close

ప్ర‌త్యేక క‌థ‌నం

తలదన్నేలా! తలెత్తుకునేలా!! 

రెండు పడక గదుల ఇళ్లకోసం దరఖాస్తుల వెల్లువ 
  బారులు తీరుతున్న పేదలు 
పరిశీలనకు ఇంకా అనుమతి రాలేదంటున్న అధికారులు 
ఈనాడు - హైదరాబాద్‌

రాష్ట్ర ప్రభుత్వం చేపట్టిన రెండు పడక గదుల ఇళ్ల పథకానికి ఆశావహుల సంఖ్య భారీగా పెరుగుతోంది. ఏడాదిగా గుత్తేదారుల ఎంపిక పూర్తయి నిర్మాణాలు మొదలుకావడంతో సొంతింటి కోసం పేదలు ఆశగా ఎదురుచూస్తున్నారు. అధికారికంగా దరఖాస్తులు ఆహ్వానించకున్నా గత రెండేళ్లుగా జిల్లా కలెక్టర్‌ కార్యాలయాలకు లక్షల్లో దరఖాస్తులు వచ్చాయి. ఇటీవల హైదరాబాద్‌ మహానగరపాలక సంస్థ(జీహెచ్‌ఎంసీ) పరిధిలో మీసేవ కేంద్రాల ద్వారానూ దరఖాస్తులను అనుమతించడంతో మళ్లీ హడావుడి మొదలైంది. లబ్ధిదారుల ఎంపికపై ప్రభుత్వం నుంచి ఎలాంటి అధికారిక సమాచారం లేనప్పటికీ గృహాలు కేటాయించాలంటూ కలెక్టర్‌ కార్యాలయాలకు వచ్చి జనం విజ్ఞప్తి చేస్తున్నారు. మరోవైపు రాష్ట్రంలో ఇప్పటి వరకు 17 వేల గృహాలు పూర్తికాగా.. ఇంకా 1.7 లక్షల ఇళ్లు నిర్మాణ దశలోనే ఉన్నాయి. ప్రభుత్వం నుంచి అధికారిక సమాచారం వచ్చాకే.. దరఖాస్తులను పరిశీలిస్తామని జిల్లాల నోడల్‌ అధికారులు చెబుతున్నారు.

ఎమ్మెల్యేల చేతుల్లోనే.. 
గృహాల కేటాయింపులో ఎమ్మెల్యేలదే పైచేయి. లబ్ధిదారుల ఎంపికలో వారి ప్రత్యక్ష ప్రమేయం లేకున్నా.. ఏ గ్రామానికి ఇవ్వాలో, ఇవ్వకూడదో.. పరిమితి ఎంత అనే విషయాల్లో వారిదే తుది నిర్ణయం. ప్రస్తుత నిబంధనల ప్రకారం ఒక్కో నియోజకవర్గంలో చేపడుతున్న ప్రాజెక్టులో 1400 గృహాలు ఎమ్మెల్యేలు గ్రామాలవారీగా కేటాయిస్తారు. ప్రాజెక్టుల పరిధిలోని గ్రామాలు, పట్టణాల్లో నివసిస్తున్న పేదలకు కేటాయింపులో ప్రాధాన్యం ఉంటుంది. ఉదాహరణకు ఒక గ్రామానికి ఎమ్మెల్యే 10 గృహాలు కేటాయిస్తే... ఆ గ్రామం నుంచి వచ్చిన దరఖాస్తులను పరిశీలించి, గ్రామ సభల ద్వారా అర్హులను మండల రెవెన్యూ అధికారులు, జిల్లా కమిటీల ప్రతినిధులు ఎంపిక చేస్తారు. దారిద్య్ర రేఖకు దిగువన ఉన్నవారే లబ్ధిదారులుగా అర్హులు. ఇందిరమ్మ తదితర పథకాల కింద లబ్ధిపొందకూడదని, సొంతిల్లు ఉండటానికి వీల్లేదని షరతులు పెట్టారు. అర్హుల కన్నా మంజూరు చేసిన గృహాల సంఖ్య తక్కువగా ఉంటే లాటరీ పద్ధతి ద్వారా ఎంపిక చేస్తారు. ఎమ్మెల్యేల చేతుల్లోనే ఈ కేటాయింపులు ఉండటంతో పేదలు వారిని కలిసి ప్రాధేయపడుతున్నారు. ఇదే అదనుగా భావించి గృహాలు ఇప్పిస్తామంటూ కొందరు దళారులు తెరపైకి వచ్చి పేదలను బురిడీ కొట్టించే ప్రయత్నం చేస్తున్నారు.

