‘ఏఐ’ ఫ్యాషన్‌ డిజైనర్‌ - Artificial intelligence facebook fashion plus plus clothes eenadu eenadu special page

‘ఏఐ’ ఫ్యాషన్‌ డిజైనర్‌

విడ్డూరం

ఎలాంటి దుస్తులు ధరించాలి?.. అనే విషయంపై ఎక్కువ మందికి పెద్దగా అవగాహన ఉండదు. అలాంటప్పుడే ఫ్యాషన్‌ డిజైనర్‌ సాయం తీసుకుంటారు. ఇదేం కొత్త కాదుగానీ.. ఏఐ (ఆర్టిఫిషియల్‌ ఇంటెలిజెన్స్‌) డిజైనర్‌ సపోర్టు తీసుకుంటే? కచ్చితంగా అద్భుతమే. అలాంటి విడ్డూరాన్ని పరిచయం చేసేందుకు ఫేస్‌బుక్‌ సిద్ధం అవుతోంది. కృత్రిమ మేధస్సు సాయం తీసుకుని ధరించే దుస్తుల్ని ఎలా ట్రెండీగా మార్చుకోవచ్చో తెలుసుకోవచ్చు. అందుకు తగిన ఏఐ ఇంజిన్‌ అప్లికేషన్‌ని ఎఫ్‌బీ ‘ఫ్యాషన్‌ ప్లస్‌ప్లస్‌’ పేరుతో రూపొందించింది. దీంట్లోని ప్రత్యేకత ఏంటంటే.. కొత్త వాటితో మిమ్మల్ని ట్రెండీగా చూపించడం కాదు.. ధరించిన వాటితోనే స్టైల్‌గా మార్చుకోవడం ఎలాగో చెబుతుందట. ఎలాగంటే... ఏదైనా శుభకార్యానికి ప్యాంటు, షర్టు వేసుకున్నాక.. టక్‌ చేస్తే ఎలా ఉంటుంది..? షర్టు చేతులు మడతపెడితే ఎలా కనిపిస్తాం..? లాంటి స్టైలింగ్‌ని ప్రయత్నించి చూడొచ్చు. అంతేకాదు.. షర్టుపై ఏ రంగు బ్లేజర్‌ బాగుంటుందో మ్యాచింగ్‌ చేసి చూడొచ్చు. మనుగడలో ఉన్న అన్ని ఫ్యాషన్‌ ట్రెండ్స్‌ని ఏఐ విశ్లేషించి మీ కటౌట్‌కి తగిన డిజైన్స్‌ని సూచిస్తుంది. ఈ తరహా ఏఐ టూల్స్‌ని వాడుకుని ఫ్యాషన్‌ డిజైనర్లు ఉన్నవాటినే క్షణాల్లో మరింత వినూత్నంగా మార్చేయొచ్చు. ఆయా దుస్తుల్లో ఎలా ఉంటారో ముందే చూపించి స్టైలింగ్‌ చేయొచ్చు.