close

ప్ర‌త్యేక క‌థ‌నం

Facebook Share Twitter Share WhatsApp Share Telegram Share
సహజవనరుల కోసమే..!

లద్దాఖ్‌పై చైనా లడాయి అందుకేనని అనుమానాలు
అక్కడ భారీగా చమురు, విలువైన ఖనిజాలు ఉన్నాయంటున్న పరిశోధనలు
సంజీవ్‌ బారువా

ఆసియాలోని అగ్ర దేశాలైన భారత్‌, చైనాల మధ్య తూర్పు లద్దాఖ్‌లో నెలకొన్న ఘర్షణపై కొత్త కోణం వెలుగు చూస్తోంది. దీనికి మూలాలు చరిత్రాత్మక, ప్రాదేశిక, భౌగోళిక రాజకీయ వ్యూహానికి సంబంధించినవి కాకపోవచ్చని స్పష్టమవుతోంది. ఈప్రాంతంలో చమురు, సహజవాయు నిక్షేపాలు సహా హైడ్రోకార్బన్‌ నిల్వలు, యురేనియం వంటి విలువైన ఖనిజాలు ఉన్నట్లు అధ్యయనాల్లో తేలింది. వాటిని చేజిక్కించుకోవాలన్న ఉద్దేశంతోనే డ్రాగన్‌ దూకుడు పెంచినట్లు అర్థమవుతోంది. తూర్పు లద్దాఖ్‌లోని భూభాగంపై చైనా మొండి పట్టుదలను ప్రదర్శించడం వెనుక కారణం ఇదే అయి ఉండొచ్చన్న విశ్లేషణలు ఉన్నాయి.


అనేక సంస్థల పరిశోధన

హైడ్రోకార్బన్‌ నిల్వల అవకాశంపై ఓఎన్‌జీసీ, భారత భూగర్భ పరిశోధన సంస్థ, జమ్మూ విశ్వవిద్యాలయం, ఎని అప్‌స్ట్రీమ్‌ అండ్‌ టెక్నికల్‌ సర్వీసెస్‌ (ఇటలీ), పాకిస్థాన్‌ పెట్రోలియం లిమిటెడ్‌ (పీపీఎల్‌), యూనివర్సిటీ కాలేజీ లండన్‌ తదితర సంస్థల శాస్త్రవేత్తలతో కూడిన బృందం 2018 సెప్టెంబర్‌లో ఒక నివేదికను సమర్పించింది. ‘‘పెట్రోలియం వ్యవస్థకు సంబంధించిన అంశాలు అనేక పొరల్లో ఉన్నాయి. అక్కడ గ్యాస్‌ ఉనికిని బట్టి వాణిజ్య స్థాయిలో చమురు, గ్యాస్‌ నిక్షేపాలు ఉండొచ్చని స్పష్టమవుతోంది. అందువల్ల వాయవ్య హిమాలయ ప్రాంతం హైడ్రోకార్బన్‌ నిల్వల అన్వేషణకు అనువైన ప్రాంతం’’ అని నివేదిక పేర్కొంది. అక్కడ జ్వాలాముఖి రూపంలో ఉపరితలంపై గ్యాస్‌ ఉనికి వంటివి కూడా ఇందుకు నిదర్శనమని తెలిపింది.


భారత్‌, చైనాలకు కీలకం

ఇంధన వనరులు అంతంత మాత్రంగా ఉన్న భారత్‌, చైనాల్లో పెట్రోలియం ఉత్పత్తుల వినియోగం భారీగా ఉంది. అవి ఎక్కువ భాగం దిగుమతుల రూపంలోనే వస్తున్నాయి. భారత్‌ తన పెట్రో అవసరాల్లో 82 శాతం మేర దిగుమతులు ద్వారానే నెట్టుకొస్తోంది. స్థానికంగా పెట్రో నిల్వల అన్వేషణ, పునరుత్పాదక ఇంధనాల వినియోగం, స్వదేశీ ఇథనాల్‌ వాడకం ద్వారా 2022 నాటికి దిగుమతులను 67 శాతానికి కుదించాలని లక్ష్యంగా పెట్టుకొంది. మరోపక్క చైనా తన చమురు అవసరాల్లో 77 శాతం మేర విదేశాల నుంచే పొందుతోంది. ఇప్పుడు తూర్పు లద్దాఖ్‌లో ఉన్నట్లుగా భావిస్తున్న పెట్రో నిక్షేపాలు.. రెండు దేశాల ఇంధన భద్రతకు కీలకం కావొచ్చు.