 

దరఖాస్తు రుసుము రూ.35 
గృహాల కేటాయింపు కోసం పది రోజుల నుంచి జీహెచ్‌ఎంసీ పరధిలోని మీసేవ కేంద్రాల్లో దరఖాస్తు సదుపాయం అందుబాటులోకి వచ్చింది. హైదరాబాద్‌ నగరంలో దరఖాస్తు చేసేందుకు పేదలు పెద్దసంఖ్యలో ఈ కేంద్రాల ముందు వరుస కడుతున్నారు. గత పదిరోజుల్లోనే వేలల్లో దరఖాస్తులు వచ్చాయి. దరఖాస్తు రుసుము కింద రూ.35 చొప్పున వసూలు చేస్తున్నారు. హైదరాబాద్‌ జిల్లా పరిధిలో ఇప్పటి వరకు అందిన దరఖాస్తులు రెండున్నర లక్షలు దాటాయి. ఇక రంగారెడ్డిలో 3 లక్షల వరకు వచ్చినట్లు సమాచారం. మరోవైపు జిల్లా కలెక్టరేట్లలో కలెక్టర్లు ప్రతివారం నిర్వహించే ప్రజావాణి కార్యక్రమాల్లో భారీ సంఖ్యలో దరఖాస్తులు వస్తున్నాయి. ఉమ్మడి మెదక్‌ జిల్లాలో కొన్ని ఇళ్ల ప్రాజెక్టులు ఇప్పటికే పూర్తయ్యాయి. అక్కడ వచ్చిన దరఖాస్తులను పరిశీలించి అర్హులకే ఇవ్వాలని అధికారులు నిర్ణయించినా.. ఇంకా ప్రక్రియ మొదలుకాలేదు. ఉమ్మడి కరీంనగర్‌, ఆదిలాబాద్‌, మహబూబ్‌నగర్‌, నిజామాబాద్‌, కరీంనగర్‌ జిల్లాల్లో భారీ స్థాయిలో దరఖాస్తులు అందాయి. ప్రభుత్వం నుంచి అనుమతి వచ్చిన అనంతరం పరిశీలన మొదలుపెట్టాలని అధికారులు నిర్ణయించారు. జీహెచ్‌ఎంసీలోనే కాకుండా మిగతా జిల్లాల్లోనూ త్వరలోనే ఆన్‌లైన్‌లో దరఖాస్తుల స్వీకరణ ప్రారంభమయ్యే అవకాశం ఉంది. మీ-సేవ కేంద్రాల ద్వారా తీసుకుంటున్న దరఖాస్తులను ప్రస్తుతానికి కేంద్రాల నిర్వాహకుల వద్దే పెట్టుకోవాలని, ఎమ్మార్వోలు అడిగినప్పుడు తీసుకొచ్చి ఇవ్వాలని మౌఖిక ఆదేశాలు జారీ చేశారు.

మరిన్ని

జిల్లా వార్తలు

దేవ‌తార్చ‌న

రుచులు

© 1999 - 2019 Ushodaya Enterprises Pvt.Ltd,All rights reserved.
Powered By Margadarsi Computers
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions | Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.