close

ప్ర‌త్యేక క‌థ‌నం

మట్టి నుంచి మాణిక్యాల సృష్టి

గర్భిణులు, పిల్లల్లో రక్తహీనత నివారణే లక్ష్యం.. 
రూ.3 కోట్లతో పౌష్టికాహారం పంపిణీ 
ఇక్రిశాట్‌ సహాయంతో ఐటీడీఏ ఆధ్వర్యంలో అమలు..

ఈ ఆదివాసీ గర్భిణి పేరు మెస్రం అంజలి. జైనూరు మండలానికి చెందిన ఈమె తీవ్రమైన రక్తహీనతతో బాధపడుతోంది. సాధారణంగా మహిళ రక్తంలో 14 నుంచి 15 గ్రాములు హిమోగ్లోబిన్‌ ఉండాలి. కానీ ఇటీవల అంజలిని వైద్యులు పరీక్షించగా ఆమెలో కేవలం ఆరు గ్రాములు మాత్రమే హిమోగ్లోబిన్‌ ఉందంటే పరిస్థితి తీవ్రతను అర్థం చేసుకోవచ్చు.

ఉట్నూరు, న్యూస్‌టుడే

ఏజెన్సీ ప్రాంతాల్లోని మారుమూల గ్రామాల్లో నివసించే అడవిబిడ్డలు పేదరికం, అవగాహనలేమితో పోషకాహారానికి దూరమవుతున్నారు. వెరసి గిరిజన గర్భిణులు, బాలింతలు రక్తహీనతతో బారిన పడుతున్నారు. వారికి పుట్టిన పిల్లలు బలహీనంగా ఉంటున్నారు. వయస్సు పెరిగినా కొద్దీ బరువు పెరగకపోవడంతో వ్యాధి నిరోధకశక్తి లేమితో సతమతమవుతున్నారు. చిన్నపాటి జబ్బులను తట్టుకోలేకపోతున్నారు. తరుచూ అస్వస్థతతకు గురవుతున్నారు. ఈ సమస్యను అధిగమించే దిశగా సర్కారు చర్యలు చేపట్టింది. రాష్ట్ర గిరిజన సంక్షేమశాఖ ద్వారా ‘గిరి పోషణ’ పథకాన్ని ప్రవేశపెట్టింది. ఇక్రిశాట్‌ సహకారంతో ఐటీడీఏ ఈ వినూత్న పథకాన్ని అమలుకు శ్రీకారం చుట్టింది. 
ఉమ్మడి ఆదిలాబాద్‌ జిల్లాలోని సమగ్ర గిరిజనాభివృద్ధి సంస్థ (ఐటీడీఏ) ఉట్నూరు ఆధ్వర్యంలో అంతర్జాయ పంటల పరిశోధన సంస్థ (ఇక్రిశాట్‌) సహకారంతో గిరిపోషణ పథకం అమలుకు చర్యలు చేపట్టారు. పూర్తిస్థాయిలో పోషకాలు కలిగిన ఉన్న జొన్నలు, రాగులు, సజ్జలతోపాటు పల్లిపట్టీ, ప్రత్యేకంగా తయారు చేసిన శక్తినిచ్చే బిక్కెట్లు మొత్తం ఆరు రకాలతో కూడిన పౌష్టికాహార కిట్లను రక్తహీనతతో బాధపడుతున్న బాధితులకు అందజేయనున్నారు. రూ.మూడు కోట్ల వ్యయంతో ఈ పథకాన్ని పేదరిక నిర్మూలన సంస్థ (ఐకేపీ), మాతాశిశు సంక్షేమశాఖకు చెందిన అంగన్‌వాడీ ఉపాధ్యాయులు, ఆయాల సహకారంతో సమర్థవంతంగా అమలు చేయడానికి కార్యాచరణ సన్నద్ధం చేశారు.

ప్రయోగాత్మకంగా.. 
‘గిరి పోషణ’ పథకాన్ని ఐటీడీఏ తొలుత ప్రయోగాత్మకంగా ఏజెన్సీలోని సిర్పూరు (యు), లింగాపూర్‌, జైనూరు, తిర్యాణి మండలాల్లో అమలు చేయనున్నారు. ఈ నాలుగు మండలాల్లో గర్భిణులు, బాలింతలు కలిపి 869 మంది, ఏడు నెలల నుంచి మొదలుకొని ఆరేళ్ల వయస్సు కలిసి పిల్లలు 4,227 మంది మొత్తం 5,096 మంది లబ్ధిదారులకు 143 అంగన్‌వాడీ కేంద్రాల ద్వారా పౌష్టికాహారాన్ని అందజేయనున్నారు. ఇక్కడ అమలుచేశాక వచ్చిన స్పందన మార్పులను పరిశీలించిన తరువాత మిగతా మండలాల్లో అమలు గురించి ఆలోచించి తగిన నిర్ణయం తీసుకోవాలని రాష్ట్ర గిరిజన సంక్షేమశాఖ భావిస్తోంది.

పకడ్బందీగా అమలు చేస్తాం!  - కృష్ణ ఆదిత్య, పీఓ, ఐటీడీఏ 
గిరిపోషణ పథకాన్ని పకడ్బందీగా అమలు చేస్తాం. గర్భిణులు, బాలింతలతోపాటు బలహీనంగా ఉన్న గిరిజన చిన్నారులకు ఇక్రిశాట్‌ ద్వారా సరఫరా చేస్తున్న పౌష్టికాహారాన్ని సమర్థవంతంగా అందేలా చర్యలు తీసుకుంటాం. మార్పులను తప్పకుండా పరిశీలిస్తాం. మాతా, శిశు మరణాలను పూర్తిస్థాయిలో అరికట్టడానికి ఇది దోహదపడుతుంది.

మరిన్ని

జిల్లా వార్తలు

దేవ‌తార్చ‌న

రుచులు

© 1999 - 2019 Ushodaya Enterprises Pvt.Ltd,All rights reserved.
Powered By Margadarsi Computers
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions | Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.