close

ప్ర‌త్యేక క‌థ‌నం

కేంద్రం గుప్పిట రాష్ట్రాల నిధులు 

ఐజీఎస్టీలో రాష్ట్రాల వాటాకు గండి 
రాష్ట్రాలకు చెందాల్సిన నిధులు సంచిత నిధిలోనా? 
కొత్త వివాదాలకు కేంద్రం తెర లేపుతోంది 
జీఎస్టీపై అధ్యయనం చేసిన రిటైర్డ్‌ ఐఏఎస్‌ అధికారి వి.భాస్కర్‌ 
ఈనాడు - హైదరాబాద్‌

జీఎస్టీలో భాగంగా కేంద్రం వసూలు చేస్తున్న ఐజీఎస్టీలో రాష్ట్రాలకు పంచుతున్న విధానం రాజ్యాంగ విరుద్ధం. చట్ట వ్యతిరేకం. 
ఐజీఎస్టీకి సంబంధించి మిగులు నిధుల్లో సగం నిధులు కేంద్రం పొందడానికి ఎలాంటి చట్ట ప్రాతిపదిక లేదు.  
ఐజీఎస్టీ నిధులను కేంద్రం రాబడిగా చూపుతూ భారత సంచిత నిధిలో జమ చేస్తుండటంతో రాష్ట్రాలకు రావాల్సిన వాటాలో గండిపడుతోంది.

‘కేంద్రం, రాష్ట్రాల మధ్య ఆర్థిక సమాఖ్య అనేది మాటలకే పరిమితమవుతోంది.. 19 నెలల క్రితం పన్నుల వ్యవస్థలో విప్లవాత్మక మార్పుగా తీసుకొచ్చిన వస్తు, సేవల పన్ను (జీఎస్టీ)లో రాష్ట్రాలకు న్యాయబద్ధమైన వాటా దక్కడంలేదు’ అని జీఎస్టీపై అధ్యయనం చేసిన రిటైర్డ్‌ ఐఏఎస్‌ అధికారి డా. వి.భాస్కర్‌ పేర్కొన్నారు. పన్నుల మదింపు, రాష్ట్రాల వాటా బదిలీకి సంబంధించి ప్రస్తుతం అనుసరిస్తున్న విధానం వివాదాస్పదంగా ఉందన్నారు. తత్ఫలితంగా రాష్ట్రాలు తీవ్రంగా నష్టపోయే పరిస్థితి ఏర్పడినట్లు ఆయన విశ్లేషించారు. ‘‘కేంద్ర ప్రభుత్వం వసూలు చేస్తున్న పరిహార పన్ను(కాంపెన్సేషన్‌ సెస్‌)ను,  ఐజీఎస్టీ(సమీకృత వస్తు సేవల పన్ను) రాబడిని పబ్లిక్‌ అకౌంట్‌లో చూపించాలి. ఇలా కాకుండా భారత సంచిత నిధిలో జమచేయడం వల్ల రాష్ట్రాలకు రావాల్సిన మేర జీఎస్టీ రాబడి వాటా రావడంలేదు. మరో పక్క కేంద్ర ప్రభుత్వం ఈ సొమ్మును తన తాత్కాలిక అవసరాలకు, వ్యయాలకు వినియోగించుకొనే అవకాశం కలుగుతోంది. ఇంకో విషయమేమంటే ఐజీఎస్టీ రిఫండ్‌లు, జీఎస్టీ రాబడి తక్కువగా ఉన్న రాష్ట్రాలకు పరిహారం చెల్లింపులో జాప్యం చోటుచేసుకుంటోంది. ఐజీఎస్టీ రిఫండ్‌లు ఆలస్యం కావడంవల్ల ఎగుమతిదార్లు, ఉత్పత్తిదార్లు, వర్తకులకు నష్టం జరుగుతోంది. పరిహారం చెల్లింపులో జాప్యం వల్ల రాష్ట్ర ప్రభుత్వాలు ఆర్థిక ఇబ్బందులº్ల పడిపోతున్నాయి.   ఇది కొత్త వివాదాలకు కేంద్ర బిందువుగా మారడమే కాదు, రాష్ట్రాల ఆర్థిక పరిస్థితిని బలహీనపరుస్తోంది. రాష్ట్రాలకు వాటాగా రావాల్సిన మొత్తాన్ని కూడా సంచిత నిధిలో జమ చేసి కేంద్రం తన ఆదాయంగా చూపిస్తోంది. 2017-18లో ఇలా జమచేసిన మొత్తం రూ.1,33,623 కోట్లు. 

