ఇంటర్నెట్‌ డెస్క్‌:  టాలీవుడ్‌లో రాబోతున్న ఆసక్తికర సీక్వెల్‌ చిత్రాల్లో ‘కార్తికేయ’ ఒకటి. నిఖిల్‌ కథానాయకుడుగా చందూ మొండేటి తెరకెక్కిస్తున్నారు. ఓ కీలక పాత్ర కోసం బాలీవుడ్‌ దిగ్గజ నటుడు అనుపమ్‌ ఖేర్‌ని ఎంపిక చేసినట్టు చిత్రబృందం ప్రకటించింది. ఆదివారం అనుపమ్‌ పుట్టినరోజు సందర్భంగా ఈ విషయాన్ని తెలియజేస్తూ ఆయనకు శుభాకాంక్షలు తెలిపారు దర్శక-నిర్మాతలు. ధన్వంత్రి అనే పాత్ర పోషిస్తున్నారాయన. ఆ పాత్ర మంచి, చెడు.. రెండు గుణాలను కలిగి ఉంటుందని సమాచారం. 1987లో వెంకటేశ్‌ కథానాయకుడిగా తెరకెక్కిన ‘త్రిమూర్తులు’ చిత్రంతో తొలిసారి తెలుగు తెరకు పరిచయం అయ్యారు అనుపమ్‌. మళ్లీ ఇన్నేళ్లకు కార్తికేయ2 చిత్రంతో ఎంట్రీ ఇస్తున్నారు.

 పీపుల్స్‌ మీడియా ఫ్యాక్టరీ, అభిషేక్‌ అగర్వాల్‌ ఆర్ట్స్‌ సంయుక్తంగా తెరకెక్కించనున్న ఈ సినిమాకి టీజీ విశ్వప్రసాద్‌, అభిషేక్‌ అగర్వాల్‌ నిర్మాతలుగా వ్యవహరిస్తున్నారు. కాలభైరవ సంగీతం అందిస్తున్నారు. ఆద్యంతం ఉత్కంఠ భరితంగా సాగే ‘కార్తికేయ’ ఘన విజయం అందుకోవడంతో ‘కార్తికేయ 2’పై ఆసక్తి పెరుగుతోంది. ఇలాంటి కథకు అనుపమ్‌ తోడవ్వడంతో అంచనాలు భారీగా పెరుగుతున్నాయి.