close

ప్ర‌త్యేక క‌థ‌నం

నాడి పట్టేదెలా.. బీపీ చూసేదెలా!

పీజీ సీటు కోసం ఇంటర్న్‌షిప్‌నకు ఎంబీబీఎస్‌ విద్యార్థుల డుమ్మా
అనుభవలేమితో సమాజానికి వెలకట్టలేని నష్టం
వ్యవస్థాగత మార్పు అవసరమంటున్న నిపుణులు

అయితరాజు రంగారావు
ఈనాడు - హైదరాబాద్‌

ఆసుపత్రి వార్డులో అర్ధరాత్రి నువ్వొక్కడివే ఉన్నావు.. అకస్మాత్తుగా ఒక రోగికి చాలా పెద్ద పరిమాణంలో రక్తపు వాంతులు అవుతున్నాయి.. ప్రాణ భయంతో ఆ రోగి దీనావస్థలో సహాయం కోసం నీ కళ్లలోకి చూస్తుంటాడు. ఆందోళనలో రోగి బంధువులు ఏదో ఒకటి చేయమని నీ వైపు దీనంగా చూసి వేడుకుంటూ ఉంటారు..  వార్డు నర్సు, వార్డు బాయ్‌ నీ ఆదేశాల కోసం ఎదురు చూస్తుంటారు.
 

నీ మనసులో చెలరేగే ఆందోళన, సందేహాల నడుమ ఏర్పడే సందిగ్ధ సమయంలో.. నీవు స్థిరమైన, సరైన నిర్ణయాన్ని తీసుకునేలా నిన్ను తీర్చిదిద్దడమే వైద్య విద్యలో అనుభవపూర్వక శిక్షణ లక్ష్యం.

- అమెరికాకు చెందిన ప్రముఖ న్యూరాలజిస్టు ఆచార్య హరోల్డ్‌ ఎల్‌ క్లవన్స్‌

నాలుగున్నరేళ్ల వైద్యవిద్య అనంతర అనుభవపూర్వక శిక్షణ(ఇంటర్న్‌షిప్‌) కాలాన్ని ఎక్కువ మంది విద్యార్థులు విస్మరిస్తున్నారు. ఆ సమయాన్ని పీజీ వైద్యవిద్య సీటుకోసం శిక్షణ పొందడానికి ఉపయోగిస్తున్నారు. స్పెషలిస్టు వైద్య విద్య అభ్యసిస్తే తప్ప వైద్యుడిగా నిలదొక్కుకోడానికి అవకాశాల్లేకపోవడంతో పీజీకి డిమాండ్‌ పెరిగిపోయింది. ఒక్క క్లినికల్‌ సీటు కోసం దాదాపు 10 మంది ఎంబీబీఎస్‌ విద్యార్థులు పోటీ పడుతున్నారు. దీంతో ఎంబీబీఎస్‌ పూర్తి కాగానే.. అనుభవపూర్వక శిక్షణను విస్మరించి పీజీ పాఠాలపై దృష్టిపెడుతున్నారు. సాధారణంగా ఆచార్యుల పర్యవేక్షణలో వేర్వేరు వార్డుల్లోకి వెళ్లి.. ఆయా వార్డుల్లో రోగుల స్పందన, వారికి సంబంధించిన వ్యాధులు.. వాటి చికిత్సల గురించి తెలుసుకుంటారు. ఆచార్యుడు చెబుతుంటే వింటారు. అనుభవపూర్వక శిక్షణకొచ్చేసరికి ఇక్కడ కూడా ఆచార్యుల పర్యవేక్షణే ఉన్నా.. నేరుగా రోగికి చికిత్స అందించే అవకాశం లభిస్తుంది. రోగి లక్షణాలను చెప్పినప్పుడు.. ఆ లక్షణాలు ఏ వ్యాధికి దగ్గరగా ఉన్నాయో విషయాన్ని అంచనా వేయడానికి ఉపయోగపడుతుంది. తాను రోగికి అందిస్తున్న వైద్యం సరైనదా కాదా అనే పర్యవేక్షణ ఉంటుంది. తప్పు చేస్తుంటే సరిదిద్దుకోడానికి మార్గదర్శనం దొరుకుతుంది. కనీసం నాడి పట్టి చూడడం, రక్తపోటును పరీక్షించడం, పొట్టను తడిమి చూడడం, ఛాతీ, గుండె పనితీరును స్టెతస్కోప్‌తో అంచనా వేయడం.. ఇలాంటి సాధారణ, ప్రాథమిక పరీక్షలను ఎలా చేయాలో కూడా నేర్చుకోకపోతే సమాజానికి జరిగే నష్టం విలువకట్టలేనిది. ఏడాది పాటు కచ్చితంగా పొందాల్సిన అనుభవపూర్వక శిక్షణకు వైద్యవిద్యార్థులు డుమ్మాకొడుతున్న వైఖరి, దాని ప్రాధాన్యం, అవసరమైన మార్పులపై ‘ఈనాడు’ అందిస్తున్న పరిశీలనాత్మక కథనం..

