పండగకి వచ్చే సినిమాలు కొన్ని... పండగలాంటి సినిమాలు కొన్ని అంటున్నాడు నాని. తన ‘టక్‌ జగదీష్‌’ చిత్రం రెండో రకం అని ఆయన చెప్పకనే చెబుతున్నారు. నాని కథానాయకుడిగా శివ నిర్వాణ దర్శకత్వంలో తెరకెక్కిన చిత్రమిది. రీతూవర్మ, ఐశ్వర్య రాజేష్‌ కథానాయికలు. షైన్‌ స్క్రీన్స్‌ పతాకంపై సాహు గారపాటి, హరీష్‌ పెద్ది నిర్మిస్తున్నారు. ఏప్రిల్‌ 23న చిత్రం విడుదల కానుంది. బుధవారం నాని పుట్టినరోజు. ఈ    సందర్భంగా మంగళవారం ‘టక్‌ జగదీష్‌’ టీజర్‌ని విడుదల చేశారు. ‘ఏటికొక్క పూటా... యానాది పాటా’ అంటూ సాగే పాటతో కూడిన టీజర్‌లో కుటుంబ అనుబంధాలతోపాటు, యాక్షన్‌ అంశాలు కనిపించాయి. ‘అంగిసుట్టు మడతేసి... మంచి సెడు వడబోసి, సుట్టుముట్టుకుంటాడే సుట్టమల్లె కాపేసి’ అంటూ సాగే ఈ పాటతోనే, సినిమాలో నాని పాత్ర ఎలాంటిదో చెప్పే ప్రయత్నం చేశారు. నాజర్‌, జగపతిబాబు, రావు రమేష్‌, నరేష్‌, డానియల్‌ బాలాజీ, తిరువీఱ్‌, రోహిణి, దేవదర్శిని, ప్రవీణ్‌ తదితరులు నటించిన ఈ చిత్రానికి ఛాయాగ్రహణం: ప్రసాద్‌ మూరెళ్ల, కూర్పు: ప్రవీణ్‌ పూడి, పోరాటాలు: వెంకట్‌, కళ: సాహి సురేష్‌, సంగీతం: తమన్‌.