close

సంపాదకీయం

Facebook Share Twitter Share WhatsApp Share Telegram Share
గోవు మా లచ్చిమి!

ఏ గోవు పాలను, దాన్నుంచి వచ్చే పెరుగును, నేతిని కేవలం యజ్ఞ కార్యాలకై వినియోగిస్తారో- ఆ గోవును హోమధేనువు అంటారు. దేవతల హోమధేనువు పేరు సురభి. వసిష్ఠ మహర్షిది- శబల. హరివంశంలో ఎర్రాప్రగడ దాన్నే నందినిగా పేర్కొన్నాడు. హోమధేనువులు మునుల పాలిట కామధేనువులు. విశ్వామిత్రుడు బ్రహ్మర్షి కాక ముందు కౌశికుడనే పేరుతో రాజ్యపాలన నిర్వహించే రోజుల్లో పెద్ద సైన్యంతో సహా వసిష్ఠుల ఆశ్రమానికి వెళ్ళాడు. అతిథికి అన్నం పెట్టడం యజ్ఞంతో సమానం. కాబట్టి విశ్వామిత్రుడికి ఆతిథ్యం ఇవ్వాలని వసిష్ఠులు సంకల్పించారు. ‘ఈ నీవు అతిథి శ్రేష్ఠుడవు నీకును నీదు సేనకు ఏను ఆతిథ్యశ్రీ నెరపుదును’ అన్నారు. విశ్వామిత్రుడు సందేహించాడు. ‘ఎచ్చటి సైన్యము! ఒక్కడును ఇద్దరునా! ఎంతమంది! నీవిచ్చిన కందమూలములె ఎంతకునైనను చాలవు’ అని నసిగాడు. బదులుగా వసిష్ఠులు ‘నవ్వారు’ అన్నారు కల్పవృక్షంలో విశ్వనాథ. నవ్వుతూనే ఆయన శబలను పిలిచారు. ‘లేహ్య చోష్య పానీయ పాళియు రసాన్నసమితి సత్కార సంతతి సంతరింపుమమ్మ! వానికి, వాని సైన్యంబునకు తృప్తి సంఘటిల్ల’ అని ఆదేశించారు. అంతే! కామధేనువు మహిమతో క్షణాల్లో షడ్రసోపేతమైన విందు సిద్ధమైంది. ఎంత గొప్పగా అంటే- విశ్వామిత్రుడికి కన్ను కుట్టేంతగా... తిన్న ఇంటికి ఎసరు పెట్టేంతగా... శబలను అపహరించేంతగా... ఎన్నో భక్ష్యాలను సమకూర్చింది శబల. రాముడి పూర్వీకుడైన దిలీపుడు ‘గోసేవా వ్రతం’ ఆచరించి సంతానాన్ని పొందాడని రఘువంశంలో కాళిదాసు వర్ణించాడు. ‘సారములగు గోవులు మత్‌ఘోర సకల కల్మషముల ద్రుంచును... శాశ్వత సారోదార పదమిచ్చి సౌఖ్యము చేర్చున్‌’ అని భారతం ఆనుశాసనిక పర్వంలో భీష్ముడు ధర్మరాజుతో చెప్పాడు. ‘గోవుల పాలు అమృతంబని దేవేంద్రుడు సెప్పె’ అని వెల్లడించాడు.

వేదాల్లో ‘గోసూక్తం’ సుప్రసిద్ధమైనది. తన యజమానికి ఏదైనా రోగం వస్తే, ముందు పాడి ఆవు దాన్ని గుర్తిస్తుందట. అడవికి పోయి ఆ రోగానికి విరుగుడుగా ఓషధులను, మూలికలను మేసి వచ్చి, ఆ సారాన్ని పాల రూపంలో ఇచ్చి, రోగ నివారణ చేస్తుందని గోసూక్తం వివరించింది. ‘ఆవు పాలు అమృతంతో సమానం’ అని భారతం చెప్పిన మాటకు అర్థం అది! రోగం వచ్చిందని, తగ్గిందని... రెండూ యజమానికి తెలియకపోవడం మరీ విశేషం. వేదాలను విశ్వసించేవారికి, రామాయణ, భారతాలను అధ్యయనం చేసినవారికీ అందుకే గోవుల పట్ల ఎంతో గురి కుదురుతుంది. సురధేనువే కాదు, సొంత ఆవు కూడా వారి దృష్టిలో ‘గోవు మా లచ్చిమి’ గానే లెక్క. పశుసంపదను సొమ్ములనడం ఆ పాదులోదే! దర్భలు, అగ్ని, ఆవులు... ఈ దేశంలో పవిత్రతకు ప్రతీకలు. ‘నానా సహస్ర సంఖ్యానంబులై సంతత ఆనంద విగత భయత్వ లీల...’ వేలాది గోవులు విలాసంగా గడ్డి మేస్తున్న దృశ్యం దుర్యోధనాదులకు సైతం కనువిందు చేసిందని భారతంలోని ఘోషయాత్ర ఘట్టం చెబుతోంది. గోధూళి వేళ మందలు మందలుగా గోవులు ఇళ్లకు తిరిగొచ్చే దృశ్యం పల్లెల్లో ఇప్పటికీ ఎంతో చూడముచ్చటగా ఉంటుంది. పోతన వంటి కవులకైతే... ఆ దుమ్ము గోపబాలకుల చిరుచెమటలకు అతుక్కుని ప్రతి బాలుడూ గోపాలుడై ‘తనువున అంటిన ధరణీ పరాగంబు(ధూళి) పూసిన నెరిభూతి పూత కాగ! శివుని పగిది...’ దర్శనమిస్తాడు. గోధూళిని విభూతిగా భావన చేయడం పోతన ఈ జాతికి నేర్పిన విద్య. ఛత్తీస్‌గఢ్‌ రాష్ట్రప్రభుత్వం మరో అడుగు ముందుకు వేసింది. ‘గోధన్‌న్యాయ్‌యోజన్‌’ పేరిట ఆవుపేడను కిలో రెండు రూపాయలకు కొనుగోలు చేసి ‘వర్మి కంపోస్టు’ తయారు చేసి, దాంతో సేంద్రియ వ్యవసాయాన్ని ప్రోత్సహించే దిశగా కదులుతోంది. దీంతో ఇప్పుడు ఆ రాష్ట్రంలో గోవు ఇంటింటి కామధేనువుగా అవతరిస్తోంది.

జిల్లా వార్తలు

మరిన్ని

దేవ‌తార్చ‌న

రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.