close

సంపాదకీయం

గాడి తప్పిన ఈసీ!

‘చట్టసభల ప్రతిష్ఠ ఒక్కసారి నేలమట్టమైతే, దేశ ప్రజాస్వామ్యమే పెను ప్రమాదంలో పడుతుంది’- అని ఏనాడో 1951 అక్టోబరులో స్పష్టీకరించిన తొలి ప్రధాని నెహ్రూ- సచ్ఛీల విలువలే పునాదులుగా జనతంత్రం జేగీయమానం కావాలని అభిలషించారు. శీలహీన రాజకీయం గజ్జెకట్టి విలువల క్షయం జోరందుకొన్న కొద్దీ ప్రమాణాల పతనంతో పౌర సమాజాన్ని నిరాశోపహతుల్ని చేస్తున్న పలు రాజ్యాంగ వ్యవస్థల జాబితాలో ఈసీ కూడా చేరిపోతోందిప్పుడు! పదివారాల నాడు ఎన్నికల షెడ్యూలు ప్రకటించినప్పటినుంచే అమలులోకి వచ్చిన ప్రవర్తన నియమావళిని పక్షపాత రహితంగా అమలు చేయడం నిర్వాచన్‌ సదన్‌ రాజ్యాంగబద్ధ విధి. ప్రధాని మోదీ, భాజపా అధ్యక్షుడు అమిత్‌ షాల నియమావళి ఉల్లంఘనల ఆరోపణలపై ఈసీ వారాల తరబడి మీనమేషాలు లెక్కించడం, సుప్రీం విస్పష్ట గడువు నిర్ధారించాకే కడ నిమిషంలో హడావుడిగా వారిరువురికీ ‘క్లీన్‌ చిట్‌’ ఇచ్చేయడం వివాదాస్పదమైంది. త్రిసభ్య ఎన్నికల సంఘంలో సభ్యుడిగా ఉన్న అశోక్‌ లావాసా- ఫిర్యాదుల్ని ఫైసలా చేసే క్రమంలో తన భిన్నాభిప్రాయాన్ని కనీసం నమోదుకూడా చెయ్యడం లేదంటూ ఈసీ భేటీలకు గైర్హాజరు కావడం తాజాగా సంచలనం సృష్టిస్తోంది. ఆయా నిర్ణయాల వెల్లడిలో మైనారిటీ అభిప్రాయానికి చోటు దక్కేలా పారదర్శకత పాటించాలంటూ ఈసీకి ఆయన లిఖితపూర్వకంగా చేసిన విజ్ఞప్తికీ మన్నన దక్కలేదు. ఆ విషయం కాస్తా బయటకు పొక్కేసరికి, అది నిర్వాచన్‌ సదన్‌ అంతర్గత వ్యవహారమంటూ, సాధారణంగా అలాంటి భిన్నాభిప్రాయాల సంగతులు తరవాత ఎప్పుడో ‘మాజీలు’ రాసే పుస్తకాల్లో కనిపిస్తాయంటూ ఎన్నికల ప్రధాన కమిషనర్‌ అరోడా కార్యాలయం ఇచ్చిన ప్రత్యుత్తరం- సకల నిర్ణయాల్లో పారదర్శకత, జవాబుదారీతనాల ఆవశ్యకతనే తోసిపుచ్చుతోందిప్పుడు! ‘సుప్రీం’ రాజ్యాంగ ధర్మాసనం న్యాయ నిర్ణయాల్లోనే మైనారిటీ తీర్పుల్ని విడిగా విపులంగా ప్రస్తావిస్తున్నప్పుడు, ఈసీకి భిన్న ప్రమాణాలు ఎందుకుండాలన్నదే సగటు పౌరుల సూటి ప్రశ్న! 
నిర్వాచన్‌ సదన్‌ కామందుగా చండ‘శేషన్‌’ ఒంటెత్తు పోకడలు శ్రుతిమించిన నేపథ్యంలో నాటి పీవీ ప్రభుత్వం త్రిసభ్య ఎన్నికల సంఘానికి ఆవాహన పలికింది. 1995 జులైలో ఆ ఏర్పాటుకు ‘తథాస్తు’ పలికిన సుప్రీంకోర్టు- విశృంఖల అధికారాలు ఒకే వ్యక్తి చేతిలో కేంద్రీకృతం కావడం శ్రేయస్కరం కాదంటూ, త్రిసభ్య సంఘంలో అందరికీ సమాన ప్రతిపత్తి ఉంటుందని స్పష్టీకరించింది. ఏకాభిప్రాయంతో నిర్ణయం తీసుకోవడం సాధ్యపడని పక్షంలో మెజారిటీ మనోగతమే చెల్లుబాటు అవుతుందనీ న్యాయపాలిక వెల్లడించింది. కేంద్ర ఎన్నికల సంఘం కమిషనర్‌గా అశోక్‌ లావాసా నేడు ప్రశ్నిస్తున్నది మెజారిటీ నిర్ణయాన్ని కాదు; తన మైనారిటీ భిన్నాభిప్రాయానికి తుది ఆదేశాల్లో చోటు దక్కక పోవడాన్ని! ‘అసమ్మతిని ప్రస్తావించకపోతే దానికి అసలు విలువేముంది? ఏ ఆదేశంలోనైనా, ప్రత్యుత్తరంలోనైనా