వైద్యం కోసం ఆసుపత్రులకు వెళ్లినప్పుడు డాక్టర్‌ ప్రఖ్యాతికి చిహ్నంగా పేరు పక్కన పీజీ తదితర డిగ్రీలు ఘనంగా కనిపిస్తాయి. సందేహం లేదు... వారు కచ్చితంగా రాత్రింబవళ్లు కష్టపడి చదివి ఆ విజయాలను సొంతం చేసుకున్నవారై ఉంటారు. దానికి అనుభవం కూడా తోడైతే రోగి చెప్పే లక్షణాలను బట్టి రోగాన్ని ఇట్టే పసిగట్టి చక్కటి వైద్యం చేయడానికి వీలుంటుంది. కానీ, ఎంబీబీఎస్‌ చదివిన చాలామంది ఆ అనుభవం పొందడానికి వెచ్చించాల్సిన సమయాన్ని పీజీ డిగ్రీ సంపాదించడానికి ప్రధాన అడ్డంకిగా భావిస్తున్నారు. వాస్తవానికి ఏడాది పాటు అన్ని విభాగాల్లోనూ అనుభవపూర్వక శిక్షణ పొందాలి. ఒక నెల రోజులు గైనకాలజీ, రెణ్నెల్లు జనరల్‌ మెడిసిన్‌, మరో నెల జనరల్‌ సర్జరీ, ఇలా అన్ని విభాగాల్లో పనిచేయాలి. కానీ ఈ అనుభవపూర్వక శిక్షణను నిర్లక్ష్యం చేస్తున్నారు.

ప్రస్తుతం ఏం జరుగుతోంది?
* ఉదాహరణకు ఉస్మానియాలో 250 ఎంబీబీఎస్‌ సీట్లు, గాంధీ ఆసుపత్రిలో 200 సీట్లుంటే.. వీరికి అదనంగా వేర్వేరు కళాశాలల నుంచి వచ్చిన వారిని కూడా ఒక్కో కళాశాలలో 200 మందిని ఇంటర్న్‌షిప్‌ కింద చేర్చుకుంటున్నారు. ప్రభుత్వ వైద్య కళాశాలల్లోని విద్యార్థుల్లో దాదాపు 50 శాతం మందికి పైగా విధులకు గైర్హాజరవుతుంటే.. వేర్వేరు కళాశాలల్నుంచి వచ్చి ఇంటర్న్‌షిప్‌ చేస్తున్నవారిలో దాదాపు 80 శాతం మంది అస్సలు విధులకు హాజరు కావడంలేదు.

* కొందరు ఇంటర్న్‌షిప్‌లో చేరి, ఉన్నత విద్య కోసం విదేశాలకు వెళ్తున్నారు. ఏడాది తర్వాత వచ్చి ఇంటర్న్‌షిప్‌ పూర్తి చేసుకున్నట్లుగా ధ్రువపత్రాలను పొందుతున్నారు. కొందరు ఆచార్యులు, సంబంధిత సెక్షన్‌ అధికారులు కుమ్మక్కై ముడుపులు పొంది ఈ తరహాలో తప్పుడు ధ్రువపత్రాలను జారీ చేస్తున్నారనే విషయాన్ని వైద్య విద్య సంచాలకుడు కూడా గుర్తించారు.

* బయోమెట్రిక్‌ హాజరు విధానం అమల్లోకి తీసుకొచ్చినా.. ఆచరణలో దాన్ని నిర్వీర్యం చేశారు. హాజరు పట్టికను సరిచూసే సిబ్బందిని మచ్చిక చేసుకొని విధులకు హాజరు కాకున్నా వచ్చినట్లుగా తప్పుడు ఆధారాలు సృష్టిస్తున్నారు.

* మరోవైపు ప్రైవేటు వైద్యకళాశాలల్లో పరిస్థితి మరీ ఘోరంగా ఉంది. అధిక శాతం ప్రైవేటు వైద్యకళాశాలలకు పక్కాగా అనుబంధ ఆసుపత్రులే లేవు. కొన్నింటికి అనుబంధ ఆసుపత్రులు ఉన్నా..వాటిల్లో అనుభవపూర్వక శిక్షణ పొందుతున్నారా లేదా అనే పర్యవేక్షణ చేసేవారే కరవయ్యారు. అనుభవపూర్వక శిక్షణ విషయంలో కాళోజీ నారాయణరావు ఆరోగ్య విశ్వవిద్యాలయం తనకేమీ పట్టనట్లుగా వ్యవహరిస్తోందనే విమర్శలువినిపిస్తున్నాయి.


అనుభవపూర్వక పరిజ్ఞానం లేకపోతే..

* మామూలు చికిత్సలకూతడుముకోవాల్సి ఉంటుంది.

* ఉదాహరణకు బాగా డీహైడ్రేషన్‌(ఒంట్లో నీటి శాతం తగ్గిపోవడం)తో ఒక రోగి వచ్చాడనుకోండి. ఈ స్థితిలో రోగికి సెలైన్‌ ఎక్కించాలి. అయితే డీహైడ్రేషన్‌ అయిన రోగికి సాధారణంగా రక్తనాళాలు ఒకపట్టాన దొరకవు. ఇలాంటప్పుడు చికిత్స అందించడం కష్టం.

