హైదరాబాద్‌: ‘ఇస్మార్ట్‌ శంకర్‌’, ‘రెడ్‌’ చిత్రాలతో తిరిగి ఫామ్‌లోకి వచ్చారు కథానాయకుడు రామ్‌పోతినేని. ఇటీవల విడుదలైన ‘రెడ్‌’తో మంచి విజయాన్ని తన ఖాతాలో వేసుకున్న రామ్‌ త్వరలో తమిళ దర్శకుడితో కలిసి కొత్త చిత్రాన్ని పట్టాలెక్కించనున్నారు. కోలీవుడ్‌లో తెరకెక్కిన ‘ఆనందం’, ‘పందెంకోడి’, ‘పందెంకోడి-2’ చిత్రాలకు దర్శకత్వం వహించిన లింగుస్వామి.. డైరెక్ట్‌ తెలుగు సినిమాతో ఇక్కడి ప్రేక్షకులను అలరించేందుకు సిద్ధమయ్యారు. రామ్‌ కథానాయకుడిగా ఆయన ఓ విభిన్నకథా చిత్రాన్ని తెరకెక్కించనున్నారు. శ్రీనివాసా సిల్వర్‌ స్క్రీన్‌ పతాకంపై ఈ చిత్రం తెరకెక్కనుంది. తెలుగు, తమిళ భాషల్లో రూపుదిద్దుకోనున్న ఈ చిత్రానికి శ్రీనివాస్‌ చిత్తూరి నిర్మాత.