అందమే పెట్టుబడిగా మహిళలపై వల

ప్రధానాంశాలు

Updated : 02/08/2021 11:16 IST

అందమే పెట్టుబడిగా మహిళలపై వల

 సామాజిక మాధ్యమాల్లో పరిచయాలు
నగ్నచిత్రాల సేకరణ.. బ్లాక్‌మెయిల్‌
 మోసగాడి అరెస్టు.. సొమ్ము స్వాధీనం

కడప నేరవార్తలు, న్యూస్‌టుడే: అతడో అందగాడు. తన అందంతో వల విసురుతాడు. ఫేస్‌బుక్‌, షేర్‌చాట్‌, ఇన్‌స్టాగ్రామ్‌లో యువతులు, మహిళలతో పరిచయం పెంచుకుంటాడు. వారి అర్ధనగ్న చిత్రాలు తీసుకున్న తర్వాత అసలు రూపం బయటపెడతాడు. పరువు పోతుందని మహిళలు అతను అడిగినంత డబ్బులు, నగలు ఇచ్చేవారు. ఈ మోసగాడిని కడప తాలూకా పోలీసులు అరెస్టు చేశారు. అతడి నుంచి రూ.1.26 లక్షల నగదు, 30 గ్రాముల నగలు స్వాధీనం చేసుకున్నారు. ఇతనిపై రెండు తెలుగు రాష్ట్రాల్లోని పలు ఠాణాల్లో కేసులు నమోదయ్యాయి. కడప డీఎస్పీ సునీల్‌ తెలిపిన వివరాలిలా ఉన్నాయి...

‘కడప జిల్లా ప్రొద్దుటూరుకు చెందిన చెన్నుపల్లి ప్రసన్నకుమార్‌ అలియాస్‌ ప్రశాంత్‌రెడ్డి అలియాస్‌ రాజారెడ్డి అలియాస్‌ టోనీ ఇంజినీరింగ్‌ మొదటి సంవత్సరంలోనే చదువు మానేసి జల్సాలకు అలవాటు పడ్డాడు. 2017లో గొలుసు చోరీలు, ఇళ్లలో దొంగతనాలకు పాల్పడ్డాడు. జైలుకు వెళ్లి బెయిలుపై బయటికి వచ్చాడు. ఇతడికి షేర్‌చాట్‌ ద్వారా శ్రీనివాస్‌ అనే వ్యక్తితో 2020లో పరిచయమైంది. తన పేరు ప్రశాంత్‌రెడ్డి అని, హైదరాబాద్‌ సచివాలయంలో పనిచేస్తున్నానని, అటెండర్‌ ఉద్యోగం ఇప్పిస్తానని శ్రీనివాస్‌కు ఆశ చూపాడు. తన తల్లి వైద్యం కోసమని డబ్బులు అడిగాడు. శ్రీనివాస్‌ తన తల్లి మెడలోని బంగారు గొలుసు తీసుకెళ్లి ఇచ్చాడు. తర్వాత శ్రీనివాస్‌ ఎన్నిసార్లు ఫోన్‌చేసినా స్పందించలేదు. జులై 29న ఓ చోరీ కేసులో ప్రసన్నకుమార్‌ను అరెస్టు చేసి విచారించగా విస్తుపోయే నిజాలు వెలుగులోకి వచ్చాయి. కడప, విజయవాడ, హైదరాబాద్‌ తదితర నగరాల్లో ఫేస్‌బుక్‌, షేర్‌చాట్‌, ఇన్‌స్టాగ్రామ్‌ తదితర సామాజిక మాధ్యమాలద్వారా యువతులు, మధ్యవయసుమహిళలతో పరిచయం పెంచుకుని వారికి మాయమాటలు చెప్పి ప్రేమలోకి దించేవాడు. వారితో చాటింగ్‌ చేస్తూ వారి నగ్న, అర్ధనగ్న చిత్రాలను, వీడియోలను సేవ్‌ చేసుకుని, బ్లాక్‌మెయిల్‌ చేసి డబ్బులు పంపాలని డిమాండ్‌ చేసేవాడు. లేదంటే నగ్న చిత్రాలను సామాజిక మాధ్యమాలలో పెడతానని బెదిరించాడు. సుమారు 200మంది యువతులు, వందమంది మహిళలను మోసం చేశాడు. అతని ఫోన్లో అన్నీ మహిళలు, అమ్మాయిల చిత్రాలే ఉన్నాయి’ అని డీఎస్పీ తెలిపారు.




Tags :

మరిన్ని

జిల్లా వార్తలు
మరిన్ని

దేవతార్చన