* ఒక రోగి ఉన్నట్టుండి కుప్పకూలిపోతాడు. అప్పటికప్పుడు ఆక్సిజన్‌ గొట్టాన్ని గొంతులోకి పెట్టి, ప్రాణవాయువు అందించాలి. అనుభవపూర్వక శిక్షణ పొందకపోతే వైద్యుడు నిస్సహాయ స్థితిలో ఉండిపోవాల్సి వస్తుంది.

* గుండెపోటు రోగి వచ్చాడనుకుందాం. దానికి సంబంధించిన ఔషధాలన్నింటినీ నిమిషాల్లోనే గబగబా ఇవ్వాలి. శిక్షణ లేకపోతే గాబరాపడిపోవడం తప్ప ఏమీచేయలేడు.

ఏడాది కాదు రెండేళ్లుండాలి

బ్రిటన్‌ వంటి పలు పాశ్చాత్య దేశాల్లో తొలి ఏడాది నుంచే అనుభవపూర్వక శిక్షణ కోసం ఏర్పాట్లు ఉంటాయి. వార్డుల్లో, అత్యవసర చికిత్స కేంద్రాల్లో ఇంటర్న్‌షిప్‌వాళ్లు ఎక్కువ సమయం గడపడాన్ని ప్రోత్సహిస్తున్నారు. మన వద్ద ఈ ఏడాది కాకపోతే మరో ఏడాది పీజీ సీటు పొందొచ్చు. కానీ ఈ ఇంటర్న్‌షిప్‌ ఏడాది అనుభవాన్ని పొందలేకపోతే.. మరెప్పుడూ పొందలేరు. నిజానికి ఈ శిక్షణను రెండేళ్లు పెడితే ఇంకా బాగుంటుంది.
-డాక్టర్‌ నరేంద్రనాథ్‌, నిమ్స్‌ మాజీ సంచాలకుడు

కఠిన చర్యలు తప్పవు

డుమ్మాలు కొట్టిన రోజుల శిక్షణను పొడిగించాలని నిర్ణయించాం. కచ్చితంగా బయోమెట్రిక్‌ హాజరు విధానాన్ని అమలు చేయాలని ఆదేశించాం. ప్రతి బోధనాసుపత్రిలోనూ ముగ్గురు సభ్యుల ఉన్నతస్థాయి వైద్యుల కమిటీని నియమించాం. ఈ కమిటీ అనుభవపూర్వక శిక్షణ వైద్యుల హాజరును పరిశీలించి అనుమతిస్తేనే.. సూపరింటెండెంట్‌ కార్యాలయం ‘శిక్షణ పొందినట్లుగా గుర్తింపు పత్రాన్ని’ ఇవ్వాల్సి ఉంటుంది. ఈ విషయంలో ఎవరు నిబంధనలు ఉల్లంఘించినా వారిపై కఠిన చర్యలు తప్పవు.
- డాక్టర్‌ రమేశ్‌రెడ్డి, వైద్య విద్య సంచాలకుడు

వ్యవస్థాగతంగా  మార్పు చేయాలి

అనుభవపూర్వక శిక్షణ రెండో ఏడాది నుంచే రావాలి. ఐదేళ్లు పూర్తయ్యేసరికి విద్యార్థుల్లో అనుభవం పెరుగుతుంది. ఈ మేరకు వ్యవస్థాగతంగా మార్పు చేయాలి. విద్యార్థులు కూడా తొలి ఏడాది నుంచే పీజీ వైద్యవిద్యలో సీటు సాధించడంపై దృష్టిపెట్టాలి. అంతేగానీ విలువైన అనుభవపూర్వక శిక్షణకు దూరం కావద్దు.
-డాక్టర్‌ శ్రీనివాస్‌, జూడాల సలహాదారు

పీజీ సీట్లు పెంచాలి

పీజీ సీట్లు తక్కువగా ఉండడం వల్ల అనుభవపూర్వక శిక్షణకు దూరమై మరీ చదువుతున్నారు. దేశవ్యాప్తంగా పీజీ సీట్లను పెంచడం ద్వారా విద్యార్థులపై ఒత్తిడి తగ్గుతుంది. అప్పుడు అనుభవపూర్వక శిక్షణపైనా దృష్టిపెట్టగలుగుతారు.
-డాక్టర్‌ విజేందర్‌, తెలంగాణ జూడాల ఐకాస అధ్యక్షుడు

కొనుగోలును నియంత్రించాలి

కొందరు డబ్బున్న వైద్యవిద్యార్థులు అనుభవపూర్వక శిక్షణ చేయకుండా పీజీ శిక్షణపైనే దృష్టిసారిస్తున్నారు. వారి స్థానంలో మరో పేద విద్యార్థికి డబ్బులిచ్చి పని చేయిస్తున్నారు. అందరూ తప్పనిసరిగా అనుభవపూర్వక శిక్షణలో పాల్గొనేలా చర్యలు తీసుకోవాలి.
-డాక్టర్‌ నరేశ్‌, ఉస్మానియా జూడాల అధ్యక్షుడు

 

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.