హైదరాబాద్‌: నటి నిహారిక కొణిదెల కథానాయికగా నటించిన తమిళ చిత్రం ‘ఒరు నల్లనాళ్ పాత్తు సొల్రేన్’. ఆరుముగ కుమార్‌ దర్శకుడు. విజయ్‌ సేతుపతి కీలకపాత్రలో నటించిన ఈ సినిమా 2018లో విడుదలై.. బాక్సాఫీస్‌ వద్ద మిశ్రమ స్పందనలు అందుకుంది. దాదాపు మూడేళ్ల తర్వాత తాజాగా ఈ చిత్రాన్ని తెలుగులో ప్రేక్షకుల ముందుకు తీసుకురానున్నట్లు చిత్రబృందం ప్రకటించింది. ‘ఓ మంచి రోజు చూసి చెప్తా’ అనే పేరుతో తెలుగులోకి డబ్‌ అయిన ఈ సినిమాని మార్చి 19న విడుదల చేయనున్నారు. కామెడీ జోనర్‌లో రూపుదిద్దుకున్న ఈ చిత్రాన్ని తెలుగులో అపోల్‌ ప్రొడక్షన్‌ బ్యానర్‌పై విడుదల చేయనున్నారు. జస్టిన్‌ ప్రభాకరణ్‌ స్వరాలు అందించారు.