హైదరాబాద్: హా‌స్యనటులు శ్రీనివాస్ రెడ్డి, సప్తగిరి, అల్లరి రవి బాబు, అదుర్స్ రఘు, తాగుబోతు రమేష్ కలిసి నటిస్తున్న చిత్రం ‘హౌస్ అరెస్ట్’. శేఖర్‌రెడ్డి యర్రా దర్శకత్వంలో తెరకెక్కుతున్న ఈ సినిమా టీజర్‌ ఈరోజు విడుదలైంది. ‘‘సార్‌ మా మొగుళ్లు తప్పిపోయారు’’ అంటూ టీజర్‌ ప్రారంభమవుతోంది. తప్పిపోయిన వీళ్లంతా కలిసి ఓ ఇంట్లో దొంగతనం చేయడానికి ప్రవేశిస్తారు.

అక్కడ వీరికంటే ఘనులైన పిల్లలు ఉంటారు. దొంగతనం చేయడానికి వచ్చిన వీళ్లకు ఆ పిల్లలు బిర్యాని పెట్టి హౌస్‌ అరెస్ట్ చేస్తారు. ఆ తరువాత వారి మధ్య ఏం జరిగిందనేది తెలియాలంటే సినిమా చూస్తే తెలుస్తుంది. ప్రైమ్‌షో ఎంటర్‌టైన్‌మెంట్ పతాకంపై నిర్మితమవుతోన్న చిత్రానికి అనూప్‌ రూబెన్స్ సంగీతం అందిస్తున్నారు. కె.నిరంజన్‌ రెడ్డి నిర్మాత.