close

తాజా వార్తలు

Published : 01/04/2020 01:06 IST
Facebook Share Twitter Share WhatsApp Share Telegram Share

కరోనా సహాయ కేంద్రానికి సమాచారం..వ్యక్తి హత్య!

సీతమర్హి(బిహార్‌): కరోనా వైరస్‌ విజృంభిస్తోన్న సమయంలో దేశవ్యాప్తంగా 21రోజులపాటు లాక్‌డౌన్‌ కొనసాగుతోంది. ఈ సమయంలో ప్రజలెవ్వరూ అత్యవసరమైతే తప్ప ఇళ్లనుంచి బయటకు రావొద్దని ప్రభుత్వం హెచ్చరించింది. లాక్‌డౌన్‌ సమయంలో ఎవరైనా దూర ప్రాంతాల నుంచి వచ్చేవారి సమాచారం ఇవ్వాలని రాష్ట్ర ప్రభుత్వాలు సూచిస్తున్నాయి. కరోనా వైరస్‌ లక్షణాలున్న వారి గురించి తెలుసుకునేందుకు ప్రత్యేక సహాయ కేంద్రాలను కూడా ఏర్పాటు చేశాయి.

తాజాగా ఇలాంటి సహాయ కేంద్రానికి సమాచారమిచ్చిన వ్యక్తిపై దాడిచేసి హత్య చేసిన అమానుష ఘటన బిహార్‌లో చోటుచేసుకుంది. బిహార్‌లోని సీతామర్హి ప్రాంతానికి చెందిన ఇద్దరు వ్యక్తులు లాక్‌డౌన్‌ సమయంలో మహారాష్ట్ర నుంచి వారి స్వస్థలం సీతామర్హికి చేరుకున్నారు. ఇది గ్రహించిన స్థానిక యువకుడు ఈ విషయాన్ని అక్కడి కరోనా సహాయ కేంద్రానికి తెలిపాడు. విషయం తెలుసుకున్న అధికారులు వారి ఇంటికి వచ్చి ఆ ఇద్దరితో పాటు కుటుంబసభ్యులకు వైద్యపరీక్షలు నిర్వహించారు. దీంతో ఆగ్రహానికి గురైన ఆ ఇరువురి కుటుంబాలు, సమాచారం ఇచ్చిన వ్యక్తిపై దాడిచేశారు. తీవ్ర గాయాలపాలైన ఆ వ్యక్తిని ఆసుపత్రికి తరలించేలోపే మరణించాడు.

సమాచారం అందుకున్న పోలీసులు కేసు నమోదుచేసిన దర్యాప్తు చేస్తున్నారు. చనిపోయిన వ్యక్తి 20ఏళ్ల బబ్లూ కుమార్‌గా గుర్తించారు. ఈ ఘటనలో మొత్తం ఏడుగురి పాత్ర ఉన్నట్లు అనుమానిస్తున్నారు. వీరిని అదుపులోకి తీసుకొని విచారిస్తున్నారు. ఇదిలా ఉంటే, ఈ హత్యను తీవ్రంగా ఖండించిన జేడీయూ ప్రభుత్వం పూర్తి విచారణకు ఆదేశించింది. ఈ ఘటనలో పాల్గొన్న వారిపై కఠిన చర్యలు తీసుకుంటామని ప్రకటించింది. 


Tags :

క్రైమ్

జిల్లా వార్తలు
బిజినెస్‌
మరిన్ని
జాతీయ- అంతర్జాతీయ
మరిన్ని
పాలిటిక్స్
మరిన్ని
సినిమా
మరిన్ని
క్రీడలు
మరిన్ని
క్రైమ్
మరిన్ని