close

శుక్రవారం, డిసెంబర్ 06, 2019

ప్రధానాంశాలు

కామారెడ్డి - పాతబస్తీ

అంతర్జాతీయ కాల్స్‌ను ‘లోకల్‌’గా మార్చే కేసులో వెలుగుచూసిన నిజాలు
ముఠాలో నలుగురి అరెస్టు
పరారీలో ప్రధాన నిందితుడు
300 సిమ్‌కార్డులు, 20 సిమ్‌ బాక్సులు, పరికరాలు స్వాధీనం

కేశవగిరి, న్యూస్‌టుడే: పాతబస్తీ ఇస్మాయిల్‌నగర్‌లో అంతర్జాతీయ కాల్స్‌ను లోకల్‌ కాల్స్‌గా మార్చే కేంద్రం గుట్టు రట్టు చేసిన పోలీసులు ఈ వ్యవహారంలో బుధవారం నలుగురు నిందితులను అరెస్టు చేశారు. ప్రధాన నిందితుడితోపాటు సిమ్‌కార్డుల సరఫరా చేసే మధ్యవర్తి పరారీలో ఉన్నారు. అరెస్టు చేసిన నిందితులను చాంద్రాయణగుట్ట పోలీసులు రిమాండుకు తరలించారు. అరెస్టయిన వారిలో ప్రధాన నిందితుడి మహ్మద్‌ ఇమ్రాన్‌ఖాన్‌ భార్య రెష్మాసుల్తానా, కామారెడ్డి జిల్లా పల్కంపేటలో కిరాణాషాపు నిర్వహిస్తున్న సోదరులు మహ్మద్‌ వాహెద్‌పాషా అలియాస్‌ అక్బర్‌, మహ్మద్‌ అహ్మద్‌ పాషా, సిమ్‌కార్డుల పంపిణీదారు మహ్మద్‌ అబ్దుల్‌ నవీద్‌(33) ఉన్నారు. ఇమ్రాన్‌ఖాన్‌, సిమ్‌కార్డులు సమకూర్చడంలో మధ్యవర్తిగా వ్యవహరించిన జాఫర్‌ పరారీలో ఉన్నారని డిటెక్టివ్‌ ఇన్‌స్పెక్టర్‌ ప్రసాద్‌ వర్మ తెలిపారు. ప్రధాన నిందితుడు పట్టుబడితే మరికొందరి పాత్ర బయటపడే అవకాశం ఉంది. కేసు వివరాలను చాంద్రాయణగుట్ట సీఐ రుద్రభాస్కర్‌, డీఐ కె.ఎన్‌.ప్రసాద్‌ వర్మ, ఎస్సై కొండలరావులతో కలిసి ఫలక్‌నుమా ఏసీపీ మహ్మద్‌ మజీద్‌ వెల్లడించారు. నిందితుల నుంచి 300 సిమ్‌కార్డులు, 20 సిమ్‌ బాక్సులు, వైఫై రూటర్లు, యూపీఎస్‌, ఇతర సామగ్రి, చరవాణులు స్వాధీనం చేసుకున్నట్లు ఏసీపీ మహ్మద్‌ మజీద్‌ తెలిపారు.

