close

శుక్రవారం, నవంబర్ 22, 2019

ప్రధానాంశాలు

మంచు కరగడానికి భూతాపం ఒక్కటే కారణం కాదు

శిథిలాల దుప్పటి ఏర్పాటు ఓ పరిష్కారం
‘ఈనాడు’తో డబ్ల్యూఐహెచ్‌జీ మాజీ డైరెక్టర్‌, శాస్త్రవేత్త బి.ఆర్‌.అరోరా

హిమాలయాల్లోని మంచుకొండలు కరగడానికి భూతాపం ఒక్కటే కారణం కాదని, అక్కడ ఉన్న భౌగోళిక పరిస్థితులు కూడా దోహదం చేస్తున్నాయని ప్రముఖ శాస్త్రవేత్త, వాడియా ఇనిస్టిట్యూట్‌ ఆఫ్‌ హిమాలయన్‌ జియాలజీ(డబ్ల్యూఐహెచ్‌జీ) మాజీ డైరెక్టర్‌ బి.ఆర్‌.అరోరా అన్నారు. భూతాపంతో ఉష్ణోగ్రతలు పెరిగి మంచుకొండలు కరగకుండా ఉండాలంటే వాటిపై ఒక పొర మాదిరి శిథిలాల(డెబ్రిస్‌)తో నింపడమే ముందున్న పరిష్కారమని అన్నారు. ఇది చాలా ఖర్చుతో కూడుకున్నదని, కావాల్సిన సాంకేతికను అభివృద్ధితోనే సాధ్యమన్నారు. హైదరాబాద్‌లోని జాతీయ భూ భౌతిక పరిశోధన సంస్థ(ఎన్‌జీఆర్‌ఐ)లో జియోసైన్సెస్‌- సుస్థిరాభివృద్ధి లక్ష్యాలపై జరుగుతున్న సదస్సులో పాల్గొనడానికి వచ్చిన ఆయనతో ‘ఈనాడు’  ముఖాముఖి విశేషాలు..

ఈనాడు, హైదరాబాద్‌

మానవ చర్యలూ కారణం
ఇంటర్‌ గవర్నమెంటల్‌ ప్యానెల్‌ ఆన్‌ క్లైమెట్‌ ఛేంజ్‌(ఐపీసీసీ) గతంలో ఇచ్చిన నివేదిక ప్రకారం 2035 నాటికి హిమాలయాల్లోని మంచుకొండలు పూర్తిగా కరిగిపోయే ప్రమాదం ఉందని హెచ్చరించింది. వందేళ్లుగా ఉపరితల ఉష్ణోగ్రతలు పెరగడమే ఇందుకు కారణం. మానవచర్యలు, పారిశ్రామికీకరణతో వాతావరణంలో బొగ్గుపులుసు వాయువు సాంద్రత పెరిగింది. ఫలితంగా భూతాపం పెరుగుతోంది. సాధారణంగా మంచుకొండలు సముద్ర మట్టానికి దాదాపు 4,000 మీటర్ల ఎత్తులో ఉంటాయి. అలాంటి చోట ఒక డిగ్రీ ఉష్ణోగ్రత పెరిగినా ఆ ప్రభావం చాలా తీవ్రంగా ఉంటుంది. మంచుకొండలు కరిగితే వరదల ముంపు ప్రభావం ఉంటుంది. భవిష్యత్తులో నీటి ఎద్దడి ఏర్పడుతుంది.

శాశ్వత పరిష్కారాలు..
ప్రపంచవ్యాప్తంగా భూతాపం తగ్గించడానికి పచ్చదనం పెంపొందించడం వంటి చర్యలు చేపట్టడంతో పాటూ మంచుకొండల ప్రాంతాల్లో ఉష్ణోగ్రతలు పెరగకుండా జాగ్రత్తలు తీసుకోవాలి. అక్కడకు వెళ్లే పర్యాటకుల సంఖ్యను కుదించాలి. ప్రస్తుతం ప్రపంచవ్యాప్తంగా మంచుకొండలపైన ఒక పొర మాదిరి శిథిలాలతో కప్పే దిశగా అధ్యయనాలు సాగుతున్నాయి. ఇప్పటికైతే అంత పురోగతి లేదు. ఖర్చుతో కూడుకున్న పని ఇది. అంత ఎత్తునకు శిథిలాల తరలింపు కష్టం. సాంకేతికతతోనే ఈ సమస్యలను అధిగమించగలమని భావిస్తున్నాం. హిమాయాల్లో శిథిలాలతో కప్పబడిన మంచుకొండలు కరగడం చాలా తక్కువగా ఉండటం ఈ పరిశోధనకు బలం చేకూరుస్తోంది.

మన దగ్గర..
హిమాలయాల్లో క్షేత్ర స్థాయిలో వెళ్లి నమోదు చేసిన డాటా ప్రకారం మన భూభాగంలో 9,985 మంచుకొండలు ఉన్నాయి. ఉపగ్రహాల నుంచి సేకరించిన సమాచారం ప్రకారం 32,393 ఉన్నాయి. రెండింటికి తేడా ఉండటానికి కారణం.. ఉపగ్రహాల సమాచారంలో మనతో పాటూ హిమాలయాలు ఉన్న మిగతా దేశాల్లోని మంచుకొండలు నమోదు కావడమే. పైగా పైనుంచి తీసిన చిత్రాల్లో అవి ఏడాది పొడవున మంచుతో నిండిన కొండలా, లేక సీజన్‌లో మంచు కురిసినవా అనే స్పష్టత లేదు. హిమాలయాల్లోని 70 శాతం మంచుకొండలు 40 శాతం మేర మంచుతో కప్పబడి ఉంటాయి.

మూడో అతిపెద్దది..
ప్రపంచంలో అంటార్కిటికా, ఆర్కిటిక్‌ తర్వాత హిమాలయ పర్వతాల్లోనే అతిపెద్ద మంచుకొండలు ఉన్నాయి. మూడో అతిపెద్ద హిమానీ నదాలుగా చెబుతుంటారు. ఏటా అడుగు మేర మంచు కరుగుతున్నట్లు అధ్యయనాలు వెల్లడిస్తున్నాయి. ఇది ఆందోళన కల్గించే విషయం. మంచు కొండలు కరిగే రేటు వేర్వేరుగా ఉంది. గంగోత్రి ప్రాంతంలో 32 ఏళ్ల గణాంకాలను విశ్లేషించగా.. 1995 తర్వాత అంతకుముందుతో పోలిస్తే మంచు కరగడం తగ్గింది. భూతాపంతో పాటూ మంచుకొండపై నేరుగా సూర్యకిరణాలు పడటం, ఎత్తు, వాలుగా ఉండటం, పర్యాటకుల సందర్శనతో ఉష్ణోగ్రతలు పెరిగి మంచు కరగడానికి దారితీస్తున్నాయి. సమగ్ర అధ్యయనానికి ఈ వివరాలతో పాటూ పాత డాటా కావాల్సి ఉంది. ఈ మంచుకొండలు వేల సంవత్సరల క్రితం ఏర్పడినవి. మన దగ్గర కొన్ని దశాబ్దాల డాటా మాత్రమే ఉంది. అందుబాటులోకి వచ్చిన ఆధునిక సాంకేతికతతో వందల ఏళ్ల క్రితం డాటాను పొందే సౌలభ్యం ఏర్పడింది. ప్రస్తుతం ఈ పరిశోధనలు జరుగుతున్నాయి.

మరిన్ని వార్తలు

తాజా వార్తలు

జిల్లా వార్తలు

+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.