close

సోమవారం, జనవరి 27, 2020

ప్రధానాంశాలు

గొలుసు కట్టు.. ఊటకు పట్టు

సర్వే పూర్తి చేసిన నీటిపారుదల అధికారులు
జిల్లా వ్యాప్తంగా 1,501 గుర్తింపు
సీఎం సూచనలతో అధికారులు కార్యాచరణ

పంటలు పండించాలంటే జలమే కీలకం.. చెరువు మత్తడి దూకితే దానికింది చెరువులోకి ప్రవాహం వెళుతోంది. అక్కడి నుంచి మరో చెరువులోకి ఇలా వర్షపు నీరు వృథా కాకుండా మన పూర్వీకులు గొలుసు కట్టు చెరువులను అనుసంధానం చేశారు. ఈ విధానం వల్ల రైతులు పంటలు పండించేవారు. కాలక్రమేణా ఈ పద్ధతిపై కర్షకులు దృష్టి సారించకపోవడంతో చాలా చెరువులు, కుంటలు కనుమరుగయ్యాయి. నీటి వనరులు బీళ్లుగా మారాయి. అటువంటి వాటికి పూర్వ వైభవం తెచ్చేందుకు ప్రభుత్వం మళ్లీ గొలుసుకు కట్టు విధానంపై కసరత్తు చేస్తోంది. వర్షం కురిస్తేనే కాదు.. ప్రాజెక్టు నిండినా, కాల్వల ద్వారా నీటి వనరులను నింపేందుకు చర్యలు తీసుకోవాలనే దిశగా ప్రభుత్వం అడుగులు వేస్తోంది. ముఖ్యమంత్రి కేసీఆర్‌ చెరువుల అనుసంధానంపై జిల్లాల వారీగా నివేదిక ఇవ్వాలని ఆదేశాలు ఇచ్చారు. దీంతో అధికారులు సర్వే చేసి, వాటిపై కార్యాచరణ రూపొందించారు.

న్యూస్‌టుడే, సంగారెడ్డి అర్బన్‌

జిల్లాలో సంగారెడ్డి, పటాన్‌చెరు, అందోలు, జహీరాబాద్‌, నారాయణఖేడ్‌ నియోజకవర్గాలు ఉన్నాయి. వర్షధార పంటలు అత్యధికంగా సాగు చేస్తారు. జిల్లాకు తలమానికమైన సింగూర్‌ ప్రాజెక్టు మినహా పెద్దగా ప్రాజెక్టులు లేవు. కేవలం చెరువులు, కుంటలు, బోరుబావులపై ఆధారపడి కర్షకులు వ్యవసాయం చేస్తుంటారు. సాగుకు నీరు కీలకంగా కావడం వల్ల ఏటా ప్రకృతి వైపరీత్యాలతో రైతులు కుదేలు కావాల్సి వస్తోంది. వర్షం పడిన సమయంలో చెరువులు, కుంటలనీరు వృథాగా వెళుతోంది. కర్ణాటక, మహారాష్ట్రలో భారీ వర్షాలు కురిసినా దిగువ ఉన్న సింగూర్‌లోకి నీరు వస్తోంది. అందులో ఎక్కువగా దిగువన ఉన్న మంజీర, ఘనపురం, నిజాంసాగర్‌ నుంచి సముద్రం పాలవుతోంది. ఇలా ఏటా లక్షల టీఎంసీల నీరు వృథాగా వెెళుతోంది. కాళేశ్వరం ప్రాజెక్టును ప్రభుత్వం ప్రతిష్ఠాత్మకంగా నిర్మిస్తోంది. ఇప్పటికే పనులు యుద్ధ ప్రాతిపాదికన సాగుతున్నాయి. ఆ ప్రాజెక్టు నుంచి మల్లన్నసాగర్‌ అక్కడి నుంచి జిల్లాలోని కాల్వల ద్వారా సింగూర్‌ప్రాజెక్టును  నింపేదిశగా ముఖ్యమంత్రి కేసీఆర్‌ ఆలోచన చేస్తున్నారు. అక్కడి నుంచి కాల్వల ద్వారా నారాయణఖేడ్‌, జహీరాబాద్‌ ప్రాంతాలకు ఎత్తిపొతల పథకాల ద్వారా చెరువులు, కుంటలను నింపేందుకు కసరత్తు సాగుతోంది. ఇవన్నీ పూర్తి అయితే సాగు నీటికి కొదవ ఉండదు. వర్షం పడినా, పడకున్నా పంటలు సాగు చేసుకునే దిశగా సర్కారు అడుగులు వేస్తోంది. మరోవైపు ఉమ్మడి మెదక్‌ జిల్లాలో పలు చోట్ల వృథా నీటి అడ్డుకట్టకు చెక్‌డ్యాంలు నిర్మించేందుకు చర్యలు చేపడుతోంది.

