ల్యాపీల్ని హ్యాపీగా ఎంచుకోండి!

ఇంకా ఎంత కాలమో తెలీదు.. ఎక్కువ శాతం ఇంటికే పరిమితం.. నాలుగు గోడల మధ్యే పని, చదువు.. అన్నీనూ! ఈ క్రమంలో ఎక్కువగా ఆలోచించేది సరైన ల్యాప్‌టాప్‌ గురించే. ఎలాంటి ల్యాపీ కొనాలి? ఎంత బడ్జెట్‌ పెట్టాలి? ఏయే అంశాలకు ప్రాధాన్యత ఇవ్వాలి?.. ఇలా ఎన్నో ప్రశ్నలు. ఇలాంటి సమస్యలే మీ మదిలోనూ ఉన్నాయా? అయితే, ఈ కథనం మీ కోసమే. ఫాలో అయితే మీ ఇంట్లోని వర్క్‌ స్టేషన్‌లో తగిన ల్యాపీని పెట్టేయొచ్ఛు.

పెద్దల తెరలే నయం..

ప్రస్తుతం మార్కెట్‌లో తక్కువ బరువుతో నాజూకు ల్యాపీలు ఎక్కువగా సందడి చేస్తున్నాయి. గత కొన్నేళ్లుగా కంపెనీలు ఎక్కువగా 13, 14 అంగుళాల ల్యాపీలనే ప్రవేశపెడుతున్నాయి. దీనికి కారణం లేకపోలేదు. గతంలో పని నిమిత్తం ఎక్కువగా ఒక చోటు నుంచి మరో చోటుకి ప్రయాణించాల్సి వచ్చేది. దీంతో బ్యాగుల్లో సులభంగా తీసుకెళ్లి ప్రజెంటేషన్స్‌ ఇవ్వటానికి వీలుగా ఉండేందుకు వాటికే అధిక ప్రాధాన్యత ఇచ్చేవారు. ప్రస్తుత పరిస్థితి దీనికి భిన్నం. బయట తిరిగే వీలు లేదు. ఇంటి నుంచే పని. అందుకే పెద్ద వాటిని ఎంపిక చేసుకోవడం మంచిది. 15 అంగుళాల ల్యాపీలు అందుకు చక్కని ఛాయిస్‌. పెద్ద తెరలున్న వాటిపై మాల్టీ-టాస్కింగ్‌ చేయడం సులభం. ఒకేసారి తెరపై ఒకటి కంటే ఎక్కువ విండోలను ఓపెన్‌ చేసుకుని పని కానివ్వొచ్ఛు పెద్ద తెరల ల్యాపీలను ఎంచుకునే క్రమంలో రిజల్యూషన్‌ చెక్‌ చేయటం తప్పనిసరి. ఇప్పుడు వస్తున్న ఎక్కువ శాతం ల్యాపీలు 1920X1080 పిక్సల్స్‌తోనే ముస్తాబవుతున్నాయి. అవే సరైన ఎంపిక.

ఆ రెండూ ముఖ్యమే..

పని వేగంగా ముందుకు సాగాలంటే.. ల్యాపీలో ముఖ్యంగా గమనించాల్సినవి కీబోర్డు, ట్రాక్‌ప్యాడ్‌. తక్కువ పరిమాణంలో ఉన్న ల్యాపీల్లో కీబోర్డు, ట్రాక్‌ప్యాడ్‌లను కుదిస్తారు. అదే పెద్దవాటిలో అయితే నెంబర్‌ ప్యాడ్‌తో పాటు కీబోర్డుని పొందొచ్ఛు ఎంపిక చేసుకున్న మోడల్‌లో కీబోర్డులోని మీటలు టైపింగ్‌కి అనువుగా ఉన్నాయో, లేదో చూసుకోవాలి. ముఖ్యంగా మీ పని ఈ-మెయిల్స్‌ చెకింగ్‌, టైపింగ్‌, డాక్యుమెంటేషన్‌లతో ముడిపడి ఉంటే కీబోర్డు ఏ మేరకు ఫ్లెక్సిబుల్‌గా ఉందో చూసుకోండి. ట్రాక్‌ప్యాడ్‌లోని ఫీచర్లను క్షుణ్ణంగా పరిశీలించాలి. దీంతో పెద్దగా మౌస్‌తో పని లేకుండా చక చకా పని పూర్తి చేయొచ్ఛు తర్వాత పోర్టులు ఎన్ని ఉన్నాయో చూడండి. ఎందుకంటే.. ఇంట్లో నుంచే పని చేస్తున్న నేపథ్యంలో ఎక్స్‌టర్నల్‌ హార్డ్‌ డ్రైవ్‌లు, యూఎస్‌బీ డ్రైవ్‌లు, ఎస్‌డీ కార్డులు, వెబ్‌ కెమెరాలు, హెడ్‌సెట్‌లు.. ఇలా మరిన్ని అదనపు డివైజ్‌లను ల్యాపీలకు కనెక్ట్‌ చేయాల్సిన అవసరం ఏర్పడొచ్ఛు.

అవసరానికి తగినట్టుగా..

