ఇంటర్నెట్‌డెస్క్‌: పెళ్లి తర్వాత రణ్‌వీర్‌సింగ్, దీపికా పదుకొణె జంటను తెరపై చూడాలని అభిమానులు ఎంతో ఆశగా ఎదురుచూస్తున్నారు. అందుకు తగ్గట్టుగానే రణ్‌వీర్‌ నటించిన ‘83’ చిత్రంలో అతిథి పాత్రలో నటించింది దీపిక. ఇంకా ఆ చిత్రం విడుదల కాలేదు. ఇంతలోనే మరో చిత్రంలో రణ్‌ వీర్‌తో కలిసి ఆడిపాడబోతుందట దీపిక.

రణ్‌వీర్‌ ద్విపాత్రాభినయం చేస్తున్న చిత్రం ‘సర్కస్‌’. రోహిత్‌ శెట్టి తెరకెక్కిస్తోన్న ఈ చిత్రంలో పూజా హెగ్డే, జాక్వెలైన్‌ ఫెర్నాండెజ్‌ నాయికలు. ఇందులోని ఓ ప్రత్యేక గీతంలో రణ్‌వీర్‌తో కలిసి దీపిక    ఆడిపాడనుందని సమాచారం. దీపిక ప్రస్తుతం షారుఖ్‌ఖాన్‌ ‘పఠాన్‌’ చిత్రంలోని ఓ పాట కోసం సిద్ధమవుతోంది. త్వరలోనే దీనికి సంబంధించిన చిత్రీకరణలో పాల్గొననుంది. ఇంతకుముందే శకున్‌ బత్రా దర్శకత్వంలో తెరకెక్కుతోన్న చిత్రంలోని తన పాత్రకు సంబంధించిన సన్నివేశాల చిత్రీకరణను పూర్తి చేసింది దీపిక.