డొల్ల ఖాతాలపై గురి
eenadu telugu news
Updated : 25/10/2021 11:55 IST

డొల్ల ఖాతాలపై గురి

ఎఫ్‌డీల దారి మళ్లింపుపై విచారణ వేగవంతం

ఈనాడు, అమరావతి

పీ ఆయిల్‌ ఫెడ్‌లో బయటపడిన రూ.5కోట్ల ఎఫ్‌డీల మాయంపై సీసీఎస్‌ పోలీసులు దర్యాప్తును వేగవంతం చేశారు. దారిమళ్లిన సొమ్ములో ఇప్పటి వరకు స్వాధీనం చేసుకుంది, సీజ్‌ చేసిన మొత్తం స్వల్పమే. డొల్ల ఖాతాలకు తరలించి, అక్కడి నుంచి ఎవరి వాటాలు వారు తీసుకున్నట్లు తేలింది. ఈ నేపథ్యంలో డొల్ల ఖాతాలపై దృష్టి సారించారు. గన్నవరం సమీపంలోని వీరపనేనిగూడెం సప్తగిరి గ్రామీణ బ్యాంకులో ఆయిల్‌ ఫెడ్‌ అధికారులు ఎఫ్‌డీ వేశారు. అది గడువు తీరకుండానే రద్దు చేసి, ఇతర ఖాతాలకు మళ్లించారు. దీనికి సంబంధించి సీసీఎస్‌ పోలీసులు బ్యాంకు, ఆయిల్‌ఫెడ్‌ అధికారులను పిలిపించి విచారించారు. ఈ ఏడాది మే 15న సంస్థ రూ.5కోట్ల నగదు పటమట ఐసీఐసీఐ ఖాతా నుంచి సప్తగిరి గ్రామీణ బ్యాంకు ఖాతాకు వెళ్లిందని గుర్తించారు. ఇదే విషయాన్ని ఆయిల్‌ఫెడ్‌ అధికారులు మెయిల్‌ రూపంలో సప్తగిరి బ్యాంకుకు తెలియజేశారు. ఏడాది కాలానికి ఎఫ్‌డీఆర్‌లు జారీ చేయాలని విజ్ఞప్తి చేశారు. వీటి గడువు ముగిశాక. డిపాజిట్‌ మొత్తం, వడ్డీని పటమట ఎస్బీఐ ఖాతాలో జమ చేయాలని కోరారు. ఈ మేరకు ఎఫ్‌డీలు అయిన తర్వాత వాటిని ఆయిల్‌ ఫెడ్‌కు అందజేశారు. కానీ.. ఈ మూడు డిపాజిట్లను రద్దు చేయాలని సంస్థ అధికారుల పేరిట నకిలీ లేఖలు సృష్టించారు. వీటి ఆధారంగా రద్దు చేసి ఏపీ మర్కంటైల్‌ కోఆపరేటివ్‌ క్రెడిట్‌ సొసైటీకి మళ్లించారు. ఎఫ్‌డీఆర్‌లను రద్దు చేసే ముందు కనీసం తమకు సమాచారం కూడా లేదని ఆయిల్‌ఫెడ్‌ అధికారులు చెబుతున్నారు.

* ఈ కుంభకోణంలో అప్పటి బ్యాంకు మేనేజరు రామిరెడ్డి కీలకపాత్ర పోషించారని అనుమానిస్తున్నారు. విషయం బయటకు పొక్కగానే అతను అజ్ఞాతంలోకి వెళ్లిపోయాడు. ఇతని ఆచూకీ కోసం ప్రత్యేక బృందాలు గాలిస్తున్నాయి. బెంగళూరులోని అతడి కుమారుడి ఇంటికి వెళ్లినట్లు గుర్తించి బృందాలు వెళ్లాయి. అక్కడి నుంచి కూడా పరారీ అయినట్లు తేలింది. రామిరెడ్డి దొరికితే అసలు విషయం బయటకు వచ్చే అవకాశం ఉందని భావిస్తున్నారు. మరో వైపు బ్యాంకు ఉన్నతాధికారులను కూడా పిలిపించి సమాచారం అడిగారు. మరో నిందితుడు అయిన షిర్డీకి చెందిన మదన్‌ ఆచూకీ కూడా ఇంకా దొరకాల్సి ఉంది. ఇతను నకిలీ లేఖలపై ప్రభుత్వ అధికారుల సంతకాలను ఫోర్జరీ చేసేవాడు.

* ఏపీ మర్కంటైల్‌ కోఆపరేటివ్‌ క్రెడిట్‌ సొసైటీని స్థాపించిన బీవీవీ నాగ సత్యనారాయణ డిపాజిట్ల సొమ్మును డొల్ల ఖాతాలకు మళ్లించడంలో క్రియాశీలకంగా వ్యవహరించినట్లు పోలీసులు నిర్ధారణకు వచ్చారు. ఇప్పటికే ఇతన్ని హైదరాబాద్‌ సీసీఎస్‌ పోలీసులు అరెస్టు చేశారు. 2013లో ఈ సొసైటీని ప్రారంభించారు. ఓ వ్యక్తి రూ.2.5 కోట్ల మోసం చేయడంతో అప్పులపాలయ్యాడు. గత ఏడాది డిసెంబరులో సోమశేఖర్‌ అలియాస్‌ రాజ్‌కుమార్‌తో కుమ్మక్కు అయి నకిలీ కరెంట్‌ ఖాతాలను తెరిచారు. వివిధ ఖాతాల్లోని నగదును వీటిల్లోకి మళ్లించారు. దీనికిగాను 7 శాతం కమీషన్‌ దక్కింది. ఈ కుంభకోణంలో దర్యాప్తు ఇంకా ఓ కొలిక్కి రాలేదు. కీలక నిందితులను హైదరాబాద్‌ సీసీఎస్‌ పోలీసులు అరెస్టు చేయగా, వారంతా జ్యుడీషియల్‌ రిమాండ్‌లో ఉన్నారు. ఈ నేపథ్యంలో వీరిని విచారించేందుకు నగర పోలీసులు పీటీ వారెంట్లను కోర్టులో దాఖలు చేశారు. ఆయిల్‌ఫెడ్‌లో గోల్‌మాల్‌కు సంబంధించి ఈనెల 27వ తేదీలోగా ఇక్కడ హాజరుపర్చాల్సి ఉంది. అనంతరం నేరంతో సంబంధం ఉన్న ఆరుగురు నిందితులను తమ కస్టడీకి కోరుతూ పిటిషన్‌ వేసే అవకాశం ఉంది. న్యాయస్థానం అనుమతితో అదుపులోకి తీసుకుని వివరాలు రాబట్టనున్నారు.


Advertisement

Tags :

మరిన్ని

జిల్లా వార్తలు
తాజా వార్తలు
మరిన్ని