కామారెడ్డి జిల్లా పల్కంపేట నుంచి..
చాంద్రాయణగుట్ట ఠాణా పరిధిలో బండ్లగూడ ఇస్మాయిల్‌నగర్‌లో ఓ అద్దె ఇంట్లో అంతర్జాతీయ కాల్స్‌ను లోకల్‌ కాల్స్‌గా మార్చే కేంద్రానికి అవసరమైన సిమ్‌కార్డులు కామారెడ్డి జిల్లా పల్కంపేటలోని ఓ కిరాణా దుకాణం నుంచి పెద్దఎత్తున సరఫరా అయినట్లు  పోలీసుల దర్యాప్తులో తేలింది. ప్రధాన నిందితుడు మహ్మద్‌ ఇమ్రాన్‌ఖాన్‌ ఇస్మాయిల్‌నగర్‌లో ఓ ఇంటిని అద్దెకు తీసుకుని భార్య రెష్మాసుల్తానాతో కలిసి ఉంటున్నాడు. గతంలో అంతర్జాతీయ కాల్స్‌ను లోకల్‌ కాల్స్‌గా మార్చే అనుభవం ఉండడంతో అదే వ్యవస్థను తన ఇంటిలో ఏర్పాటు చేసుకున్నాడు. కీలకమైన సాంకేతిక పరిజ్ఞానాన్ని చైనా నుంచి సంపాదించాడు. ఈ అక్రమ వ్యవహారంలో సిమ్‌కార్డులు కీలకం. ఈ నేపథ్యంలో ఇమ్రాన్‌ మెదక్‌ ప్రాంతానికి చెందిన మహ్మద్‌ అబ్దుల్‌ నవీద్‌ను మూడేళ్ల క్రితం సంప్రదించాడు. అప్పట్లో నవీద్‌ రిలయన్స్‌ సిమ్‌కార్డులు అమ్మేవాడు. డబ్బు ఆశకు నవీద్‌ కొన్ని సిమ్‌లను ఇమ్రాన్‌కు విక్రయించాడు. ఉద్యోగం వదిలేసిన తరువాత నవీద్‌ సిమ్‌కార్డులు ఇవ్వడం మానేశాడు. సిమ్‌కార్డుల అవసరం ఉండడంతో మళ్లీ ఇమ్రాన్‌ఖాన్‌ పాతనగర నివాసి (ఇతని చిరునామా ఇంకా పోలీసులకు తెలియలేదు) జాఫర్‌ను ఏడాదిన్నర క్రితం కలిశాడు. జాఫర్‌ పరిచయం ఉన్న వ్యక్తుల ద్వారా మళ్లీ నవీద్‌ను కలిసి సిమ్‌కార్డులు కావాలని అడిగాడు. డబ్బు లభిస్తుందనే ఆశతో నవీద్‌ మళ్లీ ప్రయత్నాలు మొదలుపెట్టాడు. తాను ఉద్యోగం చేసిన సమయంలో పరిచయం ఉన్న సేల్స్‌ ఎగ్జిక్యూటివ్స్‌ ద్వారా కామారెడ్డి జిల్లా పల్కంపేటలో కిరాణా షాపు నిర్వహిస్తున్న మహ్మద్‌ వాహెద్‌పాషా అలియాస్‌ అక్బర్‌, మహ్మద్‌ అహ్మద్‌పాషా సోదరులను కలిశాడు. వీరి నుంచి నెలకు కొంత మొత్తంలో సిమ్‌కార్డులు సేకరించే నవీద్‌, జాఫర్‌ ద్వారా ఇమ్రాన్‌కు చేరవేసేవాడు.

అక్రమ వ్యాపారంలో భాగస్వాములైన సోదరులు
వివిధ నెట్‌వర్క్‌లకు చెందిన సిమ్‌కార్డులను విక్రయించే సోదరులు మహ్మద్‌ వాహెద్‌ పాషా, మహ్మద్‌ అహ్మద్‌ పాషా అక్రమ వ్యాపారంలో భాగస్వాములయ్యారు. వినియోగదారుల నుంచి ధ్రువపత్రాలు తీసుకుని ఓటీపీ సహకారంతో సిమ్‌కార్డులు అందజేసేవారు. అవే ధ్రువపత్రాలను వినియోగించి వారి పేరు మీదే అక్రమంగా సిమ్‌కార్డులు తీసుకుని పోగుచేసేవారు. ఈ తరహాలో నెలకు 50 నుంచి 100 వరకు సిమ్‌కార్డులు సిద్ధం చేసి ఇవ్వగా.. నవీద్‌ అటునుంచి జాఫర్‌ ద్వారా పాతబస్తీలోని ఇమ్రాన్‌ఖాన్‌కు చేరేవి. ఈ తరహాలో 200లకు పైగా ఐడియా నెట్‌వర్క్‌ సిమ్‌కార్డులు ఇమ్రాన్‌కు చేరినట్లు పోలీసుల దర్యాప్తులో తేలింది.

జైలు శిక్ష పడ్డా మారని ఇమ్రాన్‌ఖాన్‌..: కాల్‌రూటింగ్‌ దందా చేస్తూ 2018లో రాజేంద్రనగర్‌ పోలీసులకు పట్టుబడి జైలుకెళ్లిన ఇమ్రాన్‌ఖాన్‌ తీరు మారలేదు. అక్రమ డబ్బు సంపాదనే ధ్యేయంగా మళ్లీ కాల్‌రూటింగ్‌ కేంద్రం ఏర్పాటు చేశాడు.

వినియోగదారులు అప్రమత్తంగా ఉండాలి
- ఏసీపీ మహ్మద్‌ మజీద్‌
కొత్త సిమ్‌కార్డులు తీసుకోవడానికి డీలర్లను ఆశ్రయించే వినియోగదారులు అప్రమత్తంగా వ్యవహరించాలని ఫలక్‌నుమా డివిజన్‌ ఏసీపీ మహ్మద్‌ మజీద్‌ సూచించారు. సిమ్‌ డీలర్లు ఒకటికి మించి ఓటీపీలను సృష్టించి అదనంగా సిమ్‌కార్డులను పొందే అవకాశం ఉందన్నారు. ధ్రువపత్రాలు ఇచ్చే సమయంలో ఓటీపీ జెనరేట్‌ అయ్యే సమయంలో జాగ్రత్తగా వ్యవహరించాలని ఏసీపీ సూచించారు.

మరిన్ని వార్తలు

తాజా వార్తలు

జిల్లా వార్తలు

+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.