close

ప్ర‌త్యేక క‌థ‌నం

..అంతకు మించి!

రైతుల కోసం ఇతర రాష్ట్రాల కంటే మెరుగైన పథకం
కేంద్రం ప్రకటించే వాటికంటే కొత్తగా
  వేర్వేరు ప్రతిపాదనలను పరిశీలిస్తున్న రాష్ట్ర ప్రభుత్వం
ఈనాడు - అమరావతి

ఆరుగాలాలు కష్టించి పంటలు సాగుచేసే అన్నదాతలను మరింతగా ఆదుకోవడంపై రాష్ట్ర ప్రభుత్వం దృష్టిసారించింది. రైతులకు మేలు చేసేందుకు ఎలాంటి పథకం తీసుకురావాలనే విషయమై కసరత్తు చేస్తోంది. ఇప్పటికే పలు రాష్ట్రాలు అవలంభిస్తున్న విధానాలతోపాటు కేంద్రం ఎలాంటి అడుగులు వేయబోతోందనే అంశాన్ని నిశితంగా గమనిస్తోంది. ఆంధ్రప్రదేశ్‌లో ప్రవేశపెట్టే పథకం.. ఇతర రాష్ట్రాల పథకాల కంటే గొప్పగా, కొత్తగా ఉండాలని ప్రభుత్వ పెద్దలు ఇప్పటికే అధికారులకు స్పష్టంచేశారు. అదే సమయంలో కేంద్రం ప్రకటించే వరాలను చూసిన తర్వాతే ముందుకెళ్లాలని భావిస్తున్నారు.
పెట్టుబడి నిధిపై ముందుకు ఎలా?

..అంతకు మించి!

రైతుకు సాయంపై నాలుగైదు రకాల ప్రతిపాదనలు తయారు చేశారు. రాష్ట్రంలో వ్యవసాయ, ఉద్యాన పంటలను 2 కోట్ల ఎకరాల్లో రైతులు సాగు చేస్తున్నారు. ఎకరానికి రూ.5 వేల చొప్పున ఇచ్చినా ఏడాదికి రూ.10 వేల కోట్ల వరకు అవసరం అవుతుంది. అయితే పంపిణీలోనే సమస్యలున్నాయి.

* ఇతర రాష్ట్రాలతో పోలిస్తే ఆంధ్రప్రదేశ్‌లో కౌలు రైతుల సంఖ్య అధికం. ప్రభుత్వ గణాంకాల ప్రకారం 16 లక్షల మంది వరకు ఉన్నారు. తూర్పు, పశ్చిమ గోదావరి, గుంటూరు, కృష్ణా, ప్రకాశం జిల్లాల్లో 60 శాతంపైనే కౌలు రైతులు ఉన్నట్లు అంచనా. కౌలు రైతులు 90 శాతానికిపైగా ఉన్న గ్రామాలు కూడా ఉన్నాయి. వీరికి పంట రుణాలు అందించడానికే ప్రభుత్వం బ్యాంకులపై పెద్దఎత్తున ఒత్తిడి తెచ్చింది. ఎట్టకేలకు దేశంలోనే అత్యధికంగా రూ.5 వేల కోట్ల వరకు రుణాలుగా ఇప్పించింది. ఇప్పుడు పెట్టుబడి నిధి కూడా వీరికి చెందేలా చేయాలంటే ఏం చేయాలనే విషయమై ప్రస్తుతం ఆలోచిస్తోంది.

* సాగుదారులనే పరిగణనలోకి తీసుకుని పంపిణీ చేస్తే.. భూమి యజమానుల సంగతి ఏమిటనే ప్రశ్న తలెత్తుతుంది. కౌలురైతులు, భూ యజమానులు అందరినీ కలిపి లెక్కలోకి తీసుకుంటే మొత్తం రైతుల సంఖ్య 96 లక్షలకు చేరుతుంది.