పరిహారం ఎలా నిర్వహించాలంటే 
నిబంధనల ప్రకారం 2017-18లో పరిహార పన్ను ద్వారా వసూలైన మొత్తాన్ని జీఎస్టీ పరిహార నిధికి జమ చేయాలి. కేంద్రం అలా చేయలేదు. వసూలైన పరిహార పన్ను రూ.62,612 కోట్లకు గాను కేవలం రూ.56,146 కోట్లు మాత్రం ఈ నిధికి బదిలీ చేసింది. మిగిలిన రూ.6,466 కోట్లు సంచిత నిధిలో ఉంచింది. 2017-18, 2018-19లో పూర్తి స్థాయిలో పరిహార నిధికి జమ చేయకుండా ఆదాయంగా చూపి సంచిత నిధికి బదలాయించిన మొత్తం రూ.45,091 కోట్లు. 
ఐజీఎస్టీలో ఇష్టారాజ్యం 
ఐజీఎస్టీ వసూళ్లు జులై 2017 నుంచి మార్చి 2018 వరకూ రూ.3,87,356 కోట్లు. ఇందులో సీజీఎస్టీ తదితర సర్దుబాట్ల అనంతరం ఐజీఎస్టీ నికర వసూళ్లు రూ.1,68,623 కోట్లు. ఇందులో రూ.35 వేల కోట్లు కేంద్రం, రాష్ట్రాల మధ్య తాత్కాలిక సర్దుబాటు అనంతరం మిగిలిన మొత్తం రూ.1,33,263 కోట్లు. ఇంత పెద్ద మొత్తం కేంద్రం వద్ద మిగులుగా ఎలా ఉంది? ఈ మొత్తం ఎంతంటే 2017-18 ఆర్థిక సంవత్సరానికి కేంద్ర ద్రవ్యలోటులో 22 శాతం (ద్రవ్యలోటు రూ.5,91,064 కోట్లు). పోనీ రూ.1,33,263 కోట్లలో సగం వెనక్కి చెల్లించాల్సిన (రిఫండ్‌) మొత్తం అనుకున్నా కేంద్రం వాటాగా ఉండాల్సింది రూ.66,812 కోట్లు మాత్రమే. ఈ మొత్తంతో బాటు తాత్కాలిక సర్దుబాట్లలో భాగంగా రూ.17,500 కోట్లను కేంద్ర వాటాగా తీసుకుంది. ఈ నేపథ్యంలో కేంద్రానికి దక్కిన మొత్తం రూ.84,312 కోట్లు.రాష్ట్రాలకు ఎక్కువ మొత్తం వచ్చేందుకు ఉన్న అవకాశాన్ని తాత్కాలిక సర్దుబాటు విధానం దూరం చేస్తుంది. ఏప్రిల్‌ 2018 నుంచి డిసెంబరు 2018 మధ్య రూ.1,10,000 కోట్లను తాత్కాలికంగా సర్దుబాటు చేశారు. 
కేంద్ర లెక్కల్లో తేడాలా? 
2017-18లో వసూలైన పరిహార పన్ను రూ.62,616 కోట్లు. ఇందులో రూ.109 కోట్లు తిరిగి చెల్లించాల్సిన మొత్తం. మిగిలిన దాంట్లో రూ.41,483 కోట్లు రాష్ట్రాలకు పరిహారంగా నాలుగు వాయిదాల్లో చెల్లించారు. మిగిలిన నిల్వ మొత్తం రూ.21,024 కోట్లే కాగా బడ్జెట్‌ డాక్యుమెంట్లలో ఈ మొత్తాన్ని రూ.62,612 కోట్లుగా చూపారు’’ అని భాస్కర్‌ వివరించారు.

జీఎస్టీ చట్టం ప్రకారం...

