close

ప్ర‌త్యేక క‌థ‌నం

నదులూ, జల వనరుల్లో ఔషధ అవశేషాలు

ఔషధం.. జలం.. మహా గరళం..! 
మొండి క్రిములకు నదుల్లో  ఫార్మా వ్యర్థాలూ కారణమే 
ముదురుతున్న యాంటీబయాటిక్స్‌  నిరోధకత

యాంటీబయోటిక్స్‌ నిరోధకత.. ఇప్పుడు ఆధునిక ప్రపంచం ముందున్న అతిపెద్ద ముప్పు. వ్యాధి కారక సూక్ష్మజీవులు మందులకు లొంగకుండా నిరోధకతను పెంచుకుని  మొండిఘటాలుగా మారుతున్న ఈ సమస్య అంతకంతకూ పెరిగిపోతుండటంపై శాస్త్రవేత్తలు, వైద్యనిపుణులు తీవ్ర ఆందోళన వ్యక్తం చేస్తున్నారు. నిరోధకతకు యాంటీబయోటిక్‌ మందుల్ని విచ్చలవిడిగా వాడటం ఒక కారణమైతే.. మానవ, జంతు విసర్జితాలు, ఫార్మా కంపెనీల వ్యర్థాల అవశేషాలు నదుల్లో, జల ప్రవాహాల్లో కలిపేస్తుండటం మరో కొత్త సవాల్‌గా పరిణమిస్తోంది.  
యాంటీబయోటిక్స్‌ అవశేషాలతో జలవనరులకు ఎదురవుతున్న సమస్య పెను విపత్తులా మారే ప్రమాదం పొంచిఉన్న నేపథ్యంలో కేంద్ర కాలుష్య  నియంత్రణ బోర్డు(సీపీసీబీ) సభ్య కార్యదర్శి డా।। ప్రశాంత్‌ గార్గవతో ముఖాముఖి.. 
సత్యపాల్‌ మేనన్‌

ఈనాడు డిజిటల్‌, హైదరాబాద్‌

మర్థమైన యాంటీబయోటిక్స్‌ ద్వారా క్షయ క్రిమిని జయించామని మనం సంతోషపడినంత కాలం పట్టలేదు, అది మొండిగా తయారవటానికి! అందుబాటులో ఉన్న ఔషధాలకు అది నిరోధకత పెంచుకుని, మహా మొండిగా తయారవటం వల్ల క్షయ మళ్లీ పెను సమస్యగా తయారైంది. ఇదే తరహాలో మిగతా యాంటీబయోటిక్స్‌ కూడా విఫలమైపోయే ప్రమాదం ఉందన్న ఆందోళన ఇటీవలి కాలంలో బలంగా వినిపిస్తోంది. 2050 నాటికి ఇలా నిరోధకత పెంచుకున్న మొండి సూక్ష్మజీవులు, వాటి కారణంగా సంప్రాప్తించే ఇన్‌ఫెక్షన్లు ప్రపంచవ్యాప్తంగా అతి పెద్ద మరణకారణంగా పరిణమించే అవకాశం  ఉందని బ్రిటన్‌ అధ్యయనం ఒకటి ఇటీవల హెచ్చరించింది. ముఖ్యంగా ప్రపంచవ్యాప్తంగా 91 నదుల్లో నమూనాలు సేకరించి చేసిన పరీక్షల్లో.. 60% ప్రాంతాల్లో నదీజలాలు  యాంటీబయాటిక్స్‌తో కలుషితమైనట్లు తేలటం గమనార్హం. నిరోధకత పెంచుకున్న మొండి సూక్ష్మజీవులు జలవనరుల్లో యాంటీబయోటిక్స్‌తో కలిసి మనుగడ సాగిస్తున్నట్లు శాస్త్రవేత్తలు గుర్తించారు. ఇలా యాంటీబయోటిక్స్‌తో కలుషితమైన నదులు, నీటి ప్రవాహాల్లో పెరుగుతూ మరింత బలపడిన సూక్ష్మజీవులు రకరకాల మార్గాల్లో  వాతావరణంలో విస్తరిస్తున్నాయి. ఇవి మనకు ఇన్‌ఫెక్షన్లు తెచ్చిపెట్టటమే కాదు, యాంటీబయోటిక్స్‌ చికిత్సకు లొంగకుండా ప్రాణాంతకంగా పరిణమిస్తున్నాయని  వెల్లడైంది. 

