close

ప్ర‌త్యేక క‌థ‌నం

ఫలితం 5-6 గంటల ఆలస్యం

ఈసారి ఓట్ల కౌంటింగ్‌కు అదనపు సమయం
వీవీ ప్యాట్‌ చీటీల లెక్కింపే కారణం
  ఒక్కో వీవీ ప్యాట్‌కు గంట
గేదెల భరత్‌కుమార్‌
ఈనాడు - అమరావతి

రాజకీయ పక్షాలు, విశ్లేషకుల నుంచి సామాన్యుల వరకు అందరూ ఉత్కంఠగా ఎదురుచూస్తున్న సార్వత్రిక ఎన్నికల ఫలితాలు.. ఈసారి ఆలస్యం కానున్నాయి. అధికారికంగా ఫలితాలు తెలుసుకోవాలంటే గతం కంటే దాదాపు  అయిదారు గంటలకు పైగా వేచిచూడక తప్పేలా లేదు. వీవీప్యాట్‌ చీటీలను కూడా లెక్కించాల్సి రావడమే దీనికి కారణం. నిజానికి ఎలక్ట్రానిక్‌ ఓటింగ్‌ యంత్రాలు  (ఈవీఎంలు) వచ్చిన తర్వాత ఫలితాలు చాలా తొందరగానే వెలువడుతున్నాయి. బ్యాలెట్‌ పత్రాల నాటి కాలంతో పోలిస్తే ఓట్ల లెక్కింపు సమయం బాగా ఆదా అవుతోంది. లెక్కింపు రోజున ఉదయం 10-11 గంటలకల్లా ఆధిక్యాలు, మధ్యాహ్నానికి తుది ఫలితాలు తెలిసిపోతున్నాయి. వీవీ ప్యాట్‌ (ఓటర్‌ వెరిఫయబుల్‌ పేపర్‌ ఆడిట్‌ ట్రయల్‌) చీటీలను కూడా లెక్కించాలన్న నిబంధన కారణంగా ఈసారి అదనపు సమయం తప్పదు. ఒక లోక్‌సభ నియోజకవర్గం పరిధిలో ఉండే ప్రతి  శాసనసభ స్థానం నుంచి ఐదు చొప్పున వీవీప్యాట్‌లను యాదృచ్ఛిక (ర్యాండమ్‌)  పద్ధతిలో ఎంపిక చేసి, వాటిలోని చీటీలను లెక్కిస్తారు. ఈ ప్రక్రియ అంతా పూర్తయిన తర్వాత మాత్రమే తుది ఫలితాలను అధికారికంగా వెల్లడిస్తారు. సగటున ఒక్కో వీవీప్యాట్‌లో చీటీలు లెక్కించేందుకు గంట సమయం పడుతుందని అంచనా. ఆ లెక్కన గత ఎన్నికల కంటే కనీసం ఐదారు గంటల పాటు ఫలితాలు ఆలస్యం అవుతాయి. ఈవీఎంలలో పోలైన ఓట్లన్నింటినీ లెక్కించిన తర్వాత మాత్రమే  వీవీప్యాట్‌ చీటీల లెక్కింపు ప్రారంభం అవుతుంది. ఇంతకుముందు సుమారుగా మధ్యాహ్నం 1-2 గంటల మధ్య ఫలితం వెల్లడైతే ఈసారి అది రాత్రి 7-8 గంటల సమయంలో విడుదలయ్యే అవకాశాలున్నాయి. ఇది కూడా అంతా సజావుగా జరిగితేనే. ఎక్కడైనా పొరపాటున ఈవీఎంలో వచ్చిన ఓట్లకు.. వీవీప్యాట్‌ చీటీల లెక్కకు ఒక్క అభ్యర్థి విషయంలో తేడా వచ్చినా రీకౌంటింగ్‌ చేయాలి. అప్పుడు మరికొంత సమయం పడుతుంది.

రెండింటి మధ్య తేడా వస్తే..

