close

ప్ర‌త్యేక క‌థ‌నం

చెప్పారో ‘పిన్‌’డేస్తారు!   

యూపీఐ నంబరుతో లక్షలు  కొల్లగొడుతున్న సైబర్‌ నేరస్థులు 
నెల రోజుల్లో రూ.1.50 కోట్ల నగదు బదిలీ 
రోజుకు సగటున పది ఫిర్యాదులు 
అప్రమత్తంగా ఉండాలంటున్న పోలీసులు

ఈనాడు, హైదరాబాద్‌: బ్యాంకు అధికారుల్లా ఖాతాదారులకు ఫోన్‌ చేసి పిన్‌ నంబరు తెలుసుకుని వారి నగదును స్వాహా చేస్తున్న సైబర్‌ నేరస్థులు ఇప్పుడు సరికొత్త పంథాలో మోసం చేస్తున్నారు. యూపీఐ మొబైల్‌ యాప్‌తో నగదు లావాదేవీలు జరుపుతున్న వారిని లక్ష్యంగా చేసుకుని రూ.లక్షలు కొల్లగొడుతున్నారు.

పరిమితి పెరిగింది..మోసాలు పెరిగాయి 
గతంలో ఈ-వ్యాలెట్‌ల ద్వారా రూ.5 వేల వరకు మాత్రమే లావాదేవీకి పరిమితి ఉండేది. డిజిటల్‌ లావాదేవీలు, ఆన్‌లైన్‌ ఆధారిత కొనుగోళ్లు పెరుగుతుండడంతో ప్రజలు, బ్యాంకు ఖాతాదారులకు ఉపయుక్తంగా ఉండేలా కేంద్రం యూపీఐ(యూనిఫైడ్‌ పేమెంట్‌ ఇంటర్‌ఫేస్‌) విధానానికి అనుమతి ఇచ్చింది. గతంలో ఓటీపీ(ఒన్‌ టైమ్‌ పాస్‌వర్డ్‌) కాల పరిమితి 15 నిమిషాలుగా ఉండేది. ఆ లోపు నగదు బదిలీ జరగని పక్షంలో ఆ లావాదేవీ దానంతటదే రద్దయ్యేది. యూపీఐ విధారం అందుబాటులోకి వచ్చాక ఓటీపీ వ్యవధి పదిహేను నిముషాలకు బదులు మరోసారి ఓటీపీని మార్చుకునేంత వరకూ కొనసాగుతోంది. ఇదే అదునుగా సైబర్‌ నేరస్థులు ఖాతాదారుల యూపీఐ నంబరు తెలుసుకుని రోజుకు రూ.లక్ష చొప్పున కొల్లగొడుతున్నారు. ఖాతాదారుడు బ్యాంకు అధికారులకు ఫిర్యాదు చేసిన సందర్భాల్లో వారు డెబిట్‌/కెడిట్‌ కార్డును స్తంభింపజేస్తున్నారు తప్ప బాధితుడి ఖాతాలో నగదు లావాదేవీలను ఆపడం లేదు. ఇది సైబర్‌ నేరగాళ్లకు కలిసి వస్తోందని పోలీసులు పేర్కొంటున్నారు.

వందల సంఖ్యలో ముఠాలు 
డెబిట్‌/క్రెడిట్‌ కార్డుదారుల సొమ్ము స్వాహా చేస్తున్న ముఠాలు పశ్చిమ్‌ బెంగాల్‌, ఝార్ఖండ్‌, బిహార్‌ రాష్ట్రాల్లో వందల సంఖ్యలో ఉన్నాయి. ముఠా సభ్యులు అన్ని ప్రముఖ బ్యాంకుల ఖాతాదారుల పేర్లు, ఏటీఎం కార్డుల నంబర్లు తదితర వివరాలను దిల్లీ, ముంబయిలోని పొరుగుసేవల సిబ్బంది ద్వారా సేకరిస్తారు. తెలుగు రాష్ట్రాలతోపాటు తమిళనాడు, కర్ణాటక రాష్ట్రాల్లోని బ్యాంకు ఖాతాదారులను ఎంచుకుంటారు. కొత్త సిమ్‌కార్డులు తీసుకుని ఖాతాదారులతో మాట్లాడుతారు. ‘వాళ్లు తమ పేరు, కార్డు నంబరు తదితర వివరాలు సక్రమంగా చెబుతుండడంతో బాధితులకు అనుమానం రావడం లేదు. ఉన్నత విద్యావంతులు, సైబర్‌ నేరాలపై అవగాహన ఉన్న వారు మాత్రం తప్పించుకుంటుండగా మిగిలిన వాళ్లు నేరగాళ్ల వలలో చిక్కుతున్నారు. ఇలా మోసపోయిన వారు రోజుకు 10 మంది వరకు సైబర్‌ క్రైమ్‌ ఠాణాకు వస్తున్నారు. కేవలం నెల రోజుల్లో హైదరాబాద్‌ వాసుల నుంచి రూ.1.20 కోట్లు వాళ్లు కొల్లగొట్టారు’ అని పోలీసులు పేర్కొంటున్నారు.

పిన్‌ నంబరు అడిగే వారిని నమ్మొద్దు 
గుర్తు తెలియని వ్యక్తులు ఫోన్‌చేసి ‘కార్డు మార్చాలి, పిన్‌ నెంబరు’ చెప్పమంటే చెప్పొద్దు. ఖాతాదారుల సమస్త సమాచారం సంబంధిత బ్యాంకుల్లోనే అందుబాటులో ఉంటుంది. వాటి కోసం బ్యాంకు అధికారులు ఖాతాదారులకు ఫోన్‌ చేయడం జరగదు. ఎవరికైనా అనుమానం వస్తే వెంటనే బ్యాంకు అధికారులు లేదా పోలీసులకు సమాచారం ఇవ్వండి.

- రఘువీర్‌, అదనపు డీసీపీ(సైబర్‌క్రైమ్స్‌)

మరిన్ని

జిల్లా వార్తలు

దేవ‌తార్చ‌న

రుచులు

© 1999 - 2019 Ushodaya Enterprises Pvt.Ltd,All rights reserved.
Powered By Margadarsi Computers
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions | Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.