close

ప్ర‌త్యేక క‌థ‌నం

గోదావర్రీ

నీటిలో ప్రమాదకర బ్యాక్టీరియా, ఈకొలి
  పంటకాలువల్లోకి వ్యర్థాలు
  అక్వా విస్తరణతో క్రిమిసంహారక అవశేషాలు
  రక్షిత నీటి సరఫరా ప్రశ్నార్థకం
  300 కి.మీ. పంట కాలువల దుస్థితిపై ఈనాడు-ఈటీవీ బృందం క్షేత్ర పరిశీలన

కాటన్‌ మహాశయుని మహాక్రతువుతో పల్లెపల్లెనా గోదారి కాలువల్లో నీళ్లు ప్రవహించి పంట పొలాలను సస్యశ్యామలం చేశాయి. ఉభయగోదావరి జిల్లాల సామాజిక, ఆర్థిక, రాజకీయ, సాంస్కృతిక ముఖచిత్రాన్ని మార్చివేశాయి. అలాంటి గోదారమ్మను, పంట కాలువలను పవిత్రంగా కాపాడుకుంటున్నామా..? కచ్చితంగా లేదనే చెప్పాలి. తీవ్ర జలకాలుష్యం కోరల్లో గోదారి చిక్కుకుపోయింది. సురక్షిత నీరు గగనమైంది. ఒకప్పుడు పంట కాలువల్లోనే దోసెడు నీళ్లు తీసుకుని నేరుగా తాగేవాళ్లం. గత 3, 4 దశాబ్దాల్లో ఈ దృశ్యం మారిపోయింది. ప్రస్తుత వేసవిని దృష్టిలో ఉంచుకుని గోదావరి పంట కాలువలకు నీటి సరఫరాను నిలిపివేసిన సమయం కావడంతో ‘ఈనాడు-ఈటీవీ’ ప్రతినిధులు ఈ కాలువలను పరిశీలించారు. ఉభయగోదావరి జిల్లాల్లో తూర్పు, మధ్య పశ్చిమ ప్రధాన కాలువల పరిధిలోని కాలువ గర్భాల్లో దాగున్న నిజాలను వెలికి తీసే ప్రయత్నం చేస్తే గోదావరి కాలకూట విషంతో నిండిపోయిన వాస్తవం బయటపడింది. ఈ పరిస్థితిపై ప్రత్యేక కథనం

పవిత్ర గోదావరి కాలుష్య కాసారంలా మారిపోతోంది. పట్టణాలు, పల్లెల నుంచి వచ్చే మురుగును, వివిధ పరిశ్రమల వ్యర్థాలను శుద్ధి చేయకుండానే విచ్చలవిడిగా నదిలోకి వదిలేస్తున్నారు. పంటకాలువలు మురికికూపాల్లా మారిపోతున్నాయి. బ్యాక్టీరియా, ఇతర సూక్ష్మజీవులతో కూడుకున్న గోదావరి నీరు పంట కాలువల్లోకి ప్రవహిస్తోంది. ఆక్వా విస్తరణతో  క్రిమిసంహారక మందుల అవశేషాలు ఈ నీళ్లలో చేరిపోతున్నాయి. నీటి పథకాలు, వాటి నిర్వహణకు ఏటా రూ.కోట్లు ఖర్చు చేస్తున్నా ప్రజానీకానికి రక్షిత నీటిపై భరోసా లభించడం లేదు.  ఉభయగోదావరి జిల్లాల్లో  పంట కాలువలు 3000 కి.మీ. మేర ఉన్నాయి. దాదాపు 300 కి.మీ. పరిధిలో వీటి దుస్థితిని ఈనాడు-ఈటీవీ బృందం పరిశీలించగా ఆందోళనకరమైన విషయాలు వెలుగుచూశాయి.