హైదరాబాద్‌లో ఎక్కువే

చాలా అధ్యయనాలు నదులు, జలప్రవాహాల్లో మానవ విసర్జితాలు, ఇతరత్రా వ్యర్థాలు కలవడం వల్ల తలెత్తే యాంటీబయాటిక్‌ కలుషితంపైనే దృష్టిపెడుతున్నాయిగానీ ఫార్మా  కంపెనీలు వదులుతున్న వ్యర్థాల గురించి పట్టించుకోవడం లేదు.. ఔషధ పరిశ్రమలు ఎక్కువగా ఉన్న చోట వాటి వ్యర్థాల కారణంగా  పరిసరాల్లోని జల వనరుల్లో యాంటీబయోటిక్‌ల కలుషితం తీవ్రస్థాయిలో ఉంటోంది. ‘బల్క్‌ డ్రగ్‌’ పరిశ్రమలకు రాజధానిగా పేరొందిన హైదరాబాద్‌లో కూడా యాంటీబయోటిక్స్‌ సహా విషపూరిత వ్యర్థాల విడుదల వల్ల జల వనరులు తీవ్రంగా కలుషితమవుతున్నట్లు పలుమార్లు వెల్లడైంది. ఈ క్రమంలో బల్క్‌డ్రగ్స్‌ పరిశ్రమలు పెద్ద సంఖ్యలో ఉండే పటాన్‌చెరు పరిసర ప్రాంతంలోని జలవనరుల్లో లీప్‌జిగ్‌ యూనివర్సిటీ శాస్త్రవేత్తల బృందం నీటి నమూనాల్ని పరీక్షించింది. ఇందులో యాంటీబయోటిక్స్‌ కాలుష్యమే కాదు, బహుళ  ఔషధ నిరోధకత సంతరించుకున్న మొండి సూక్ష్మజీవులూ ఉన్నట్లు స్పష్టమైంది. 30కిపైగా ఔషధ తయారీ కంపెనీలు ఉన్న పటాన్‌చెరు-బొల్లారం పారిశ్రామిక ప్రాంతం పరిసరాల్లోని 28 జల వనరుల్లో నమూనాల్ని పరీక్షించగా.. అన్ని నమూనాల్లోనూ బ్యాక్టీరియా, ఫంగస్‌ ఉన్నట్లు తేలింది. 13 నమూనాల్లో ‘యాంటీ ఫంగల్‌’ ఔషధాల కాలుష్యమూ  ఉన్నట్లు వెల్లడైంది. దీంతో పాటు హైదరాబాద్‌లోని మూసీ నదిలో సైతం ఫార్మా పరిశ్రమల వ్యర్థాలు, యాంటీబయోటిక్స్‌ అవశేషాలు భారీస్థాయిలోనే ఉన్నట్లు తేలింది.

నదులు, జల వనరుల్లో యాంటీబయోటిక్స్‌ కలుషితంపై కాలుష్య నియంత్రణ బోర్డు ఏవైనా అధ్యయనాలు, సర్వేలు, తనిఖీలు నిర్వహించిందా? 
ఈ సమస్యపై ‘క్విక్‌ హైజెనిక్‌ సర్వే ఆఫ్‌ రివర్‌ మూసీ’ పేరిట ఇటీవలే ఆర్నెల్ల పాటు అధ్యయనం చేసే బాధ్యతను హైదరాబాద్‌లోని బిట్స్‌-పిలానీకి అప్పగించాం.  ఇందులో ఔషధ అవశేషాలు ఏ స్థాయిలో ఉన్నాయి, ఈ నీటిలో యాంటీబయోటిక్స్‌కు నిరోధక పెంచుకున్న సూక్ష్మజీవులు కూడా ఉంటున్నాయా? అన్నది గుర్తించేందుకు నదీ  జలాల నమూనాల్ని పరీక్షిస్తారు. మరోవైపు.. పారిశ్రామిక వ్యర్థాల్లో యాంటీబయోటిక్స్‌ అవశేషాలపై మార్గదర్శకాలు/ప్రమాణాల్ని రూపొందించే పనిలో భాగంగా సీపీసీబీ రెండు  చోట్ల క్షేత్రస్థాయి సర్వే చేపట్టగా జలాల్లో యాంటీబయోటిక్స్‌ అవశేషాలున్నట్లు తేలింది.

