Salman Khan: ‘హిట్‌ కొట్టినా.. నాలుగైదు నెలలు అవకాశాలే రాలేదు’ - salman khan told he was jobless after maine pyar liya movie release
close
Published : 17/10/2021 02:04 IST
Facebook Share Twitter Share WhatsApp Share Telegram Share Link Share

Salman Khan: ‘హిట్‌ కొట్టినా.. నాలుగైదు నెలలు అవకాశాలే రాలేదు’

ఇంటర్నెట్‌ డెస్క్‌: ఒక చిత్రం హిట్‌ కొట్టగానే అందులో నటించిన నటులకు వరుసపెట్టి అవకాశాలు వస్తుంటాయి. వచ్చిన అవకాశాల్ని సద్వినియోగం చేసుకోవడం.. చేసుకోకపోవడం వేరే విషయం. పాపం సల్మాన్‌ఖాన్‌.. తను హీరోగా నటించిన తొలి చిత్రం ‘మైనే ప్యార్‌ కియా’ బ్లాక్‌బాస్టర్‌ హిట్‌ కొట్టినా.. కొన్ని నెలలపాటు అతనికి ఎలాంటి అవకాశాలు రాలేదట. హిట్‌ ఘనతను తనకు జోడీగా నటించిన భాగ్యశ్రీ ఎగరేసుకుపోయిందని ఓ సందర్భంలో సల్మాన్‌ తన తొలి చిత్రం తర్వాత ఎదురైన పరిస్థితులను వివరించాడు. 

‘‘మైనే ప్యార్‌ కియా’ చిత్రం విడుదలై ఘన విజయం సాధించింది. కానీ, ఆ ఘనతను భాగ్యశ్రీ కొట్టేసింది. చిత్ర పరిశ్రమలో ప్రతి ఒక్కరూ సినిమా హిట్‌ కావడానికి భాగ్యశ్రీనే కారణమని, నేను ఏదో ఉన్నాను అంటే ఉన్నాననుకున్నారు. దీంతో నాలుగైదు నెలల వరకు నాకు ఒక్క అవకాశం కూడా రాలేదు. పైగా భాగ్యశ్రీ పెళ్లి చేసుకొని నటనకు దూరం కావాలని నిర్ణయించుకోవడంతో ఇక నాకు అవకాశాలే రావని బాధపడ్డాను’’అని చెప్పుకొచ్చాడు. అయితే, సల్మాన్‌ అలా బాధపడటం చూడలేక అతడి తండ్రి సలీం ఖాన్‌.. జీపీ సిప్పీ అనే నిర్మాతను పిలిచి.. సల్మాన్‌తో సినిమా తీయబోతున్నట్లు ప్రకటించమని చెప్పాడట. ఆ ప్రకటన పత్రికలు, మ్యాగజైన్‌లలో రావడంతో ఇతర దర్శకులు, నిర్మాతల నుంచి సల్మాన్‌కు ఆఫర్లు వచ్చాయి. ‘మైనే ప్యార్ కియా’ చిత్రానికి సల్మాన్‌ పారితోషికంగా రూ.31వేలు తీసుకోగా.. తర్వాత అతడి పారితోషికం రూ.75వేలకు పెరిగిందట.

సల్మాన్‌ఖాన్‌తోపాటు హీరోయిన్‌ భాగ్యశ్రీ, దర్శకుడు సూరజ్‌ బర్జాత్యాకు కూడా ఇదే తొలి సినిమా. సంపన్న కుటుంబానికి చెందిన అబ్బాయి.. పేదింటికి చెందిన అమ్మాయి ప్రేమలో పడతారు. ఆ తర్వాత వారికి ఎదురయ్యే పరిస్థితులే కథాంశంగా తెరకెక్కిన ఈ చిత్రం 1989 డిసెంబర్‌29న విడుదలైంది. కథ, పాటలు ప్రేక్షకులకు అమితంగా నచ్చడంతో బ్లాక్‌బాస్టర్‌ హిట్‌ సాధించింది. అప్పటి బాలీవుడ్‌లో అత్యధిక కలెక్షన్లు వసూలు చేసిన సినిమాగా ‘మైనే ప్యార్‌ కియా’ రికార్డు సృష్టించింది.


Advertisement


మరిన్ని

కొత్త సినిమాలు

మరిన్ని

గుసగుసలు

మరిన్ని

రివ్యూ

మరిన్ని

ఇంటర్వ్యూ

మరిన్ని

కొత్త పాట గురూ

మరిన్ని