close

ప్ర‌త్యేక క‌థ‌నం

చిన్నబోతున్న పెద్ద పార్టీలు 

జాతీయ స్థాయిలో తగ్గిపోతున్న ఓట్ల వాటా 
మంది ఎక్కువ... మెజారిటీ పలుచన 
చీలిపోతున్న ఓటు

ఈనాడు, దిల్లీ: సార్వత్రిక ఎన్నికల్లో జాతీయ పార్టీల ప్రభ క్రమంగా తగ్గుతోంది. దేశ జనాభాతో పోల్చుకుంటే ఎన్నికల్లో వాటికి దక్కే ఓట్ల శాతం అత్తెసరుగా ఉంటోంది. ప్రక్రియలో సంక్లిష్టతలు, నమోదులో తాత్సారం కారణంగా వయోజనుల్లో చాలామంది పేర్లు ఓటర్ల జాబితాలో ఉండడం లేదు. నమోదు చేసుకున్న వారు ఓటింగ్‌లో ఆసక్తిగా పాల్గొనడం లేదు. ఫలితంగా జనాభాకు-ఓటర్ల సంఖ్యకు, పోలింగ్‌ శాతానికి మధ్య చాలా వ్యత్యాసం ఉంటోంది. దీనికి తోడు దేశంలో ప్రాంతీయ పార్టీల ప్రాబల్యం, ఎన్నికల ప్రక్రియలో పాల్గొనే అభ్యర్థుల సంఖ్య నానాటికీ పెరుగుతుండటంవల్ల ఓట్లు ఎక్కడికక్కడ చీలిపోయి జాతీయ పార్టీల వాటా నానాటికీ తగ్గిపోతోంది. 
ముఖాముఖి నుంచి బహుముఖానికి 
70వ దశకం వరకు దేశాన్ని ఏలిన జాతీయ పార్టీకి... పోలైన ఓట్లలో 40% వరకు ఓట్లు దక్కాయి. 80, 90 దశకాల్లో అది 30%కి పడిపోయింది. ఆ తర్వాత అది 20%కి చేరింది. దేశంలో ప్రాంతం, కులం, మతం ప్రాతిపదికన ప్రాంతీయ, ఉప ప్రాంతీయ పార్టీలు ఆవిర్భవించడం కూడా ఓట్ల చీలికకు దారి తీస్తోంది. 
1951-52లో జరిగిన తొలి సార్వత్రిక ఎన్నికల్లో ఒక్కో పార్లమెంటు స్థానానికి సగటున 4.67 మంది పోటీ చేయగా 2014 నాటికి ఆ సంఖ్య 15.19కి పెరిగింది. 1996లో అత్యధికంగా సగటున ఒక్కో సీటులో 25.69 మంది పోటీ చేశారు. 
తొలినాళ్లలో కాంగ్రెస్‌-కమ్యూనిస్టుల మధ్యే నడిచిన సార్వత్రిక ఎన్నికల పోరు తదనంతర కాలంలో కాంగ్రెస్‌, కమ్యూనిస్టు, జనతా పార్టీల మధ్యకు మారింది. అనంతరం కాంగ్రెస్‌, కమ్యూనిస్టు, భారతీయ జనతా పార్టీ, ప్రాంతీయ పార్టీల మధ్యకు విస్తరించింది. అప్పటివరకు ప్రాంతీయ పార్టీల్లో డీఎంకె, ఏఐఎడీఎంకె, శిరోమణి ఆకాలీదళ్‌ మాత్రమే బలంగా ఉండేవి. 
తెదేపా ఆవిర్భావంతో పెరిగిన ప్రాబల్యం 
1982లో తెలుగుదేశం పార్టీ పుట్టిన తర్వాత ప్రాంతీయ పార్టీల ప్రాబల్యం పెరుగుతూ వచ్చింది. ఆ క్రమంలోనే అసోంలో గణ పరిషత్‌, హరియాణాలో ఐఎన్‌ఎల్‌డీలు పుట్టుకొచ్చాయి. జాతీయ పార్టీల్లో జనతాదళ్‌ విచ్ఛిన్నం కావడంతో అందులోని బలమైన నాయకులు లాలు ప్రసాద్‌, ములాయం సింగ్‌, బిజూ పట్నాయక్‌, దేవేగౌడ, జార్జి ఫెర్నాండెజ్‌, శరద్‌యాదవ్‌, నీతీశ్‌ కుమార్‌, రాంవిలాస్‌ పాసవాన్‌ లాంటి నేతలు తమతమ రాష్ట్రాల్లో బలమైన ప్రాంతీయ పార్టీలకు పునాదులు వేసుకున్నారు. మనువాదానికి వ్యతిరేకంగా 1984లో కాన్షీరాం బీఎస్పీని నెలకొల్పి, రాజకీయంగా అణగారిన వర్గాలకు సరికొత్త వేదిక కల్పించే ప్రయత్నం మొదలుపెట్టారు. ప్రాంతీయ ఆకాంక్షలను నెరవేర్చడానికి ఝార్ఖండ్‌ ముక్తి మోర్చా, ఝార్ఖండ్‌ వికాస్‌ మోర్చా, ఎంఐఎం, నేషనల్‌ కాన్ఫరెన్స్‌, పీడీపీ, తెరాస లాంటి పార్టీలు వచ్చాయి. కాంగ్రెస్‌ నాయకత్వంతో విభేదించి మమతా బెనర్జీ తృణమూల్‌ కాంగ్రెస్‌, శరద్‌ పవార్‌ ఎన్‌సీపీ, వై.ఎస్‌.జగన్‌మోహన్‌రెడ్డి వైసీపీలను ఏర్పాటు చేశారు. అఖిల భారత సర్వీసు (ఐఆర్‌ఎస్‌) ఉద్యోగాన్ని వదిలి అరవింద్‌ కేజ్రీవాల్‌ ఆమ్‌ ఆద్మీ పార్టీ (ఆప్‌)ని నెలకొల్పారు. 
