close

ప్ర‌త్యేక క‌థ‌నం

రెక్కలు తొడిగి.. రివ్వున ఎగిరి

 గంటల వ్యవధిలో విమాన ప్రయాణం
వేగవంతంగా విమానాశ్రయాల అభివృద్ధి
 రాష్ట్ర  సంస్థ ప్రణాళికలు

గతంలో రాష్ట్రం నుంచి విదేశాలకు విమానంలో ఇటు హైదరాబాద్‌... అటు విశాఖపట్నం నుంచే వెళ్లాల్సి వచ్చేది. లేదంటే చెన్నైకు వెళ్లేవారు. ఇప్పుడా పరిస్థితి మారింది. రాష్ట్ర విమానాశ్రయాల అభివృద్ధి సంస్థ చేపట్టిన ప్రణాళికతో కొత్త విమానాశ్రయాలు, వివిధ ప్రాంతాలకు విమాన సర్వీసులు అందుబాటులోకి వచ్చాయి. దాంతో ప్రయాణికుల సంఖ్య  55 లక్షలకు చేరింది.

రాష్ట్రంలో ఒక చోటు నుంచి మరో ప్రాంతానికి, దేశంలోని ముఖ్య నగరాలకు, ప్రపంచంలోని ప్రముఖ ప్రదేశాలకు గంటల వ్యవధిలో చేరుకునేలా విమాన సర్వీసులు నడిపే స్థాయికి విమానాశ్రయాలను వేగవంతంగా అభివృద్ధి చేస్తున్నారు. విజయవాడ నుంచి దుబాయి, అబుదాబికి నడిపేలా రాష్ట్ర ప్రభుత్వం చొరవ తీసుకుంటోంది. తిరుపతి నుంచి విదేశాలకు నేరుగా ఒకటి, రెండు సర్వీసులైనా నడిచేలా చర్యలు చేపడుతున్నారు. విజయవాడ (గన్నవరం), రాజమహేంద్రవరం విమానాశ్రయాల్లో తాజాగా రన్‌వేలను విస్తరించారు. కడప, తిరుపతిలో విస్తరణ పనులు వివిధ దశల్లో ఉన్నాయి. విజయవాడ, విశాఖపట్నంలో ప్రయాణికుల టెర్మినల్‌ను   అభివృద్ధి చేస్తున్నారు. గత నాలుగున్నరేళ్లలో విమాన ప్రయాణికుల సంఖ్య 13 లక్షల నుంచి ఇప్పుడు 55 లక్షలకు చేరింది. 2014లో విశాఖపట్నం, గన్నవరం, తిరుపతి, కడప నుంచి దేశీయంగా రోజూ 50 నుంచి 60 విమానాలు నడిస్తే ఇప్పుడు వీటి సంఖ్య 120కి పెరిగింది. ప్రస్తుతం విశాఖపట్నం నుంచి ఐదు, గన్నవరం నుంచి ఒక అంతర్జాతీయ సర్వీసులు  నడుస్తున్నాయి. రన్‌వేల విస్తరణకు రాష్ట్ర ప్రభుత్వం రూ.3,500 కోట్ల విలువైన 2,300 ఎకరాలకుపైగా భూములను భారత విమానయాన సంస్థకి కేటాయించింది.

విజయవాడ

* రన్‌వే పొడవు: 3,360మీటర్లు
* టెర్మినల్‌: 13వేల చదరపు మీటర్లు
* దేశీయంగా నడుస్తున్న విమానాలు: దిల్లీ, ముంబయి, బెంగళూరు, చెన్నై, హైదరాబాద్‌.
* విదేశీ సర్వీసులు: వారంలో రెండు రోజులు సింగపూర్‌కు.
* ప్రయాణికుల రద్దీ: ఏటా 10 లక్షలు
* అంతర్జాతీయ టెర్మినల్‌: 35,000 చదరపు    మీటర్లకు విస్తరణ

కొత్తగా...
 