అభ్యర్థులకు ఈవీఎంలలో వచ్చిన ఓట్ల సంఖ్య, వీవీ ప్యాట్‌ చీటీల లెక్కింపులో వచ్చిన ఓట్ల సంఖ్య సరిపోలితేనే ఫలితాలు ప్రకటిస్తారు. వీవీ ప్యాట్‌ చీటీల లెక్కింపు విధానం, ఈవీఎంలలో వచ్చిన ఓట్ల సంఖ్య, వీవీ ప్యాట్‌ చీటీల్లోని ఓట్ల సంఖ్యకు మధ్య తేడా వస్తే అనుసరించాల్సిన పద్ధతి తదితర అంశాలపై ఎన్నికల సంఘం ఇటీవల దిశా నిర్దేశం చేసింది. ఇలా వ్యత్యాసం వస్తే అవి సరిపోలేంతవరకూ రీకౌంటింగ్‌  నిర్వహిస్తారు. అప్పటికీ తేడా వస్తే వీవీ ప్యాట్‌ చీటీల్లోని సంఖ్యనే పరిగణనలోకి తీసుకుంటారు.

అప్పట్లో ఒక్కొక్కటి

2017 మే నుంచి ఇప్పటివరకూ దేశంలో లోక్‌సభ, శాసనసభ స్థానాలకు జరిగిన అన్ని ఎన్నికల్లో వీవీప్యాట్‌లు ఉపయోగించారు. ఆంధ్రప్రదేశ్‌లో   తొలిసారి 2017 ఆగస్టు 23న జరిగిన నంద్యాల ఉప ఎన్నికలలో వీటిని   ప్రవేశపెట్టారు. 2018 డిసెంబరులో తెలంగాణ, రాజస్థాన్‌, మధ్యప్రదేశ్‌, ఛత్తీస్‌గఢ్‌, మిజోరం రాష్ట్రాల్లో జరిగిన అసెంబ్లీ ఎన్నికల్లో కూడా వీవీ ప్యాట్‌లు  వినియోగించారు. అప్పట్లో నిబంధనల ప్రకారం ఒక్కో శాసనసభ నియోజక వర్గంలో ఒకే ఒక్క వీవీ ప్యాట్‌లోని చీటీలను లెక్కించారు. ఒక్కో శాసనసభ నియోజకవర్గం పరిధిలో అయిదేసి వీవీ ప్యాట్‌ల్లోని చీటీలను లెక్కించాలని ఇటీవల సుప్రీంకోర్టు తీర్పు ఇచ్చిన నేపథ్యంలో ఈసారి ఆ మేరకు లెక్కించనున్నారు.

సమయం ఇలా..

ఒక్కో పోలింగ్‌ కేంద్రం పరిధిలోని వీవీ ప్యాట్‌ చీటీలను లెక్కించేందుకు   సగటున గంట సమయం పడుతుందని ఎన్నికల అధికారులు  వివరిస్తున్నారు. సగటున ఒక్కో పోలింగ్‌ కేంద్రం పరిధిలో 1400-1500 మంది ఓటర్లుంటారు. కొన్ని కేంద్రాల్లో 2 వేలు, అంతకంటే ఎక్కువమంది ఓటర్లు కూడా ఉన్నారు. వీవీ ప్యాట్‌ చీటీల లెక్కింపు కోసం పోలింగ్‌ కేంద్రాలను ఎంపిక చేసేందుకు లాటరీ తీసినప్పుడు ఓటర్ల సంఖ్య ఎక్కువగా ఉన్న కేంద్రాలు వస్తే....లెక్కింపునకు సమయం ఎక్కువ పడుతుంది. తక్కువ సంఖ్యలో ఓటర్లు ఉంటే...త్వరగా తేలిపోతుంది. అలాగే, నమోదైన పోలింగును బట్టి కూడా ఈ సమయం ఆధారపడుతుంది. ఈవీఎంలలో నమోదైన ఓట్లసంఖ్యకు, వీవీ ప్యాట్‌ చీటీల్లో వచ్చిన ఓట్లసంఖ్యకు వ్యత్యాసమొస్తే అవి  సరిపోలేంత వరకూ రెండు, మూడుసార్లు లెక్కించాలి. ఇలాంటి పరిస్థితుల్లో మరింత అదనపు సమయం అవసరమవుతుంది. లాటరీ విధానంలో ఎంపికచేసిన అయిదు వీవీ ప్యాట్‌ల్లోని చీటీలను ఒకేసారి సమాంతరంగా కాకుండా ఒక వీవీ ప్యాట్‌ల్లోని చీటీల లెక్కింపు పూర్తయిన తర్వాత రెండో వీవీ ప్యాట్‌ల్లోని చీటీల లెక్క మొదలుపెడతారు.