నేరుగా వ్యర్థాలు నదిలోకే

రాజమహేంద్రవరంలో నల్లా ఛానల్‌ నుంచి నగర మురుగునీటిని గోదారిలో కలిపేస్తున్నారు. కొన్ని పరిశ్రమల వ్యర్థాలు, శ్మశానవాటికల్లో మృతదేహాలు దహనం చేసిన తర్వాత మిగిలిన బూడిద కూడా కలుస్తోంది. కోటిలింగాల ఘాట్‌ వద్ద పడవల రేవు సమీపంలో, వెంకటనగరం వద్ద పరిశ్రమల నుంచి వచ్చే కాలుష్య నీటినివదిలేస్తున్నారు.

డంపింగ్‌ యార్డులా?

రెండు జిల్లాల్లోని పంట కాలువల్లో అడుగడుగునా చెత్తాచెదారం, డ్రైనేజి, జీవుల కళేబరాలు, మాంసం వ్యాపారులు వదిలేసినవి, ఆస్పత్రులు, చిన్న, పెద్ద పరిశ్రమల నుంచి విడుదలవుతున్న వ్యర్థాలు దర్శనమిస్తున్నాయి. చెత్తాచెదారాన్ని కాలువ గట్టున పోసేస్తున్నారు.కాలువ గట్టులు డంపింగ్‌ యార్డుల్లా మారిపోయాయి. 

మున్సిపాలిటీలే నేరుగా...

తాడేపల్లిగూడెంలో ఏలూరు కాలువలోకి మురుగునీటిని పైపులైనుల ద్వారా వదిలేస్తున్నారు. పాలకొల్లు, నిడదవోలు, సామర్లకోట వద్ద ఇదే పరిస్థితి.  హుస్సేన్‌పురం వద్ద పరిశ్రమల వ్యర్థాలు కాలువల్లో కలిపేస్తున్నారు. ఈ విషయంలో మున్సిపాలిటీలకు నోటీసులు జారీ చేసినట్లు జలవనరులశాఖ సూపరింటెండెంట్‌ ఇంజినీరు కృష్ణారావు చెప్పారు.

ఆక్వా కాలుష్యం

కొన్ని చోట్ల చేపల చెరువుల పేరుతో అనుమతులు తెచ్చుకుని రొయ్యల చెరువులు సాగు చేస్తున్నారు. డెల్టా ఎగువ మండలాల్లో తీపి, ఉప్పు నీటి సమ్మేళనం కోసం భూగర్భంలో చాలా లోతుగా తవ్వుతున్నారు.  అధికోత్పత్తికి తీవ్రస్థాయిలో మందులు వాడుతున్నారు. సాగు తర్వాత ఆ నీటిని పక్కనే పంట కాలువల్లోకి వదిలేస్తున్నారు. 

ఏదీ రక్షిత నీరు?

మూడు డెల్టా ప్రాంతాల్లో దాదాపు 40 లక్షల మందికి పైగా పంట కాలువల నీటినే వినియోగిస్తున్నారు. రక్షిత నీటి పథకాలకు, వాటి నిర్వహణకు రెండు జిల్లాలపైనా దాదాపు రూ.150కోట్ల వరకు నీటి సరఫరాపైనే ఖర్చవుతోంది. అయినా ప్రజలకు రక్షిత నీటిపై భరోసా లభించడం లేదు. 

నీటి కొనుగోలుకు రూ.300 కోట్లకుపైగానే ఖర్చు

ఈ జిల్లాల్లో దాదాపు 3000 వరకు ఆర్‌.ఒ. ప్లాంట్లు ఉన్నాయి. సగటున ప్రతి ప్లాంటు రోజుకు 150 క్యాన్లు విక్రయిస్తోంది. ఒకో క్యాను 20 లీటర్ల వరకు ఉంటుంది. లీటరు రూపాయి వరకు అమ్ముతున్నారు. ఈ లెక్కన రెండు జిల్లాల్లో రోజుకు రూ.90లక్షలు... నెలకు రూ.27 కోట్లు... ఏడాదికి 324 కోట్లు ఖర్చు చేస్తున్నారని గ్రామీణ నీటి సరఫరా విభాగంలో పనిచేసే ఇంజినీర్లే కొందరు అంచనా వేసి చెబుతున్నారు.

