హైదరాబాద్‌: ప్రేక్షకుడిని మునివేళ్లపై నిలబెట్టి, ఆద్యంతం ఉత్కంఠతో ఊపేసే జోనర్‌ క్రైమ్‌ థ్రిల్లర్‌. చిన్న ఎలిమెంట్‌ ఆఫ్ ఇంట్రెస్ట్‌, బిగి సడలని కథనం ఉంటే, సినిమా హిట్‌ కొట్టినట్టే. అలా మలయాళంలో ఘన విజయం సాధించిన చిత్రం ‘అంజామ్‌ పథిరా’. కుంచకో బోబన్‌, మాథ్యూ థామస్‌, శ్రీనాథ్‌ బసి, ఉన్నిమయ ప్రసాద్‌, జీనూ జోసెఫ్‌ కీలక పాత్రలు పోషించిన ఈ సినిమా గతేడాది విడుదలై అక్కడ బాక్సాఫీస్‌ వద్ద భారీ విజయాన్ని అందుకుంది. ఇప్పుడు ఈ సినిమా తెలుగు ప్రేక్షకులను అలరించేందుకు సిద్ధమైంది.

ప్రముఖ ఓటీటీ ‘ఆహా’ వేదికగా ‘మిడ్‌నైట్‌ మర్డర్స్‌’ పేరుతో రాబోతోంది. ఈ నేపథ్యంలో చిత్ర టీజర్‌ను విడుదల చేశారు. డాక్టర్‌ అన్వర్‌ హుస్సేన్‌ ఎందుకు నిద్రలేని రాత్రులు గడపాల్సి వచ్చింది? పోలీసులకు ఎదురైన ఓ సమస్యను ఆయన ఎలా పరిష్కరించాడన్నది కథ. ఫిబ్రవరి 19న ఈ సినిమా ‘ఆహా’ వేదికగా స్ట్రీమింగ్‌ కానుంది.