ఒకప్పటి సముద్ర గర్భం

‘‘లద్దాఖ్‌ ప్రాంతంలో హైడ్రోకార్బన్‌ నిక్షేపాలకు అవకాశం ఎక్కువగా ఉందని మాకు చాలాకాలం కిందటే తెలుసు. లక్షల సంవత్సరాల కిందట ఈ ప్రాంతం టెథీస్‌ అనే సముద్రానికి గర్భంగా ఉండేది. తర్వాత భూఫలకాల కదలికల వల్ల నిలువుగా పైకి లేచి.. పశ్చిమ, మధ్య హిమాలయాలుగా ఏర్పడింది. సముద్రగర్భ ప్రాంతాల్లో సహజంగానే హైడ్రోకార్బన్‌ నిక్షేపాలకు అవకాశం ఎక్కువగా ఉంటుంది’’ అని భారత చమురు, సహజవాయు సంస్థ (ఓఎన్‌జీసీ) ఉన్నతాధికారి ఒకరు ‘ఈటీవీ భారత్‌’కు తెలిపారు.
టెథియన్‌ హిమాలయ ప్రాంతం.. లద్దాఖ్‌లోని జన్సకర్‌ పర్వతాల్లోని 70 కిలోమీటర్ల విస్తీర్ణంలోని ప్రాంతంలో ఉంది. ఇది తూర్పున టిబెట్‌ పీఠభూమిలోని దక్షిణ అంచుల నుంచి పశ్చిమాన జన్సకర్‌ పర్వతాల వరకూ విస్తరించి ఉంది. పశ్చిమ హిమాలయాల్లో టెథియన్‌ హిమాలయ ప్రాంతం కశ్మీర్‌, జన్సకర్‌, చాంబ, స్పిటి ప్రాంతాల్లో వ్యాపించి ఉంది. షేల్‌ గ్యాస్‌, షేల్‌ అయిల్‌ అన్వేషణకు ఇది అనువైన ప్రాంతం.


విలువైన ఖనిజాలు

* తూర్పు లద్దాఖ్‌లోని 9 ప్రదేశాల్లో నీరు, మట్టి నమూనాలను ఓఎన్‌జీసీ విశ్లేషించింది. అక్కడ యురేనియం, లాంతనమ్‌, గాడోలినియం, బోరాన్‌, లిథియం, సెసియం, వనాడియం, థోరియం వంటి భార లోహాలు, రేర్‌ ఎర్త్‌ మూలకాలు ఉండొచ్చని వెల్లడైంది. నమూనాలు సేకరించిన ప్రాంతాలు.. భారత్‌, చైనా సైన్యాల మధ్య ఘర్షణ జరిగిన ప్రదేశాలకు దగ్గర్లోనే ఉన్నాయి.
* అక్కడ లభ్యమయ్యే అనేక ఖనిజాలు ఇంధన, శాస్త్ర, సైనిక పరిజ్ఞానాలకు కీలకం కానున్నాయి. ఇవి కంప్యూటర్లు, లాప్‌టాప్‌లు, మొబైల్‌ ఫోన్లు, డిజిటల్‌ కెమెరాలు, సౌర ఫలకాలు, విద్యుత్‌ కార్లు, ఉపగ్రహాలు, లేజర్లు, యుద్ధవిమానాల ఇంజిన్లు వంటి అనేక అవసరాలకు ఇవి ఉపయోగపడతాయి.
* రేర్‌ ఎర్త్‌ మూలకాల ఉత్పత్తిలో చైనా.. ప్రపంచంలోనే అగ్రగామిగా ఉంది. ఈ హోదాను అడ్డుపెట్టుకొని.. ప్రాబల్యాన్ని పెంచుకోవడానికి, భౌగోళిక రాజకీయ ఆధిపత్యాన్ని చాటుకోవడానికి డ్రాగన్‌ ప్రయత్నిస్తున్నట్లు విశ్లేషణలు వచ్చాయి. 2018లో చైనా 1.2 లక్షల టన్నుల రేర్‌ ఎర్త్‌ మూలకాలను ఉత్పత్తి చేసింది. ఆస్ట్రేలియా, అమెరికాలు ఆ తర్వాతి స్థానాల్లో ఉన్నాయి.
* ఓఎన్‌జీసీ అధ్యయనం 2018లో ప్రారంభమైంది. అయితే 2020 ఫిబ్రవరి నుంచి కరోనా వైరస్‌, భారత్‌-చైనా సైనిక ఘర్షణల కారణంగా ఇది ఆగిపోయింది.


మరిన్ని

జిల్లా వార్తలు

దేవ‌తార్చ‌న

మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.