close

ప్ర‌త్యేక క‌థ‌నం

పచ్చటి సంకల్పం

వ్యవసాయ సంస్కరణ, ఆహార భద్రతకు నడుంకట్టిన ఐబీఎం

వ్యవసాయం దండగమారి వ్యవహారం, ఎంత కష్టపడ్డా రైతుకు నష్టమే తప్ప మిగిలేది ఏముంది.. అనుకుంటూ ఎంతకాలం కూర్చుంటాం? దీన్ని చక్కదిద్దలేమా?.. కచ్చితంగా సరిదిద్దగలం అంటోంది ఐటీ దిగ్గజం ఐబీఎం. 
ఐటీ కంపెనీ వ్యవసాయ రంగంలో ఏం చేస్తుందని ఆశ్చర్యపోకండి.. 
అత్యాధునిక సాంకేతిక పరిజ్ఞానాన్ని వినియోగిస్తూ అంతర్జాతీయంగా వ్యవసాయ రంగాన్ని కొత్త పుంతలు తొక్కించేందుకు, ఆహార సరఫరాలో విప్లవాత్మక మార్పులు తెచ్చేందుకు ఐబీఎం బృహత్తర కార్యక్రమాన్ని చేపట్టింది. రాబోయే ఐదేళ్లలో సాగు నుంచి సరఫరా వరకూ ప్రతి దశలోనూ మార్పులు తెచ్చి.. రైతు నుంచి వినియోగదారుడి వరకూ ప్రతి ఒక్కరిలోనూ విశ్వాసాన్ని నింపేందుకు చేపట్టిన ఈ కార్యక్రమంపై ప్రత్యేక కథనం.

ఐబీఎం కీలక లక్ష్యాలు.. 
1. అత్యాధునిక సాంకేతిక పరిజ్ఞానంతో  
వ్యవసాయ రంగ సమగ్ర సంస్కరణ 
2. సురక్షితమైన ఆహార లభ్యత పెంచటం  
3. సాగు పరిశోధనలను ముమ్మరం చేయటం 
4. ఆహార సంబంధ వ్యాధులను నివారించటం 
5. అన్ని దశల్లో వృథాను అరికట్టడం  
6. వ్యవసాయ దిగుబడులు పెంచడం  
7. అత్యుత్తమ నీటి నిర్వహణ  
8. ప్లాస్టిక్‌ వాడకాన్ని గణనీయంగా తగ్గించటం

ఇవీ ఐబీఎం అస్త్రాలు

వ్యవసాయ డిజిటలీకరణ

బ్లాక్‌చైన్‌ టెక్నాలజీ

కృత్రిమ మేథ 

ఇంటర్నెట్‌ ఆఫ్‌ థింగ్స్‌ 

అల్గోరిథమ్స్‌ 

ఆహారం కోసం ఐబీఎం 
భవిష్యత్‌ ఆహార అవసరాలు తీర్చే 
దిశగా ఐబీఎం విస్తృత పరిశోధనలు 
ఫుడ్‌ సప్లై చైన్‌లో విప్లవాత్మక మార్పులు

ఒకవైపు ప్రపంచవ్యాప్తంగా వ్యవసాయ రంగం సంక్షోభంలో ఉంది. మరోవైపు వచ్చే ఐదేళ్లలో ప్రపంచ జనాభా 800 కోట్లను దాటబోతోంది. వీరందరికీ ఆహారాన్ని సమకూర్చడం పెను సవాలే. అందుకే రేపటి అవసరాలకు తగ్గట్లుగా పరిస్థితిని చక్కదిద్దేందుకు ఐబీఎం తనవంతు కృషి ఆరంభించింది.

