హైదరాబాద్‌: ఈ సారి ఎలాగైనా బ్లాక్‌బస్టర్‌ కొట్టాలనే ఉద్దేశంతో గోపిచంద్‌-సంపత్‌నంది కాంబో సిద్ధమవుతోంది. తాజాగా విడుదలైన ‘సీటీమార్‌’ టైటిల్‌ సాంగ్‌ ఆ ఉద్దేశాన్ని తెలియజేసేలా కనిపిస్తోంది. ‘కబడ్డీ..కబడ్డీ..సీటీమార్‌..’అంటూ సాగుతున్న ఈ లిరికల్‌ వీడియోలో గోదారి తీరాన గోపిచంద్‌ తనటీమ్‌లోని క్రీడాకారిణులకు వీర లెవెల్లో కబడ్డీ ప్రాక్టీస్‌ చేయిస్తున్నట్టు కనిపిస్తోంది. ఈ చిత్రానికి మణిశర్మ సంగీతం అందిస్తుండగా, కాసర్ల శ్యామ్‌ ‘సీటీమార్‌’ టైటిల్‌ సాంగ్‌కు సాహిత్యం అందించారు. అనురాగ్‌ కులకర్ణి, రేవంత్‌, వరం సింగర్ల త్రయం ఈ పాటను ఉద్వేగంగా ఆలపించారు. శ్రీనివాస సిల్వర్‌ స్క్రీన్‌ నిర్మాణంలో వస్తున్న ఈ చిత్రంలో తమన్నా హీరోయిన్‌గా నటిస్తోంది. ఏప్రిల్‌ 2 నుంచి ఈ చిత్రం థియేటర్లలో కబడ్డీ కూత పెట్టనుంది. మరి లేటు చేయకుండా ‘సీటీమార్‌’ సాంగ్‌ను చూసేయండి!