రాజ్యాంగంలోని ఆర్టికల్‌ 269ఎ (1) ప్రకారం ఐజీఎస్టీని కేంద్ర ప్రభుత్వం, రాష్ట్ర ప్రభుత్వం మధ్య జీఎస్టీ చట్టంప్రకారం పంపిణీ చేయాలి. ఐజీఎస్టీలో చెల్లింపులు చేయాల్సిన మొత్తం మినహాయించి మాత్రమే ఐజీఎస్టీ రాబడిగా ఉండాలి. ఈ మిగులు నిధులను కేంద్రం, రాష్ట్రాల మధ్య సమానంగా పంచాలి. రాష్ట్రాల వాటాను సంచిత నిధి వెలుపల ఉంచాలి. రాజ్యాంగ విరుద్ధంగా, ఐజీఎస్టీ చట్టం నిర్దేశించినట్లు కాకుండా ఐజీఎస్టీ వసూళ్లను భారత సంచిత నిధిలో జమచేస్తున్నారు. దీని వల్ల రాష్ట్రాలకు రావాల్సిన మొత్తం తగ్గిపోతోంది. ఐజీఎస్టీ మిగులులో 50 శాతం కేంద్రానికి, మరో 50 శాతం నిధులను రాష్ట్రాలకు పంచినపుడే చట్టం స్ఫూర్తిమేరకు అమలైనట్లు.

ప్రాతిపదికలు సరిగా లేవు

కేంద్రం ఐజీఎస్టీ మిగులు నిధులను రాష్ట్రాలకు పంపిణీకి తీసుకుంటున్న ప్రాతిపదికలు సరికాదు. ఐజీఎస్టీ చట్టాన్ని కేంద్రం సవరించిన తీరు రాష్ట్రాలకు నష్టం కలిగిస్తుంది. ఐజీఎస్టీ చెల్లింపులకు 2015-16 సంవత్సరాన్ని ప్రాతిపదికగాతీసుకున్నారు. రాష్ట్రాలకు జీఎస్టీ చట్టం ప్రకారం పరిహారం చెల్లించేందుకు తీసుకుంటున్న ప్రాతిపదిక వేరుగా ఉంది. ప్రతిసారి అంతకుముందు సంవత్సరం రాబడి అంచనాలకు 15% అదనంగా లెక్కిస్తున్నారు. జీఎస్టీ పన్ను రాబడిలో సమర్థంగా వ్యవహరిస్తున్న రాష్ట్రాలకు ప్రోత్సాహం లేకపోవడం సరికాదు.

ఆర్థిక శాస్త్రంలో డాక్టరేట్‌ కలిగిన భాస్కర్‌ ఉమ్మడి ఆంధ్రప్రదేశ్‌లో ఆర్థిక శాఖ ప్రత్యేక ప్రధాన కార్యదర్శిగా పని చేసి పదవీ విరమణ చేశారు. 
15వ ఆర్థిక సంఘం 2011 జనాభా లెక్కలను ఆధారం చేసుకోవడం వల్ల అభివృద్ధి చెందిన.. ప్రత్యేకించి దక్షిణాది రాష్ట్రాలకు తీవ్ర నష్టం జరుగుతుందంటూ ఈయన లెవనెత్తిన అంశాలు జాతీయ స్థాయిలో చర్చకు తెరదీశాయి. 
‘కేంద్రం - రాష్ట్రాల మధ్య జీఎస్టీ రాబడుల పంపిణీ - లోపించిన ఆర్థిక సమాఖ్య స్ఫూర్తి’ అనే అంశంపై అధ్యయనం చేశారు. మద్రాసు స్కూల్‌ ఆఫ్‌ ఎకనామిక్స్‌ ఇటీవల ఏర్పాటు చేసిన సదస్సులో అధ్యయన పత్రాన్ని సమర్పించారు. 
జీఎస్టీ ప్రారంభించిన తర్వాత 19 నెలల్లో దాని ప్రభావం ఎలా ఉంది, కేంద్ర-రాష్ట్రాల మధ్య జీఎస్టీ ఆదాయం పంపిణీ తదితర అంశాలను అందులో ప్రస్తావించారు.


తిరిగి చెల్లింపులపై ప్రభావం

క రాష్ట్రం నుంచి డీలర్‌ ఇంకో రాష్ట్రానికి సరకు పంపితే, సరకు స్వీకరించిన డీలర్‌ ఐజీఎస్టీ చెల్లిస్తారు. తర్వాత ఆ వ్యక్తి ఇన్‌పుట్‌ ట్యాక్స్‌ క్రెడిట్‌కు దరఖాస్తు చేస్తారు. ఇలా తిరిగి చెల్లించాల్సిన మొత్తం సంచిత నిధిలో భాగం కాకూడదు. ఐజీఎస్టీ వసూళ్లను కేంద్రం పబ్లిక్‌ అకౌంట్‌లో రిజర్వ్‌ ఫండ్‌గా ఉంచాలి. ఇప్పుడు సంచిత నిధిలో జమ చేస్తున్నారు. దీనివల్ల తర్వాత సర్దుబాట్లపై తీవ్ర ప్రభావం పడుతుంది.

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.