వ్యవసాయం డిజిటలీకరణ

ప్రపంచవ్యాప్తంగా వ్యవసాయానికి ఎదురవుతున్న అతిపెద్ద సమస్య- సమాచారం లేకపోవటం! ఎక్కడ ఏ పంట అవసరం ఎక్కువగా ఉంది? ఎక్కడ ఏ పంట బాగా పండుతోంది? ఈ క్రమంలో ఎదురవుతున్న సమస్యలేమిటి? ఇలా ప్రపంచ వ్యవసాయానికి సంబంధించిన సమస్త సమాచారమూ అందరికీ అందుబాటులో ఉంటే.. దానికి తగ్గట్టుగా నిర్ణయాలు తీసుకునే వీలుంటుంది. కానీ దీన్ని సాకారం చేయటం అంత తేలికా? అందుకే దీని కోసం ఇప్పుడు ఐబీఎం.. భారీఎత్తున ‘వ్యవసాయ డిజిటలీకరణ’ను తలపెట్టింది. దీన్నే ‘డిజిటల్‌ ట్విన్‌’ అనీ అంటున్నారు. వచ్చే ఐదేళ్లలో అందుబాటులోకి రానున్న ఈ సమాచారంతో- రైతు మెరుగైన పంటలు పండించే వీలుంటుంది. వినియోగదారుడికి తక్కువ ధరలోనే ఆహారం దొరుకుతుంది. రైతుకు పరపతినిచ్చే బ్యాంకులకు కూడా ఈ డిజిటలీకరణ డేటా ఉపయోగపడుతుంది. వ్యవసాయ రంగంలో అందరికీ సమాన అవకాశాలు దక్కుతాయి. ఫలితంగా వ్యవసాయ ఆర్థిక వ్యవస్థ బలంగా అవతరిస్తుంది. 
వ్యవసాయ భూమి నమూనా సృష్టి: మ్యాపులు, ఉపగ్రహాలు, వాతావరణం, డ్రోన్లు, ఇంటర్నెట్‌ ఆఫ్‌ థింగ్స్‌.. తదితరాల ద్వారా సమాచారాన్ని సేకరించి... టెరాబైట్లకొద్దీ సమాచారాన్ని ప్రాసెస్‌ చేయడానికి ఐబీఎం ఒక వ్యవసాయ భూమి నమూనాను సృష్టిస్తోంది. దీనికోసం ‘ఐబీఎం పెయిర్స్‌ జియోస్కోప్‌’ అనే వేదికను రూపొందిస్తోంది. ఈ వేదిక సమాచారం రైతులు, విక్రేతలు, వినియోగదారులు, ప్రభుత్వాలు.. ఇలా అందరికీ ఉపయోగపడుతుంది. 
భూగర్భ జలాల వెలికితీత విశ్లేషణ: భూగర్భ జలాలు ఎలా ఉన్నాయి? ఎంత వెలికితీస్తున్నారన్నది సెన్సర్ల ద్వారా గుర్తించి క్రోడీకరించే సరికొత్త పరిజ్ఞానాన్ని ఐబీఎం శాస్త్రవేత్తలు కెన్యాలో అభివృద్ధి చేస్తున్నారు. ఇది నీటి లీకేజీలు, నీటి చౌర్యం, మీటరింగ్‌లో లోటుపాట్లను కూడా గుర్తిస్తుంది.  
రైతుల సాయానికి హలో ట్రాక్టర్‌: చిన్నతరహా రైతులకు వ్యవసాయ పనిముట్ల సమాచారాన్ని అందించటానికి ‘హలో ట్రాక్టర్‌’ పేరుతో ఆఫ్రికా, ఆసియాల్లో ఇప్పటికే ‘అగ్రి స్టార్టప్‌’ పనిచేస్తోంది.  
ఐబీఎం వాట్సన్‌ డెసిషన్‌ ప్లాట్‌ఫాం: భూసారం, నీటి సరఫరా, తెగుళ్లు, అతివృష్టి, వేడి/చల్లటి వాతావరణం.. తదితర వివరాలన్నింటినీ వివిధ వేదికల ద్వారా రైతులకు చేరువచేసి.. తదనుగుణంగా వారు నిర్ణయాలు తీసుకునేలా తోడ్పడడం.. ఐబీఎం సృష్టిస్తున్న ఈ ప్లాట్‌ఫాం ప్రత్యేకత.

ఏం చేస్తుంది?

