ఫోన్‌ వాడకంలో.. ప్రాథమికం

బేసిక్స్‌

బడ్జెట్‌లోనే స్మార్ట్‌ఫోన్‌లు వచ్చేశాయ్‌.. దీంతో అందరూ మునివేళ్లతో తాకేతెరపై స్మార్ట్‌గా అన్ని పనులూ చేసేస్తున్నారు. మరి, సెక్యూరిటీ పరంగా ఎలాంటి జాగ్రత్తలు తీసుకుంటున్నాం? ఎప్పుడైనా ఆలోచించారా? ప్రాథమిక సూత్రాలు కొన్ని తప్పక పాటించాలి.

అవసరం తీరాక ‘ఆఫ్‌’
ఒకదానితో మరొకటి కనెక్ట్‌ చేసి వాడుతున్న రోజులివి. అందుకు బ్లూటూత్‌ ఎప్పుడూ ఆన్‌లోనే ఉంచాల్సిన పరిస్థితి. ఇలా బ్లూటూత్‌ నిత్యం ఆన్‌ చేసి ఉంచడం ముప్పే. హ్యాకర్లకు మన ఫోన్‌ జాడ ఇట్టే తెలిసిపోతుంది. ప్రైవసీ ముఖ్యం అనుకునేవారు బ్లూటూత్‌ని అనివార్యం అయితే తప్ప ఆన్‌ చేయొద్దు. దీంతో పాటు వైఫైనీ అవసరం లేనప్పుడు ఆఫ్‌ చేయాలి.

రూటింగ్‌ని ఆపండి
ఆండ్రాయిడ్‌ ఫోన్‌ని రూటింగ్‌ చేస్తున్నామంటే ఫోన్‌ మనకు అనుకూలంగా మారుతుంది. దీంతో కొన్ని హార్డ్‌వేర్‌ మార్పుల్నీ చేయొచ్చు. ఈ రూటింగ్‌ విధానంతో ప్రయోజనాలున్నా, మరోపక్క ప్రమాదమూ ఉంది. ఫోన్‌కి ఇచ్చిన వారెంటీని కోల్పోతాం. రూటింగ్‌ ప్రాసెస్‌లో ఏదైనా అవాంతరాలు ఏర్పడితే ఫోన్‌ పని చేయకపోవచ్చు. ఇక హ్యాకర్లు అయితే రూట్‌ చేసిన ఫోన్‌ని సులువుగా హ్యాక్‌ చేసేస్తారు. అందుకే రూటింగ్‌ చేసే ముందు ఒకసారి ఆలోచించండి.

తాళం తప్పనిసరి..
హోమ్‌స్క్రీన్‌కి తాళం తప్పని సరి. మీ వ్యక్తిగత సమాచారం ఇతరులకు తెలియకుండా కాపాడే ప్రాథమిక సెక్యూరిటీ ఇదే. పిన్‌ నంబర్‌ కంటే పేట్రన్‌ లాక్‌ వాడడం ఉత్తమం. పాస్‌వర్డ్‌ అయితే నంబర్లతో పాటు అక్షరాల్ని జత చేయాలి. అన్నింటికీ ఎప్పుడూ ఒకే పాస్‌వర్డ్‌ని వాడొద్దు. వేర్వేరు లాగిన్‌ తాళాలు పెట్టుకోండి. వాడే అన్ని పాస్‌వర్డ్‌లను గుర్తుంచుకునేందుకు ఫోన్‌లో ‘డాష్‌లైన్‌ ఫ్రీ పాస్‌వర్డ్‌ మేనేజర్‌’ యాప్‌ వాడొచ్చు. వాడే అన్ని పాస్‌వర్డ్‌లను గుర్తుంచుకుంటుంది. అలాగే యాప్‌లోని పాస్‌వర్డ్‌ జనరేటర్‌ ఆప్షన్‌తో క్లిష్టమైనవి సెట్‌ చేసి పెట్టుకోవచ్చు.

ఎక్కడబడితే అక్కడ వద్దు...
షాపింగ్‌ మాల్స్‌, కాఫీ షాపులు, ఇతర పబ్లిక్‌ ప్రాంతాల్లో అందుబాటులో ఉన్న ఛార్జింగ్‌ సాకెట్‌లతో ఫోన్‌లను ఛార్జ్‌ చేయకపోవడమే మంచిది. ఎందుకంటే.. ఫోన్‌ ఛార్జ్‌ అయ్యే సమయంలో మన డేటా కూడా బదిలీ అయ్యే అవకాశాలు లేకపోలేదు. సైబర్‌ నేరగాళ్లు అందుకు తగిన సెట్‌అప్‌ని చేస్తున్నారు. ఇదంతా మీ ఫోన్‌లోని సున్నితమైన సమాచారాన్ని సేకరించడానికే. అలాగే పబ్లిక్‌ ప్రాంతాల్లోని ఉచిత ఇంటర్నెట్‌ సేవలతో (అన్‌ట్రస్‌టెడ్‌ నెట్‌వర్క్స్‌) జాగ్రత్త. వాడాల్సి వస్తే వర్చువల్‌ ప్రైవేటు నెట్‌వర్క్‌లను (వీపీఎన్‌) వాడాలి.

అప్‌డేట్‌ ఏదైనా అనివార్యం..
ఫోన్‌కి వచ్చిన అప్‌డేట్‌ని ఒక్కోసారి పట్టించుకోము. నెలలు గడుస్తున్నా వచ్చిన అప్‌డేట్‌ అలాగే వదిలేస్తాం. ఇలా చేయడం ఏ మాత్రం సురక్షితం కాదు. వచ్చిన అప్‌డేట్‌ ఏదైనా సెక్యూరిటీ ప్యాచ్‌ అయ్యుండొచ్చు. అందుకే ఏదైనా ఓఎస్‌ అప్‌డేట్‌ వస్తే వెంటనే స్పందించండి.

డౌన్‌లోడ్‌లో జాగ్రత్త
అధికారిక యాప్‌ స్టోర్‌ల నుంచే ఇన్‌స్టాల్‌ చేయండి. థర్డ్‌పార్టీ సోర్సుల్ని నమ్మొద్దు. లింక్‌ల రూపంలో వచ్చిన ఏపీకే ఫైల్స్‌ని ఇన్‌స్టాల్‌ చేయడం శ్రేయస్కరం కాదు.

Tags :