కొంటే హై ఎండ్‌ ల్యాపీనే కొనాలి అని బడ్జెట్‌ పోగేస్తూ కూర్చోవాల్సిన అవరసం లేదు. మీ పనికి తగిన కాన్ఫిగరేషన్‌ ల్యాపీనే కొనుగోలు చేయొచ్ఛు ఉదాహరణకు ఆఫీస్‌ మెయిల్స్‌ చెక్‌ చేసుకోవడం, నెట్‌ బ్రౌజింగ్‌ చేయడం వరకే మీ పని అయితే.. అందుకు సరిపోయే మోడల్‌ని తీసుకుంటే చాలు. వీడియో ఎడిటింగ్‌, గ్రాఫిక్స్‌, యానిమేషన్‌, సాఫ్ట్‌వేర్‌ డెవలప్‌మెంట్‌... లాంటి పనులైతే కాస్త హై-ఎండ్‌ కాన్ఫిగరేషన్‌ అవసరం అవుతుంది. ఇక్కడ గుర్తుంచుకోవాల్సినవి మీరు చేసే పనేంటి? అందుకు సరిపడే కాన్ఫిగరేషన్‌ ఏంటి?.. అనే రెండు అంశాలు. కావాలంటే.. భవిష్యత్తులో అవసరానికి అనుగుణంగా కాన్ఫిగరేషన్‌ని అప్‌డేట్‌ చేసుకోవచ్ఛు ర్యామ్‌, స్టోరేజ్‌.. ఎప్పుడైనా అప్‌గ్రేడ్‌ చేసుకునే వెసులుబాటు ఉంటుంది. ఇక ఇంటర్నెట్‌ విషయానికొస్తే.. వై-ఫై, వెబ్‌ కెమెరాల సామర్థ్యాల్ని నిశితంగా పరిశీలించాలి. ఎందుకంటే.. ఇప్పుడున్న పరిస్థితుల్లో వెబ్‌ కెమెరా కళ్లే అత్యంత ప్రధానమైనవి. వాటి సామర్థ్యం మేరకే ఉద్యోగి కాన్ఫెరెన్స్‌, విద్యార్థి ఆన్‌లైన్‌ క్లాసుల్లో పాలు పంచుకునేందుకు వీలవుతుంది.

మీ బడ్జెట్‌కి అనుగుణంగా..

మార్కెట్‌లో ఎన్నో మోడళ్లు. బడ్జెట్‌ ఆధారంగా వాటిల్లో ఫీచర్లు. మీ వర్క్‌ ఫ్రమ్‌ హోంకి తగిన మోడల్‌ని ఎంపిక చేసుకోవడంలోనే తగిన జాగ్రత్తలు తీసుకోవాలి. రిటైల్‌గానే కాకుండా ఆన్‌లైన్‌ అంగళ్లలోనూ పరిశీలించి కావాల్సిన ల్యాపీని కొనుగోలు చేయొచ్ఛు ఇప్పుడొస్తున్న పండగ సీజన్‌లో బంపర్‌ ఆఫర్లతో ల్యాపీలు మార్కెట్‌లో సందడి చేస్తున్నాయి. ఆయా మోడళ్లకు ఉన్న రేటింగ్‌, రివ్యూలను నిశితంగా పరిశీలించి కొనుగోలు చేయొచ్ఛు బడ్జెట్‌లో కావాలనుకుంటే రూ.20,000 లోపు ధరతో కొన్ని ఆకట్టుకుంటున్నాయి. ఈ-మెయిల్స్‌ చూడడం.. ఆఫీస్‌ డాక్యుమెంట్స్‌కి.. ఇంటర్నెట్‌ బ్రౌజింగ్‌ అవసరాలకు వాడుకోవచ్ఛు ఐబాల్‌, అవితా.. లాంటి మరికొన్ని కంపెనీలు తక్కువ బడ్జెట్‌లో నోట్‌బుక్స్‌ని అందిస్తున్నాయి. Compbook, Magus Lite మోడళ్లు ఆన్‌లైన్‌ అంగళ్లలో సిద్ధంగా ఉన్నాయి. ల్యాపీగానే కాదు.. అవసరానికి ట్యాబ్‌లా మార్చేసి వాడుకోవచ్ఛు 4జీబీ ర్యామ్‌, విండోస్‌ ఓఎస్‌తో పని చేస్తాయి. కాస్త ఎక్కువ బడ్జెట్‌ అయినా ఓకే అనుకుంటే.. ఆసుస్‌ VivoBook 15 M509DA, లెనొవొ Ideapad S145, ఏసర్‌ OneZ2485.. మోడళ్లు పరిశీలించొచ్ఛు వీటి ధరలు రూ.30,000లోపే ఉన్నాయి. ఇంకొంచెం హై-ఎండ్‌ కాన్ఫిగరేషన్‌తో కావాలంటే.. డెల్‌ Inspiron 3593, ఫ్లిప్‌కార్ట్‌ Falkon Aerbook, లెనొవొ IdeaPad Slim 3i, Mi Notebook 14 మోడళ్లు ఉన్నాయి.