close
Published : 25/03/2021 19:16 IST
Facebook Share Twitter Share WhatsApp Share Telegram Share

ఎన్టీఆర్‌తో పనిచేయడమే నా కల!

సంగీత దర్శకుడు కాల భైరవ

నాన్న ప్రముఖ సంగీత దర్శకుడు (కీరవాణి), చిన్నాన్న దేశం గర్వించదగ్గ దర్శకుడు (రాజమౌళి) అయినా సొంత ప్రతిభతోనే చిత్ర పరిశ్రమలో అడుగుపెట్టి అలరిస్తున్నారు సోదరులు కాల భైరవ, శ్రీ సింహా. ‘మత్తు వదలరా’తో ఒకరు నటుడిగా మరొకరు సంగీత దర్శకుడిగా పరిచయం అయ్యారు. ఇప్పుడు ‘తెల్లవారితే గురువారం’ అంటూ సందడి చేసేందుకు రాబోతున్నారు. మణికాంత్‌ తెరెక్కించిన ఈ చిత్రం మార్చి 27న విడుదలవుతున్న సందర్భంగా విలేకర్లతో ఆసక్తికర విషయాలు పంచుకున్నారు కాల భైరవ.

వెంటవెంటనే తమ్ముడితో కలిసి పనిచేయడం ఎలా ఉంది?

చాలా ఆనందంగా ఉంది. నాదీ తమ్ముడిది (శ్రీ సింహా) తొలి చిత్రం ఒకటే అవుతుందని ఎప్పుడూ అనుకోలేదు. నా జీవితంలో అది మరిచిపోలేని అనుభూతి. సింహా నటించిన రెండో చిత్రానికీ (తెల్లవారితే గురువారం) నేను సంగీతం ఇస్తానని ఊహించలేదు. ఇవి రెండు మాత్రమే కాదు  సింహా హీరోగా తెరకెక్కుతోన్న మరో సినిమాకీ నేనే మ్యూజిక్‌ డైరెక్టర్‌ని. ఇదంతా కావాలని చేసింది కాదు. దర్శకనిర్మాతల అభిరుచి మేరకు సంగీత దర్శకుడిగా నన్ను ఎంపిక చేసుకుంటున్నారంతే.

మీ ఇద్దరి మధ్య చర్చలు జరుగుతుంటాయా?

చిన్నప్పటి నుంచి మా ఇద్దరి అభిరుచులు ఒకేలా ఉండేవి. ఏదైనా సినిమా చూసినపుడు ఫలానా సన్నివేశం ఇలా తీసుంటే బాగుండేది, ఆ ఫైట్‌ అలా తెరకెక్కించాల్సింది అని చర్చించుకునేవాళ్లం. మేము పరిశ్రమకు వచ్చాక కూడా అదే కొనసాగిస్తున్నాం. నా సంగీతం గురించి తను, తన నటన గురించి నేను ఫీడ్‌ బ్యాక్‌ ఇచ్చిపుచ్చుకుంటాం. 

చిత్ర ముందస్తు వేడుకలో జూనియర్‌ ఎన్టీఆర్‌ భావోద్వేగానికి గురయ్యారు కదా!

అవును. ఆయన మాట్లాడిన ప్రతిదానికి అర్థం ఉంది. తారక్ అన్నతో అనుబంధం ఇప్పుడు మొదలైంది కాదు. ‘స్టూడెంట్‌ నెం:1’ చిత్రం నుంచి ఆయన్ను చూస్తున్నాం. మా కుటుంబంతో ఆయనతో ప్రత్యేకమైన అనుబంధం ఉంది. ఆయన వేడుకకు వచ్చినందుకు చాలా సంతోషించాం. తారక్‌ సినిమాకు సంగీతం అందించాలనేది నా కల. అది అనుకున్నంత తేలిక కాదు. అందుకే ఒక్కో సినిమాతో నన్ను నేను నిరూపించుకుంటూ ఎప్పటికైనా కల నెరవేర్చుకుంటాను.

‘మత్తు వదలరా’లో పాటలకు ప్రాధాన్యం లేదు మరి ఇందులో?

‘మత్తు వదలరా’ థ్రిల్లర్‌ నేపథ్యంలో సాగుతుంది. అందులో నేపథ్య సంగీతానికే ప్రాధాన్యం ఉంది కానీ పాటలకు అవకాశం లేదు. ‘తెల్లవారితే’ మంచి ఎంటర్‌టైనర్‌. ఇందులో మూడు పాటలు అందించాను. 

‘మత్తు వదలరా’, ‘కలర్‌ ఫొటో’ విజయం బాధ్యత పెంచిందా?

ఫలితం ఏదైనా బాధ్యతనేది ఉంటుంది. అయితే  క్రెడిట్‌ అంతా నేనే తీసుకోను. ఒకదానికొకటి సంబంధం లేని స్ర్కిప్టులు నా దగ్గరకు రావడం గొప్ప అవకాశంగా భావిస్తాను.

మీ విజయం చూసి నాన్నగారు (కీరవాణి) ఎలా ఫీలవుతున్నారు?

ఆయన చాలా ఆనందపడుతున్నారు. అలా అని మమ్మల్ని ఎక్కువగా పొగడరు. సంగీతానికి సంబంధించి అవసరం మేరకు సూచనలు ఇస్తుంటారు. నా పనిలో ఆయన జోక్యం చేసుకోరు. నా అంతట నేను అడిగితే కొన్ని విషయాలు చెప్తారు.

కీరవాణి ప్రభావం మీపై ఉంటుందా?

తప్పకుండా ఉంటుంది. చిన్నప్పటి నుంచి ఆయన సంగీతం వింటూ పెరిగిన వాణ్ని కదా.

రాజమౌళి గారి సలహా తీసుకుంటారా?

కొన్నికొన్ని సార్లు ఏదైనా సన్నివేశం ఇబ్బంది అనిపించినపుడు ఆయన సలహాలు తీసుకుంటాం.

నటనపరంగా సింహాలో మార్పు గమనించారా?

చాలా చూశాను. తొలి సినిమా కథని బట్టి తన పాత్ర మొత్తం ఒకే మూడ్‌లో సాగుతుంటుంది. ‘తెల్లవారితే’లో అన్ని రకాలుగా భావోద్వేగాలు పలికించాడు. తనకి నటనంటే చాలా ఇష్టం. బాల నటుడిగా పలు చిత్రాల్లో కనిపించాడు. నటనలో శిక్షణ తీసుకున్నాడు. సినిమా గురించి ఇంకా తెలుసుకునేందుకు ‘రంగస్థలం’ చిత్రానికి దర్శకత్వ విభాగంలో పనిచేశాడు.

దర్శకుడి గురించి?

మణికాంత్‌కి ఇది తొలి సినిమా. ఈ స్ర్రిప్టు కోసం చాలా కష్టపడ్డారు. గతేడాది విడుదల కావాలి కానీ కరోనా కారణంగా వాయిదా పడుతూ వచ్చింది.

తదుపరి ప్రాజెక్టులు

‘ఆకాశవాణి’, ‘లక్ష్య’, ‘గుర్తుందా శీతాకాలం’, ‘కార్తికేయ 2’ చిత్రాలతోపాటు మరో రెండు సినిమాలకు పనిచేస్తున్నాను.
 


ఇవీ చదవండి


Tags :

మరిన్ని

కొత్త సినిమాలు

మరిన్ని

గుసగుసలు

మరిన్ని

రివ్యూ

మరిన్ని

కొత్త పాట గురూ

మరిన్ని