ఇంటర్నెట్‌ డెస్క్: పవన్‌ కల్యాణ్‌ ప్రధాన పాత్రలో సాగర్‌ కె.చంద్ర దర్శకత్వంలో ఓ సినిమా చేస్తున్నారు. మలయాళంలో విజయవంతమైన ‘అయ్యప్పనమ్‌ కోషియం’ చిత్రానికి ఇది రీమేక్‌. ఇందులో సాయి పల్లవి - పవన్ కల్యాణ్‌ భార్యగా నటించనుందని సమాచారం. ఇప్పటికే సినిమా షూటింగ్‌ ప్రారంభమైంది. ఏప్రిల్‌ నెలలో జరగబోయే షెడ్యూల్లో పవన్‌ - సాయి పల్లవిపై కొన్ని కీలక సన్నివేశాలను చిత్రీకరించనున్నారని వార్తలొస్తున్నాయి. ‘పీఎస్‌పీకే30’ వర్కింగ్‌ టైటిల్‌గా తెరకెక్కుతున్న ఈ చిత్రాన్ని సితార ఎంటర్‌టైన్‌మెంట్‌ పతాకంపై సూర్యదేవర నాగవంశీ నిర్మిస్తున్నారు. రానా ఇందులో మాజీ హవల్దార్‌గా పాత్రలో కనిపించనున్నారు. తాజాగా ఈ సినిమా రెండో షెడ్యూల్‌ హైదరాబాద్‌లో ప్రారంభమైంది. ఈ షెడ్యూల్లో పవన్‌ - రానాపై కొన్ని కీలక సన్నివేశాలను చిత్రీకరించనున్నారు. ఇందులో ఐశ్వర్య రాజేష్‌ రానా సరసన నటిస్తోంది. చిత్రానికి త్రివిక్రమ్‌ శ్రీనివాస్‌ స్ర్కీన్‌ప్లే, మాటలు సమకూరుస్తుండగా, తమన్‌ స్వరాలు అందిస్తున్నారు. ప్రస్తుతం సాయిపల్లవి..  ‘లవ్‌స్టోరీ’, ‘విరాట్‌ పర్వం’, ‘శ్యామ్‌ సింగరాయ్‌’ చిత్రాల్లో నటిస్తోంది.