వ్యవసాయ దిగుబడుల పెంపు, ఆహార వృథాను అరికట్టడంలో రైతులకు సహకారం. 
మనుషులకు ఆహార సంబంధ జబ్బులు రాకముందే ఆహారంలోని వ్యాధికారకాలు, కలుషితాలను గుర్తించి, రక్షిత నెట్‌వర్క్‌ను ఏర్పాటుచేయడం. 
 
ఆహార సరఫరా శ్రేణి(ఫుడ్‌ సప్లై చైన్‌)లోని ప్రతి దశలో ఉన్న లోపాల పరిష్కారం 
పంట భూములు, సముద్రాలు ప్లాస్టిక్‌ వ్యర్థాలతో నిండిపోకుండా సరికొత్త మార్గాల అన్వేషణ.

సాంకేతికతతో వృథాకు అడ్డుకట్ట

హార, వ్యవసాయ రంగాలకు ‘వృథా’ అన్నది పెనుశాపంగా తయారైంది. దీన్ని అరికట్టడం తక్షణావసరం. అందుకే ఎంత విత్తనం వేయాలి? దానికోసం ఎంత కొనుగోలు చెయ్యాలి?.. ఇలాంటి సమస్త
సమాచారమూ రైతుల నుంచి కిరాణా సరఫరాదారుల వరకూ ప్రతి ఒక్కరికీ అందుబాటులోకి వచ్చేలా సాంకేతిక పరిజ్ఞానాన్ని  వాడనున్నారు. బ్లాక్‌చైన్‌ టెక్నాలజీ, ఐఓటీ పరికరాలు, కృత్రిమ మేథ అల్గోరిథమ్స్‌.. ఇవన్నీ వృథాను అరికట్టడంలో, వినియోగదారులకు తాజా ఆహారం చేరేలా చూడటంలో కీలక పాత్ర పోషిస్తాయి.  
ఐబీఎం ఫుడ్‌ ట్రస్ట్‌: ఆహార సరఫరా శ్రేణిలోని ప్రతి సభ్యుడికీ విశ్వసనీయ సమాచారాన్ని చేరవేయడం కోసం ‘ఐబీఎం ఫుడ్‌ ట్రస్ట్‌’ పేరిట అత్యంత భద్రతతో కూడిన డిజిటల్‌ లెడ్జర్‌ను గత ఏడాది అక్టోబర్‌లో ఐబీఎం ప్రారంభించింది. బ్లాక్‌చైన్‌ సాంకేతిక పరిజ్ఞానంతో ఇది పనిచేస్తుంది. మన ఆహార పర్యావరణ స్వరూపాన్ని మార్చేసే కొత్త టెక్నాలజీ ఇది. విత్తనం నుంచి ఆహారాన్ని భుజించేదాకా అన్ని దశల్లోనూ పటిష్ఠ నిఘా, వృథా నియంత్రణ కోసం ఐఓటీ సెన్సర్లు, ఏఐ అల్గారిథమ్స్‌ను సమ్మిళితం చేయడం ద్వారా బ్లాక్‌చెయిన్‌ టెక్నాలజీని తదుపరి దశలోకి తీసుకువెళ్లడానికి శాస్త్రవేత్తలు కృషిచేస్తున్నారు. 

