగా ఆ పాత్రలో ఒదిగిపోయాడు. అతని చెల్లెలు గుడ్డుగా సృష్టి శ్రీవాస్తవ నటన మెప్పిస్తుంది. మిగిలిన వాళ్లు తమ పాత్ర పరిధిమేరకు నటించారు.

ఈ సినిమాకు ప్రధాన బలం నేపథ్య సంగీతం. సహజత్వం నిండిన సన్నివేశాలకు అదే స్థాయిలో శంతన్‌ సంగీతం అందించారు. చాలా సన్నివేశాల్లో మంద్ర స్థాయిలో శాక్సాఫోన్‌ వినిపిస్తుంది. పాటలన్నీ కథాగమనంలో వచ్చేవే. సినిమాటోగ్రఫీ ఈ సినిమాకు ప్రాణం. ఫాతిమా మహల్‌, లఖ్‌నవూ పరిసరాలు, వింటేజ్‌ లుక్‌తో అవిక్‌ ముఖోపాధ్యాయ చక్కగా చూపించారు. రిక్షాలు, ఆటోలు ఇలా ప్రతి చిన్న విషయంపై శ్రద్ధ పెట్టారు. ఆసక్తికర కథ, కథనాలు, వాస్తవికతకు దగ్గరగా ఉండే చిత్రాలను తెరకెక్కించడంతో సూజిత్‌ సర్కార్‌ సిద్ధహస్తులు. పాత్రలు, భావోద్వేగ సన్నివేశాలతో ఆయన చిత్రాలు అలరిస్తాయి. రచయిత జుహు చతుర్వేదితో కలిసి ఆయన తీర్చిదిద్దిన ‘గులాబో సితాబో’లో అదే కాస్త మిస్సయింది. కథ చాలా చిన్న పాయింట్‌ కావడం, ఒక అంశం చుట్టూ తిరగడం ప్రేక్షకుడికి విసుగ్గా అనిపిస్తుంది. అయితే, సున్నిత హాస్యం, చిన్న చిన్న సంభాషణలతో మెప్పించారు. ఇలాంటి కథలు బాలీవుడ్‌లో‌ బాగా రాణిస్తాయి. మాస్‌, మసాలా అంశాలను కోరుకునే దక్షిణాది ప్రేక్షకులకు రుచించకపోవచ్చు. మనుషుల్లో ఉండే స్వార్థం, దురాశలను ‘గులాబో సితాబో’లో చూపించే ప్రయత్నం చేశారు దర్శక-రచయితలు. 78ఏళ్ల వృద్ధుడైనా, 25ఏళ్ల యువకుడైనా అందుకు అతీతం కాదని ఈ చిత్రంలో చెప్పే ప్రయత్నం చేశారు. స్వార్థంతో కూడిన పాత్రల మధ్య భావోద్వేగ సన్నివేశాలు ఉంటే బాగుండదేమోనని వారు భావించి ఉండవచ్చు.

బలాలు బలహీనతలు
+ అమితాబ్‌ - బలమైన కథ లేకపోవడం
+ ఆయుష్మాన్‌ ఖురానా - నెమ్మదిగా సాగే కథనం
+ సాంకేతిక బృందం పనితీరు  

చివరిగా: అంచనాలు పెట్టుకోకుండా అమితాబ్‌, ఆయుష్మాన్‌ ‘గులాబో సితాబో’ చూడండి. మిమ్మల్ని ఎంటర్‌టైన్‌ చేస్తుందంతే!
గమనిక: ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే!

 



Tags :

తాజా వార్తలు

టాలీవుడ్‌

మరిన్ని

ఫోటోలు

హీరో మరిన్ని

హీరోయిన్ మరిన్ని

సినిమా స్టిల్స్ మరిన్ని

ఈవెంట్స్ మరిన్ని

జిల్లా వార్తలు

దేవ‌తార్చ‌న

మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.