ఓటు చీలిపోతోంది 
ప్రాంతీయ, ఉప ప్రాంతీయ పార్టీల ప్రాబల్యం, స్వతంత్ర అభ్యర్థుల సంఖ్య పెరిగిపోవడంవల్ల ఉన్న ఓటునే అందరూ పంచుకోవాల్సిన పరిస్థితి నెలకొంది. ఫలితంగా జాతీయ స్థాయిలో దిల్లీని ఏలాలనుకొనే పార్టీలకు ఓట్లు తగ్గిపోతున్నాయి. 120 కోట్ల జనాభా ఉన్న దేశంలో 2014 ఎన్నికల్లో భాజపాకు దక్కిన ఓట్లు 17 కోట్లు మాత్రమే. జనాభాను బట్టి కాకుండా ఓటు వేసే అర్హత ఉన్నవారి ప్రకారం చూసినా... ఆ ఎన్నికలనాటికున్న 83 కోట్ల మంది ఓటర్లలో భాజపాకు ఓటేసినవారి సంఖ్య 20.58 శాతమే. మొత్తం ఓటర్లలో కాకుండా ఓటు వేసినవారిలో ఓ జాతీయ పార్టీకి 30% పైగా దక్కడం 1991 ఎన్నికల తర్వాత ఇదే తొలిసారి. 30 ఏళ్ల తర్వాత ఓట్ల సునామీ సృష్టించి కేంద్రంలో మోదీ అధికారం చేపట్టినట్లు చెబుతున్నా వాస్తవంగా ప్రజాదరణ మాత్రం ప్రచారం జరిగినంత స్థాయిలో దక్కలేదు. 
ప్రాంతీయ అండతోనే జాతీయ పార్టీల పోటీ 
దేశంలో ఇందిరాగాంధీ అనంతరం ప్రాంతీయ పార్టీల ప్రాబల్యం తగ్గిపోతూ వస్తోంది. ముఖ్యంగా ఆంధ్రప్రదేశ్‌, తెలంగాణ, తమిళనాడు, కర్ణాటక, మహారాష్ట్ర, గోవా, ఒడిశా, పశ్చిమ బెంగాల్‌, బిహార్‌, యూపీ, ఝార్ఖండ్‌, పంజాబ్‌, హరియాణా, పుదుచ్చేరి, దిల్లీ, జమ్ము కశ్మీర్‌తోపాటు 7 ఈశాన్య రాష్ట్రాల్లో ప్రాంతీయ పార్టీల అండ లేకుండా జాతీయ పార్టీలు పోటీ చేయలేని పరిస్థితి నెలకొంది. కేవలం గుజరాత్‌, ఛత్తీస్‌గఢ్‌, మధ్యప్రదేశ్‌, రాజస్థాన్‌, ఉత్తరాఖండ్‌, హిమాచల్‌ప్రదేశ్‌లలో జాతీయ పార్టీల మధ్య ముఖాముఖి పోరు నడుస్తోంది. మిగిలిన చోట్ల బహుముఖమే. 1984లో ఇందిరాగాంధీ హత్యానంతరం కన్నా (11.54 కోట్లు), 1989లో (11.88 కోట్లు) కాంగ్రెస్‌ పార్టీకి ఎక్కువ ఓట్లు వచ్చినప్పటికీ సీట్లు మాత్రం 207 తగ్గిపోయాయి. దీనికి కారణం 1989 నాటికల్లా దేశవ్యాప్తంగా బహుముఖ పోటీ పెరిగి, ఓట్లు చీలిపోవడమే. దాంతో కాంగ్రెస్‌ అధికారానికి దూరమైంది. 
గరిష్ఠ సగటు అభ్యర్థులు 25 మంది! 
1984 నుంచి ఎన్నికల్లో పోటీ చేసేవారి సగటు సంఖ్య రెండంకెలకు పెరిగిపోయింది. అప్పటివరకు ఒక్కో సీటులో పోటీ చేసే అభ్యర్థుల సగటు సంఖ్య కనిష్ఠంగా 3.77, గరిష్ఠంగా 8.75 ఉండగా, 1984 నుంచి అది కనిష్ఠంగా 8.56, గరిష్ఠంగా 25.69కి పెరిగిపోయింది. దిల్లీ గద్దెనెక్కిన ప్రభుత్వాలు ప్రాంతీయ, సామాజిక వర్గాల ఆకాంక్షలు, సమస్యలను పట్టించుకోకపోవడం అనేక పరిణామాలకు దారితీసింది. 1951 ఎన్నికల్లో 745 మంది అభ్యర్థులు ధరావతులు కోల్పోగా 2014నాటికి ఆ సంఖ్య ఏడు వేలకు చేరింది. దీన్నిబట్టి సార్వత్రిక ఎన్నికల్లో పెరుగుతున్న అభ్యర్థుల సంఖ్య, పోటీ నానాటికీ ఏ స్థాయిలో ఉందో ఊహించుకోవచ్చు.

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.