ఇంటర్నెట్‌డెస్క్‌: తెలుగు సినీ చరిత్రలో ట్రెండ్‌ సృష్టించిన సినిమాల్లో  ‘చిత్రం’ ఒకటి. తేజని దర్శకుడిగా పరిచయం చేస్తూ, ప్రముఖ నిర్మాణ సంస్థ ఉషాకిరణ్‌ మూవీస్‌ నిర్మించిన ఈ సినిమా బాక్సాఫీస్‌ వద్ద భారీ విజయాన్ని అందుకుంది. అంతేకాదు, దివంగత నటుడు ఉదయకిరణ్‌, రీమాసేన్‌లకు మంచి పేరు తెచ్చిపెట్టింది. యూత్‌ ఫుల్‌ ఎంటర్‌టైనర్‌గా కాసుల వర్షాన్ని కురిపించింది. ఇప్పుడు ఈ చిత్రానికి సీక్వెల్‌ చేసే పనిలో ఉన్నారు దర్శకుడు తేజ.

సోమవారం తేజ పుట్టిన రోజు సందర్భంగా ఈ విషయాన్ని వెల్లడించారు. ‘చిత్రం 1.1’ పేరుతో సీక్వెల్‌ను ఈ ఏడాది తెరకెక్కించనున్నట్లు తెలిపారు. ‘చిత్రం’ సినిమా కోసం పనిచేసిన 45మంది కొత్త టెక్నికల్‌ టీమ్‌ ఈ సినిమాకు పనిచేయనుంది. ఆర్పీ పట్నాయక్‌ స్వరాలు సమకూరుస్తున్నారు. త్వరలోనే నటీనటులు ఇతర వివరాలను వెల్లడించనున్నారు.