ఇటీవలే రూ.150 కోట్లతో విస్తరించారు. రన్‌వేపై ఇక నుంచి బోయింగ్‌ 747, 777 వంటి భారీ విమానాలు దిగేందుకు వీలుంటుంది. ఒకేసారి 16 విమానాలు నిలిపే సామర్థ్యంతో పార్కింగ్‌ ప్రాంతాన్ని విస్తరించారు.

తిరుపతి

* రన్‌ వే: 2,286 మీటర్లు
* దేశీయంగా నడుస్తున్న విమానాలు: హైదరాబాద్‌, ముంబయి. బెంగళూరు, విజయవాడ, విశాఖపట్నం
* ప్రయాణికుల రద్దీ: 6 లక్షలు

కొత్తగా...
 

* రన్‌వే: 2,286 మీటర్ల నుంచి 3,800 మీటర్లకు విస్తరణ
* అదనపు సౌకర్యం: రన్‌ వే విస్తరణతో అందుబాటులోకి విదేశీ సర్వీసులు.

విశాఖపట్నం

* రన్‌వే: 1) 3,050 మీటర్లు 2) 1,829 మీటర్లు
* టెర్మినల్‌: 20,400 చదరపు మీటర్లు
* దేశీయంగా నడుస్తున్న విమానాలు: బెంగళూరు, కోల్‌కతా, దిల్లీ, హైదరాబాద్‌, ముంబయి, పోర్టు బ్లెయిర్‌, తిరుపతి, అహ్మదాబాద్‌, భువనేశ్వర్‌, చెన్నై, కోయంబత్తూరు, కొచ్చి, ఉదయ్‌పూర్‌.
* విదేశీ సర్వీసులు: దుబాయి, సింగపూర్‌, కౌలాలంపూర్‌, బ్యాంకాక్‌. ప్రయాణికుల రద్దీ: ఏటా 20 లక్షలు

కొత్తగా...
 

* టెర్మినల్‌ బిల్డింగ్‌: రెండు వైపులా 75 చదరపు మీటర్ల విస్తరణ
* అదనపు సౌకర్యం: దేశీయ, అంతర్జాతీయ ప్రయాణికులకు వేర్వేరుగా సౌకర్యాలు
* విమానాలు  నిలిపే ప్రాంతాలు: 8 నుంచి 16కి విస్తరణ

కడప

* రన్‌ వే: 1,719 మీటర్లు
* దేశీయంగా నడుస్తున్న విమానాలు: హైదరాబాద్‌, చెన్నై, విజయవాడ
* ప్రయాణికుల రద్దీ: 55,000

కొత్తగా...
 

* రన్‌ వే: 2,500 మీటర్లకు విస్తరించడంతో విమాన పార్కింగ్‌ స్టాండ్లు మరో నాలుగు అందుబాటులోకి వస్తాయి. కొత్తగా మరికొన్ని విమాన సర్వీసులు నడపొచ్చు.
* ఇతర ఉపయోగాలు: ప్రయాణికుల సంఖ్య ఏడాది వ్యవధిలో లక్షకు చేరుతుందని అంచనా. రూ.10 కోట్లతో ప్రయాణికుల టెర్మినల్‌ను విస్తరిస్తున్నారు. ఉదయం, సాయంత్రం హైదరాబాద్‌కు విమాన సర్వీసులు నడిపే ప్రతిపాదనలున్నాయి.

రాజమహేంద్రవరం

* రన్‌ వే: 1,750 మీటర్లు
* దేశీయంగా నడుస్తున్న విమానాలు: హైదరాబాద్‌, బెంగళూరు, చెన్నై
* ప్రయాణికుల రద్దీ: ఏటా 3 లక్షలు

కొత్తగా...
 