బీమా ప్రీమియం చెల్లిస్తే పోలా..
పంటల బీమా ఉచితంగా కల్పిస్తే రైతులందరికీ ప్రయోజనం కల్పించవచ్చు. దీని వల్ల రూ.1,000 కోట్ల లోపు మాత్రమే రాష్ట్ర ఖజానాపై భారం పడుతుందని అంచనా. ఆహార, తృణ ధాన్యాలు, పప్పులు, నూనెగింజల పంటలకు నిర్ణయించిన స్థూల ప్రీమియం రేటులో 1.50 శాతం, మిర్చి, పసుపు తదితర పంటలకైతే 5 శాతం వరకు రైతులు ప్రస్తుతం చెల్లిస్తున్నారు. మిగిలిన మొత్తాన్ని కేంద్ర, రాష్ట్ర ప్రభుత్వాలు భరిస్తున్నాయి. రైతు వాటాతో పనిలేకుండా మొత్తం రాష్ట్ర ప్రభుత్వమే చెల్లించడం వల్ల పంట నష్టం సమయాల్లో బీమా అందరికీ వర్తించే అవకాశం ఉంటుంది. కేంద్రం ఆహార పంటల సాగుకు ఉచిత బీమా కల్పించే అంశాన్ని పరిశీలిస్తోందనే అభిప్రాయాలు వినిపిస్తున్నాయి. అక్కడ నుంచి ప్రకటన వెలువడ్డాకే రాష్ట్ర పరిధిలో ఏం చేయాలనే విషయమై ఓ నిర్ణయం తీసుకోనున్నారు.

ఇవీ అవసరమే
అధికారులు ఇతర రాష్ట్రాలతోపాటు వివిధ దేశాల్లో రైతులను ఆదుకునేందుకు అమలు చేస్తున్న విధానాలను పరిశీలిస్తున్నారు. ఎక్కడ చూసినా రుణమాఫీ, పెట్టుబడి నిధి, పంటలకు మద్దతు ధర కల్పించడం తదితర అంశాలే ప్రధానంగా ఉన్నాయనేది వారి అభిప్రాయంగా ఉంది. వాటితోపాటు మార్కెటింగ్‌, నిల్వ సౌకర్యాల పెంపు, గ్రామీణ ప్రాంతాల్లో ఆహార శుద్ధి పరిశ్రమల ఏర్పాటుకు ప్రాధాన్యం ఇస్తున్నాయని గుర్తు చేస్తున్నారు. ప్రభుత్వం వీటిని కూడా పరిగణనలోకి తీసుకుంటేనే దీర్ఘకాలంలో రైతులకు ప్రయోజనాలు కల్పించడం సాధ్యమవుతుందని వివరిస్తున్నారు.

రుణమాఫీ.. రైతు రథం
ఎన్నికల సమయంలో ఇచ్చిన హామీ మేరకు తెదేపా ప్రభుత్వం అధికారంలోకి వచ్చాక రూ.24,500 కోట్లతో రుణమాఫీ చేపట్టి.. ఇప్పటి వరకు మూడు వాయిదాల్లో రూ.15,147 కోట్ల చెల్లింపులు చేసింది. దీని ద్వారా 58.29 లక్షల ఖాతాలకు రుణ ఉపశమనం లభించింది.

* ‘రైతు రథం’ పథకం ద్వారా గరిష్ఠంగా రూ.2.5 లక్షల రాయితీతో 12,215 పెద్ద ట్రాక్టర్లను అందించింది. ఈ ఏడాది 11,664 ట్రాక్టర్లు అందించాలని లక్ష్యంగా నిర్దేశించుకుంది.
* మద్దతు కరవైనప్పుడు రాష్ట్ర ప్రభుత్వమే రంగంలోకి దిగి 9.27 లక్షల టన్నుల ఉత్పత్తులను రూ.3,556 కోట్లతో కొనుగోలు చేసింది. కరవు నివారణ, పెట్టుబడి రాయితీల రూపంలో గత నాలుగేళ్లలో 39.33 లక్షల మంది రైతులకు రూ.3,767 కోట్లు చెల్లించింది. వ్యవసాయ అనుబంధ శాఖలకు 2018-19 బడ్జెట్లో రూ.19,070 కోట్లు కేటాయించింది.

* పంటలు దెబ్బతిన్న సమయంలో పెట్టుబడి రాయితీ మొత్తాన్ని వరికి రూ.10 వేల నుంచి రూ.20 వేలకు రాష్ట్ర ప్రభుత్వం పెంచింది. మొక్కజొన్నకు రూ.8,333 నుంచి రూ.12,500, పొద్దు తిరుగుడుకు రూ.6,250 నుంచి రూ.10 వేలకు, పత్తి, వేరుశెనగ, చెరకు పంటలకు రూ.10 వేల నుంచి రూ.15 వేలకు పెంచింది. పశువులకు ఉచిత బీమా కింద రూ.50 కోట్లు కేటాయించింది. గోకులం, మినీ గోకులం పథకాలు ప్రవేశపెట్టి పశు వసతిగృహాల నిర్మాణానికి ఆర్థికసాయం చేసింది.

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.