అసమ్మతి స్వరాన్ని ప్రస్తావించి తీరాలి’ అన్న ఎన్నికల సంఘం మాజీ ప్రధాన కమిషనర్‌ బీపీ రావత్‌- ఇప్పటిదాకా ఈసీ ఆ పని చేస్తూనే ఉందని వెల్లడించారు. అసమ్మతినీ నమోదు చెయ్యడం ఆనవాయితీ అయినప్పుడు, పదిహేడో సార్వత్రిక ఎన్నికల్లో దాన్ని ఎందుకు తప్పుతున్నట్లు? ఇంటి పోరు ఇలా వీధులకెక్కినప్పుడు- దేశవ్యాప్తంగా చెదురుమదురు ఘటనలు తప్ప ఎన్నికలు ప్రశాంతంగా, స్వేచ్ఛగా, సక్రమంగా, ‘పారదర్శకంగా’నూ జరిగాయని సీఈసీ అరోడా ఎలా చెప్పగలరు? ‘తొలిసారి ఓటర్లు తమ మొదటి ఓటును బాలాకోట్‌ వైమానిక దాడిలో పాల్గొన్న వీర జవాన్లకు, పుల్వామా అమరవీరులకు అంకితం ఇవ్వగలరా?’ అని ప్రశ్నించిన ప్రధాని మోదీ, కేరళలోని వాయనాడ్‌నుంచి రాహుల్‌గాంధీ పోటీ చేయడం మీదా మతపరమైన ఘాటు విమర్శలు రువ్వారు. ‘అణ్వాయుధ మీట మాకూ ఉంది... దాన్ని మేమేమైనా దీపావళికోసం దాచిపెట్టుకొన్నామా?’ అన్న వ్యాఖ్య నుంచి మాజీ ప్రధాని రాజీవ్‌ను ‘భ్రష్టాచారీ నెంబర్‌ 1’గా తూష్ణీకరించడం దాకా మోదీ ప్రవర్తన నియమావళి ఉల్లంఘనలు స్థూల దృష్టికి గోచరిస్తున్నా- గాడితప్పిన ఈసీ వ్యవహార సరళి రాజ్యాంగ వ్యవస్థ విశ్వసనీయతనే ఖర్చు రాసేస్తోంది! 
‘విస్పష్ట చట్టాలు లేనప్పుడు ఏదైనా అవాంతరాన్ని అధిగమించాల్సి వస్తే- చేతులు జోడించి దేవుడినో ఇతర వ్యవస్థల్నో సమధిక అధికారాలు ప్రసాదించమని సీఈసీ కోరకూడదు... ఎన్నికల ప్రక్రియను సక్రమంగా స్వేచ్ఛగా పరిపూర్తి చేసేందుకు స్వీయ అధికారాలను స్వతంత్రంగా చట్టబద్ధతతో వినియోగించాలి’- ఏనాడో 1977లో సుప్రీం న్యాయపాలిక ఇచ్చిన తీర్పు అది. ప్రధాని మోదీ, అమిత్‌ షాల ప్రవర్తన నియమావళి ఉల్లంఘనలపై ఈసీ నిర్ణయరాహిత్యాన్ని కాంగ్రెస్‌ సుప్రీంకోర్టులో సవాలు చేసినప్పుడు- నిర్వాచన్‌ సదన్‌ వ్యక్తీకరించిన బేలదనం నిశ్చేష్టపరచింది. ప్రవర్తన నియమావళికి చట్టబద్ధత లేదు కాబట్టి, తమ చేతులు కట్టేసినట్లయిందన్నట్లుగా ఈసీ చేసిన వాదనను సుప్రీంకోర్టే తోసిపుచ్చింది! రాజ్యాంగంలోని 324 అధికరణ ఈసీ చేతిలో పాశుపతాస్త్రంలాంటిది. 1987నాటి మహారాష్ట్ర ఉపఎన్నికల్లో విద్వేష ప్రచారం సాగించారన్న కేసులో బాంబే హైకోర్టు తీర్పు నేపథ్యంలో బాల్‌ థాకరే ఓటు హక్కును సైతం ఆరేళ్లపాటు ఈసీ రద్దు చేసింది. 2014లో నియమావళిని ఉల్లంఘించారంటూ అమిత్‌ షా, బాబా రామ్‌దేవ్‌, ఆజంఖాన్‌ల ప్రచారంపై ఈసీ వేటు వేసింది. దీన్నిబట్టి చూస్తే సారథ్య స్థానాల్లోని వ్యక్తుల్ని బట్టి ఈసీ వరస మారుతోందన్న దాఖలాలు తేటపడుతున్నాయి. స్వేచ్ఛగా సక్రమంగా ఎన్నికల నిర్వహణకు గొడ్డలిపెట్టులాంటి ఈ పెడపోకడల్ని మరేమాత్రం ఉపేక్షించకూడదు. నిర్వాచన్‌ సదన్‌ నియామక ప్రక్రియనూ రాజకీయ బంధనాలనుంచి విముక్తం చేసి, దాని పనిపోకడల్లో పారదర్శకత పెంచి పార్లమెంటుకు జవాబుదారీ చెయ్యడమే ప్రస్తుత అవ్యవస్థకు విరుగుడు!

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.