బ్యాలెట్‌ పత్రాలలో ఇలా..

బ్యాలెట్‌ పత్రాలతో ఎన్నికలు నిర్వహించినపుడు తొలుత సీల్‌ చేసిన బ్యాలెట్‌పెట్టెలు తెరిచేవారు. అందులో పత్రాలన్నింటినీ గుట్టగా పోసి...ప్రతి 25 పత్రాలను కట్టగా కట్టేవారు. ఈ కట్టలన్నింటినీ పెద్ద డ్రమ్ములో వేసి కలిపేవారు. ఆ డ్రమ్ముల నుంచి 40 కట్టలను ఒక్కో టేబుల్‌కు ఇచ్చేవారు. అంటే ఒక్కో కౌంటింగ్‌ టేబుల్‌కు వెయ్యి చొప్పున బ్యాలెట్‌ పత్రాలను లెక్కింపు కోసం కేటాయించేవారు. 14 కౌంటింగ్‌ టేబుళ్లు ఉంటే ఒకేసారి 14 వేల బ్యాలెట్‌ పత్రాలు లెక్కించేవారు. ఆ మొత్తం పూర్తయిన తర్వాత రెండో రౌండ్‌లో అలాగే లెక్కించేవారు.

లాటరీ పద్ధతిలో ఎంపిక

ఒక్కో శాసనసభ నియోజకవర్గం పరిధిలో వందలసంఖ్యలో పోలింగ్‌ కేంద్రాలుంటాయి. లెక్కించాల్సిన వీవీప్యాట్‌లను లాటరీ విధానంలో ఎంపిక చేస్తారు. పోటీ చేసిన అభ్యర్థులు లేదా వారి తరఫు ప్రతినిధులు, సాధారణ పరిశీలకుల సమక్షంలో రిటర్నింగ్‌ అధికారి లాటరీ నిర్వహిస్తారు.

* ఈవీఎంలలో రికార్డయిన ఓట్ల లెక్కింపు పూర్తయిన తర్వాతే వీవీప్యాట్‌ చీటీల లెక్కింపు ప్రారంభిస్తారు.
* పోస్టుకార్డు పరిమాణంలోని తెల్ల పేపరు కార్డులను డ్రా తీయడానికి వాడతారు.
* ఆ శాసనసభ నియోజకవర్గం పరిధిలో ఎన్ని పోలింగ్‌ కేంద్రాలుంటే అన్ని కార్డులు సిద్ధం చేసి వాటిపై నియోజకవర్గం, పోలింగ్‌ కేంద్రం సంఖ్య, పోలింగ్‌ తేదీ వివరాలు ముద్రిస్తారు.
* ఈ కార్డులను నాలుగు మడతలు పెట్టాలి. లాటరీ తీసే సమయంలో పోలింగ్‌ కేంద్రం సంఖ్య కనపడకూడదు.
* ప్రతి కార్డును అభ్యర్థులు, వారి ఏజెంట్లకు చూపించిన తర్వాతే మడత పెట్టాలి.
* ఆ కార్డులన్నింటినీ ఓ డబ్బాలో వేసి కలిపిన తర్వాత వాటిలో నుంచి అయిదు కార్డులను రిటర్నింగ్‌ అధికారి తీస్తారు.
* ఆ కార్డులపై ఉన్న పోలింగ్‌ కేంద్రాలకు సంబంధించిన వీవీప్యాట్‌ చీటీలను లెక్కిస్తారు.