* రన్‌ వే: 1,750 మీటర్ల నుంచి 3,165 మీటర్లకు విస్తరణ
* ఉపయోగం: కోడ్‌-4సీ విమానాశ్రయంగా విస్తరించి 120 నుంచి 180 మంది ప్రయాణికుల సామర్ధ్యంగల ఎయిర్‌ బస్‌, బోయింగ్‌ విమాన రాకపోకలకు వీలుంది. ప్రయాణికుల రద్ధీ కూడా 2019-20 నాటికి 8 లక్షలకుపైగా చేరుకుంటుందని అంచనా.

కేంద్రం చొరవతో ద్వైపాక్షిక ఒప్పందాలు తప్పనిసరి

విశాఖపట్నం, విజయవాడ, తిరుపతి విమానాశ్రయాలకు అంతర్జాతీయ హోదా కల్పించినా విశాఖ నుంచి నాలుగు దేశాలకు ... విజయవాడ నుంచి ఒక దేశానికి విమాన సర్వీసులు నడుస్తున్నాయి. తిరుపతికి అంతర్జాతీయ హోదా కల్పించినా విదేశీ సర్వీసుల్లేవు. ఇతర దేశాలకు విమాన సర్వీసులు నడపాలంటే కేంద్రం ఆయా దేశాలతో ద్వైపాక్షిక ఒప్పందాలు చేసుకోవాల్సి ఉంటుంది. కొత్తగా అనుమతులివ్వకపోవడంతో ఆ ప్రభావం రాష్ట్రంలోని అంతర్జాతీయ సర్వీసులపై కనిపిస్తోంది. కేంద్రం చొరవ తీసుకుంటే విమానాశ్రయాలను అభివృద్ధి చేయడానికి అవకాశం ఉంటుందని పలువురు ప్రయాణికులు అభిప్రాయపడుతున్నారు.

ఇదీ లక్ష్యం

రాబోయే ఐదేళ్లలో అన్ని జిల్లా కేంద్రాల్లో విమానాశ్రయాలు, మండలకేంద్రాల్లో హెలీప్యాడ్‌లు ఏర్పాటు చేయాలన్నది రాష్ట్ర విమానాశ్రయాల అభివృద్ధి సంస్థ ప్రణాళిక.

* విశాఖలో అంతర్జాతీయ విమానాశ్రయ నిర్వహణకు ఏర్పడుతున్న ఆవరోధాలతో భోగాపురంలో రూ.2,300కోట్ల అంచనాతో గ్రీన్‌ఫీల్డ్‌ అంతర్జాతీయ విమానాశ్రయం ఏర్పాటవుతుంది. ఇటీవలే సీఎం చంద్రబాబునాయుడు దీనికి శంకుస్థాపన చేశారు.

* కర్నూలులో రూ.105    కోట్లతో చేపట్టిన విమా  నాశ్రయ పనులు పూర్తవడంతో ఈ ఏడాది జనవరి 8న ప్రారంభమైంది. ఇక్కడి నుంచి చెన్నై, విజయవాడకు మొదటిదశలో విమాన సర్వీసులు నడిపేందుకు యంత్రాంగం ఏర్పాట్లు చేస్తోంది.

* కుప్పంలో రూ.50కోట్లతో ఎయిర్‌ స్ట్రిప్‌ ఏర్పాటుకు ప్రభుత్వం చర్యలు చేపట్టింది. వ్యవసాయఉత్పత్తులు, పండ్లు ఇతర ప్రాంతాలకు రవాణా చేసేందుకు వీలుగా దీనిని నిర్మిస్తున్నారు. వారంలో ఆరు రోజుల పాటు ఇక్కడి నుంచి కార్యకలాపాలు నిర్వహించనున్నారు. ప్రయాణికుల కంటే సరకు రవాణాకు అత్యధిక ప్రాధాన్యమిస్తున్నారు.
 

* నెల్లూరు జిల్లా దగదర్తిలో ప్రయాణికులతో పాటు  సరకు రవాణాకు వీలుగా రూ.362   కోట్లతో విమానాశ్రయ పనులకు యంత్రాంగం    సన్నాహాలు చేస్తోంది.

- ఈనాడు, అమరావతి

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.