సూక్ష్మజీవులతో ఆహార భద్రత

హారం కలుషితం కావటం పెద్ద సమస్య. ఆహారంలో చేరే చెడ్డ బ్యాక్టీరియాను వేగంగా గుర్తించటం ఎంత అవసరమో.. మంచి బ్యాక్టీరియాను ప్రవేశపెట్టటం ద్వారా ఆహారాన్ని సురక్షితంగా మార్చుకోవటం కూడా అంతే ముఖ్యమని పరిశోధకులు భావిస్తున్నారు. ఇందుకోసం మొత్తం సూక్ష్మజీవుల ‘మ్యాపింగ్‌’ను పూర్తిచేయబోతున్నారు. ఈ సూక్ష్మజీవుల సమాచారాన్ని ఉపయోగించుకుని.. వ్యవసాయ క్షేత్రాలు, ఫ్యాక్టరీలు, కిరాణా స్టోర్లలో ఆహారంలోకి తరచూ ఈ మేలుచేసే సూక్ష్మక్రిములను ప్రవేశపెడుతుంటారు. ఆహార భద్రత దిశగా ఇదో పెద్ద మైలురాయి అవుతుందని భావిస్తున్నారు. అంతేకాదు, డీఎన్‌ఏ, ఆర్‌ఎన్‌ఏ క్రమాన్ని వినియోగించుకుని సూక్ష్మజీవుల ప్రొఫైల్‌ను శాస్త్రవేత్తలు త్వరలో తయారుచేయబోతున్నారు. దీనివల్ల సూక్ష్మజీవుల ప్రవర్తనను అర్థంచేసుకోవడానికి వీలవుతుంది. ఉదాహరణకు హఠాత్తుగా ఒక చోట.. పందిమాంసం సాసేజ్‌లో హానికారక బ్యాక్టీరియా బయటపడిందనుకోండి, దాని ఆనుపానులన్నీ క్షణాల్లో గుర్తించడానికి ఈ ప్రొఫైల్‌ ఉపయోగపడుతుంది. 

కలుషితాల గుర్తింపు

రాబోయే ఐదేళ్లలో ఆహార భద్రతా ఇన్‌స్పెక్టర్లకు ఓ సరికొత్త ఆయుధం అందుబాటులోకి రానుంది. ఐబీఎం.. ఆహారంలో ఉన్న వ్యాధికారక కలుషితాలను ఇట్టే పసిగట్టే కృత్రిమ మేథ(ఏఐ) సెన్సర్లను అభివృద్ధి చేస్తోంది. ఈ సెన్సర్లను సెల్‌ఫోన్‌లో లేదా వంటింటి బల్ల (కౌంటర్‌టాప్‌) మీద అమరుస్తారు. వీటితో కలుషితాలను తేలికగా గుర్తించొచ్చు. ఇవి ఈకొలి, సాల్మొనెల్లా వంటి ప్రమాదకర సూక్ష్మజీవుల్ని సెకెన్లలోనే గుర్తిస్తుంది. ఈ సెన్సర్‌ను స్మార్ట్‌ఫోన్‌ యాప్‌ ద్వారా నియంత్రించొచ్చు. ఇళ్లలో అయితే కూరగాయలు లేదా మాంసం బోర్డులకు కూడా అమర్చొచ్చు.

ప్లాస్టిక్‌ రీసైక్లింగ్‌

హార సరఫరా శ్రేణిలో వినియోగిస్తున్న ప్లాస్టిక్‌ ప్రపంచానికే పెద్ద అనర్థంగా తయారైంది. ఈ ప్లాస్టిక్‌ వ్యర్థాలతో అటు వ్యవసాయ భూములు, ఇటు సముద్రాలు కూడా నిండిపోతున్నాయి. రీసైకిల్‌ చేయటానికి వీలున్న ప్లాస్టిక్‌నే విరివిగా వాడితే ఈ సమస్య కొంత తగ్గుతుంది. దీనికోసం ‘వోల్‌క్యాట్‌’(వొలటైల్‌ క్యాటలిస్ట్‌) అనే సరికొత్త ఆవిష్కరణకు రంగం సిద్ధమైంది. ఈ రసాయనిక ప్రక్రియ సాయంతో.. కొన్ని రకాల ప్లాస్టిక్‌లను తిరిగి.. నేరుగా ప్లాస్టిక్‌ తయారీ యంత్రాల్లోకి పంపి, కొత్త వాటిని తయారుచెయ్యొచ్చు. దీంతో ప్రస్తుత ప్లాస్టిక్‌ వ్యర్థాల సమస్య బాగా తగ్గిపోతుంది.

పచ్చటి భవితకు పంచ సూత్రాలు

వ్యవసాయ రంగాన్ని సరికొత్త పుంతలు తొక్కిస్తూ..  
భవిష్యత్తులో ఆహార సవాళ్లను అధిగమించడానికి ఐబీఎం  
5 సూత్రాలను ప్రతిపాదిస్తోంది. 

- ఈనాడు ప్రత్యేక విభాగం

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.