రక్షితనీటిలోనూ బ్యాక్టీరియా... ఈకోలి

పశ్చిమగోదావరి డెల్టా ప్రాంతంలోని వెంకయ్య వయ్యేరు, కాకరపర్రు బ్యాంకు కాలువ, నర్సాపురం కాలువ, అత్తిలి కాలువ, ఏలూరు కాలువల పరిధిలో భీమవరం ఎస్‌ఆర్‌కేఆర్‌ ఇంజినీరింగు కళాశాల ప్రొఫెసర్‌ పి.ఎ.రామకృష్ణంరాజు ఆధ్వర్యంలో వెట్‌ సెంటర్‌ వారు నీటి కాలుష్యంపై పరిశోధనలు సాగించారు.  వీరి అధ్యయనంలో వెంకయ్య వయ్యేరు కాలువలో కాలుష్యం తీవ్రస్థాయిలో ఉందని గుర్తించారు. నర్సాపురం, గోస్తనీ, కాకరపర్రు, అత్తిలి కాలువల్లోనూ ఎక్కువగానే ఉంది.  పంచాయతీలు సరఫరా చేస్తున్న రక్షిత తాగునీటిలో వ్యాధులకు కారణమైన ఈకోలి కనిపిస్తోందని వీరి పరిశీలనలో తేలింది. పశ్చిమగోదావరి జిల్లాలో 23 చోట్ల మైక్రో బయలాజికల్‌ పరీక్షలు జరిపితే 22 చోట్ల బ్యాక్టీరియా ఉన్నట్లు తేలిందంటే పరిస్థితి ఎలా ఉందో అర్థం చేసుకోవచ్చు. టీడీఎస్‌ కూడా (టోటల్‌ డిజాల్వుడు సాలిడ్స్‌) కొన్ని రక్షిత నీళ్లలో పరిమితి కన్నా తక్కువ ఉండగా మరికొన్ని చోట్ల పరిమితికి చాలా మించిపోయి కనిపిస్తోందని పరీక్షల్లో తేలింది.నీటిని నాణ్యంగా అందించేందుకు బ్లీచింగు, క్లోరిన్‌ కలుపుతున్నారు. రెసిడ్యుయల్‌ క్లోరిన్‌ 0.2పీపీఎం మాత్రమే ఉండాలి. చాలా చోట్ల పరిమితికి అనేక రెట్లు మించిపోయింది. 

భవిష్యత్తు ప్రమాదకరమే

చక్కని వనరులను మనం దుర్వినియోగం చేస్తున్నామని ఎస్‌ఆర్‌కేఆర్‌ ఇంజినీరింగు కళాశాల ప్రొఫెసర్‌ పి.ఎ.రామకృష్ణంరాజు పేర్కొన్నారు.  డెల్టా అంతా ఉప్పునీటి కయ్యలుగా మారిపోయి కాలుష్యం పెరిగిపోతోందని చెప్పారు. మేల్కోకపోతే భవిష్యత్తు ప్రమాదకరమేనని హెచ్చరించారు. రీసెర్చి సైంటిస్టు నంద్యాల శివకిషన్‌ మాట్లాడుతూ ఉభయగోదావరి జిల్లాల్లో పట్టణీకరణకు అనుగుణంగా అంతర్గత డ్రైనేజి వ్యవస్థ అభివృద్ధి చేయడం లేదని చెప్పారు. మురుగునీరు శుద్ధి చేయకుండానే కాలువల్లో కలిపేస్తున్నారని చెప్పారు. అసిస్టెంట్‌ ప్రొఫెసర్‌ డాక్టర్‌ జి.సూరిబాబు మాట్లాడుతూ గ్రామీణ ప్రాంతాల్లో 90శాతం చోట్ల రక్షిత నీటిలోను ఇప్పటికీ బ్యాక్టీరియా కనిపిస్తోందని చెప్పారు. ఇక్కడ ఈకోలి వివిధ చోట్ల గుర్తించామని వెల్లడించారు.


 

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.