ఒక్కో శాసనసభ నియోజకవర్గం నుంచి అయిదేసి

శాసనసభ స్థానాలకు ప్రతి నియోజకవర్గం నుంచి అయిదు పోలింగ్‌  కేంద్రాల్లోని, లోక్‌సభ స్థానాలకు దాని పరిధిలోని ప్రతి శాసనసభ నియోజకవర్గం నుంచి అయిదు పోలింగ్‌ కేంద్రాల్లోని వీవీ ప్యాట్‌ చీటీలు లెక్కించాలి. ఆంధ్రప్రదేశ్‌, తెలంగాణ రాష్ట్రాలే చూస్తే.. ఇక్కడ ఒక్కో లోక్‌సభ నియోజకవర్గం పరిధిలో ఏడేసి శాసనసభ స్థానాలున్నాయి.  ఒక్కో లోక్‌సభ స్థానానికి సంబంధించి 35 పోలింగ్‌ కేంద్రాల్లోని వీవీ ప్యాట్‌ చీటీలు లెక్కిస్తారు. కానీ ఈశాన్య రాష్ట్రాల్లో పరిస్థితి ఇలా కాదు. మిజోరం లోక్‌సభ స్థానం పరిధిలో 40, షిల్లాంగ్‌ పరిధిలో 36 శాసనసభ నియోజకవర్గాలున్నాయి. అంటే ఇక్కడ 200, 180 చొప్పున వీవీప్యాట్‌లలోని చీటీలు లెక్కించాలి. ఓటర్ల సంఖ్య తక్కువగానే ఉన్నా.. ఒకదాని తర్వాత ఒకటి లెక్కించాల్సి రావడంతో ఎక్కువ సమయం పట్టే అవకాశముంది.

25 చీటీలు ఒక కట్టగా..

ప్రతి 25 వీవీ ప్యాట్‌ చీటీలను ఒక కట్టగా కడతారు. ఎంపిక చేసిన పోలింగ్‌ కేంద్రం పరిధిలో ఉదాహరణకు 1200 ఓట్లు పోలైతే.. వీవీ ప్యాట్‌ చీటీలను 48 కట్టలు కడతారు. వీవీప్యాట్‌ కౌంటింగ్‌ కేంద్రంలో ఆ కట్టలను పార్టీల వారీగా విభజించి లెక్కిస్తారు. వాటి లెక్కింపు పూర్తయిన తర్వాత రెండో వీవీ ప్యాట్‌ చీటీలు లెక్కిస్తారు. వీవీ ప్యాట్‌ చీటీల కోసం వినియోగించే కాగితం కొంత జారుగా ఉంటుంది. వీటి లెక్కింపునకు పట్టే సమయం పెరిగేందుకు ఇదీ ఓ కారణమవుతుందని అధికారులు చెబుతున్నారు.

ప్రత్యేక బూత్‌ ఏర్పాటు

* వీవీప్యాట్‌ పేపర్‌ చీటీలను లెక్కించేందుకు కౌంటింగ్‌ హాలులో ప్రత్యేక బూత్‌ను ఏర్పాటుచేస్తారు.
* బ్యాంకుల్లోని కేషియర్‌ కేబిన్‌ తరహాలో వైర్‌మెష్‌ను ఈ బూత్‌కు  ఏర్పాటుచేస్తారు. అనధికారిక వ్యక్తులెవరూ లోపలికి వెళ్లకూడదు.
* రిటర్నింగ్‌ అధికారి, అసిస్టెంట్‌ రిటర్నింగ్‌ అధికారి ఈ లెక్కింపును పర్యవేక్షిస్తారు. సాధారణ పరిశీలకుడు దీనిని పరిశీలిస్తారు.
* ఈ ప్రక్రియ మొత్తాన్ని వీడియో రికార్డింగ్‌ చేస్తారు.

 

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.