సర్వేతో వెలుగులోకి..!
ముఖ్యమంత్రి కేసీఆర్‌ గొలుసు కట్టు చెరువులను గుర్తించి రైతులకు మేలు చేసేలా చర్యలు తీసుకోవాలని ఏప్రిల్‌లో నీటిపారుదల శాఖ అధికారులకు ఆదేశాలు ఇచ్చారు. నీటిని ఒడిసి పట్టుకునేందుకు ప్రభుత్వం గొలుసుకట్టు చెరువులు, కుంటలను గుర్తించాలని సూచించడంతో, జిల్లా నీటిపారుదల శాఖ అధికారులు నీటివనరుల బాట పట్టారు. ఎక్కడ ఏ చెరువు, కుంటను గొలుసు కట్టులో గుర్తిస్తే ఏమేరకు రైతులకు ఒనగూరే ప్రయోజనాలపై అంచనాలు తయారు చేశారు. చిన్న నీటి పారుదల శాఖ ఆధ్వర్యంలో ఆయకట్టు అభివృద్ధి సంస ్థ(కాడా) గొలుసుల విధానాన్ని కొలిక్కి తెచ్చింది. జిల్లాలో చెరువులు, వాటి కింద ఉన్న గొలుసు వ్యవస్థను, ప్రాజెక్టులు- కాల్వలను భారత అంతరిక్ష పరిశోధన సంస్థ ఇస్రో సహకారంతో ట్రోపోషిట్‌లలో పటాలను సిద్ధం చేశారు. వాటిని మండలాల వారీగా నీటిపారుదల శాఖ అధికారులకు పంపించి  క్షేత్ర స్థాయిలో సమాచారం , ఉప గ్రహా చిత్రాలతో నియోజకవర్గాల వారీగా గొలుసు కట్టు చెరువులను గుర్తించారు. జిల్లాలో పెద్దగా ప్రాజెక్టులు లేకపోవడం వల్ల గొలుసు చెరువుల అనుసంధానంపై దృష్టి సారించారు. నీటి వనరులు ఒకే గొలుసులో రెండు నుంచి పది వరకూ ఉన్నట్లుగా గుర్తించారు. పూర్వం ఉన్న వాటికి అదనంగా మరి కొన్నింటిని చేర్చి అమలు చేయాలని అధికారులు కసరత్తు చేస్తున్నారు.  నీటివనరులను అభివృద్ధి చేస్తే కాల్వల ద్వారా పంటల సాగుకు నీటిని అందించే దిశగా చర్యలు చేపట్టాలని నిర్ణయం తీసుకున్నారు. దానికి అనుగుణంగా జిల్లాలో ఎటువంటి ఇబ్బందులు రాకుండా ఉండేందుకు గొలుసు కట్టు చెరువులపై అధికారులు పెద్దపీట వేస్తున్నారు.

ప్రభుత్వానికి నివేదిక ఇచ్చాం
మధుసూదన్‌రెడ్డి, నీటిపారుదల శాఖ జిల్లా అధికారి
ప్రభుత్వ ఆదేశాల మేరకు జిల్లాలో గొలుసు కట్టు చెరువులను ఇప్పటికే గుర్తించాం. వాటికి సంబంధించిన ట్రోపోషిట్‌ పటాలను సైతం సిద్ధం చేశాం. ఎంపిక చేసిన నీటి వనరులను (గొలుసుకట్టు చెరువులు, కుంటల) వివరాలను ప్రభుత్వానికి నివేదిక ఇచ్చాం. ఈ విధానం నీటిని ఒడిసి పట్టుకునేందుకు దోహదం చేస్తోంది. వర్షకాలంలో నీరంతా వృథాగా వెళ్లకుండా పొదుపు చేయాలని ప్రభుత్వం ఆలోచన చేస్తోంది. సాగుకు ఎల్లప్పుడు ప్రాజెక్టుల నుంచి కాల్వల ద్వారా చెరువులను, కుంటలలో నింపుకోవడం సులభతరమవుతోంది. ఈ విధానంతో రైతులకు ఎంతో ప్రయోజనం. భూగర్భ జలాలు సైతం పెరిగేందుకు ఆస్కారం ఏర్పడుతోంది.

మరిన్ని వార్తలు

జిల్లా వార్తలు

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.