పరిశ్రమల నుంచి వచ్చే ఔషధ వ్యర్థాలపై పర్యవేక్షణ అన్నది అధికారులకు కష్టమని భావిస్తున్నారా? 
ఈ సమస్య ఒక ప్రాంతానికే పరిమితమైనది కాదు. ఫార్మా పరిశ్రమలు పెద్దసంఖ్యలో ఉన్న అన్ని ప్రాంతాల్లోనూ ఎక్కువగానే ఉంది. మేం ఇప్పటికే నదులపై  అధ్యయనాలు ప్రారంభించాం. పరిశ్రమల నుంచి విడుదల అవుతున్న వ్యర్థాల విషయంలో సాంకేతిక నివేదికల్ని కేంద్ర ప్రభుత్వానికి అందజేశాం. దీనిపై కేంద్ర పర్యావరణ  మంత్రిత్వశాఖ మార్గదర్శకాల్ని వెలువరించిన తర్వాత చర్యలు, నియంత్రణ సాధ్యమవుతుందని భావిస్తున్నాం.

భారత్‌లో ఉత్పత్తి అవుతున్న జనరిక్‌ ఔషధాల్లో 20% హైదరాబాద్‌లోనే ఉత్పత్తి అవుతున్నాయి. 
భారత ఔషధ ఎగుమతుల్లో  50% వాటా హైదరాబాద్‌దే.

యాంటీబయోటిక్స్‌ కాలుష్యం ఇంత ఎక్కువగా ఉండటానికి కారణాలేమిటి? 
ఔషధ పరిశ్రమల వ్యర్థాలను నిర్వీర్యం చేసి వదిలిపెట్టే విషయంలో పూర్తి చర్యలు లేకపోవటం; మనుషులూ జంతువుల విచ్చలవిడి యాంటీబయాటిక్స్‌ వినియోగం, విసర్జితాలపై నియంత్రణ లేకపోవడం; గడువు తీరిన, వాడని మందులను అశాస్త్రీయ పద్ధతుల్లో ధ్వంసం చేయడం వంటివి.. యాంటీబయోటిక్స్‌ కలుషితానికి ప్రధాన కారణాలుగా నిలుస్తున్నాయి. సూక్ష్మక్రిములు ఒకసారి నిరోధకత పెంచుకుంటే వాటిని నిలువరించటం కష్టం, అందుకే వీటి వ్యాప్తి చాలా తీవ్రంగా ఉంటోంది.

సమస్యకు మూలం.. ఉత్పత్తిదారులకు తగిన పరిజ్ఞానం లేకపోవటమా? లేక కారకులపై కఠిన చర్యలు లేకపోవడమా? 
పారిశ్రామిక వ్యర్థాల్లో యాంటీబయోటిక్‌ అవశేషాలపై ఎలాంటి పర్యావరణపరమైన మార్గదర్శకాలు/ప్రమాణాలు లేకపోవడం వల్ల ఈ తరహా కాలుష్య కారకాలపై  నియంత్రణ కొరవడింది. ఇది మన దేశానికే కాదు, ప్రపంచానికంతటికీ వర్తిస్తుంది. కఠిన చర్యలనేవి పర్యావరణ చట్టాల పరిధిలోనే సాధ్యమవుతాయి. పర్యావరణ మార్గదర్శకాలు నోటిఫై చేస్తే.. ఉత్పత్తిదారులు, నియంత్రణ అధికారులు అవసరమైన చర్యల్ని తీసుకోవటం తప్పించి మరో మార్గం ఉండదు. దీనిపై 2015లో ప్రపంచ ఆరోగ్య సంస్థ..  ఐదు లక్ష్యాలతో ఒక ‘ప్రపంచ కార్యాచరణ ప్రణాళిక’ను, మన దేశం 2017లో జాతీయ ప్రణాళికను విడుదల చేశాయి. వీటితో పరిస్థితుల్లో కొంత మార్పు మొదలైంది. ఈ తరహా కాలుష్యాన్ని కేవలం ఒక్క అంశానికో, రంగానికో మాత్రమే వర్తింపజేయలేం. అవశేషాల విడుదల అన్నది అనుకోకుండా జరుగుతుండొచ్చు, లేదా సమర్థమైన వ్యర్థ నిర్వహణ పరిజ్ఞానాలు లేకపోవడం వల్ల కూడా కావచ్చు. వీటన్నింటినీ పరిగణనలోకి తీసుకునే మార్గదర్శకాలను రూపొందించటం జరుగుతోంది!

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.