ఇంటర్నెట్‌డెస్క్‌: సూర్య కథానాయకుడిగా సుధ కొంగర దర్శకత్వంలో తెరకెక్కిన చిత్రం ‘సూరారై పోట్రు’. తెలుగులో ‘ఆకాశం నీ హద్దురా’ పేరుతో ప్రేక్షకుల ముందుకు వచ్చింది. ఎయిర్‌ డెక్కన్‌ వ్యవస్థాపకుడు జీఆర్‌ గోపీనాథ్‌ జీవిత కథ ఆధారంగా ఈ చిత్రాన్ని తెరకెక్కించారు. అపర్ణా బాలమురళి కథానాయిక.

కరోనా కారణంగా గతేడాది అమెజాన్‌ ప్రైమ్‌ వేదికగా విడుదలైన ఈ సినిమా మంచి టాక్‌ను తెచ్చుకుంది. ముఖ్యంగా సూర్య నటన, సుధ కొంగర టేకింగ్‌ విమర్శకులను సైతం మెప్పించింది. అంతేకాదు, 93వ ఆస్కార్‌ అవార్డుల స్క్రీనింగ్‌కు ఉత్తమ నటుడు, ఉత్తమ నటి, ఉత్తమ దర్శకురాలు, ఉత్తమ ఒరిజినల్‌ స్కోర్‌ విభాగాల్లో ప్రదర్శితమైంది. కాగా, నిడివి కారణంగా ఈ సినిమాలో తొలగించిన వీడియోలను చిత్ర నిర్మాణ సంస్థ 2డీ ఎంటర్‌టైన్‌మెంట్‌ విడుదల చేసింది. ప్రస్తుతం యూట్యూబ్‌లో ఇవి ఎంతగానో అలరిస్తున్నాయి. జీవీ ప్రకాశ్‌ కుమార్‌ ఈ చిత్రానికి స్వరాలు సమకూర్చారు.