AP News: పనస పొడితో మధుమేహానికి చెక్‌
close

తాజా వార్తలు

Updated : 16/06/2021 08:23 IST

AP News: పనస పొడితో మధుమేహానికి చెక్‌

శ్రీకాకుళం సర్వజన ఆసుపత్రి వైద్యుడి అధ్యయనం

గుజరాతీపేట(శ్రీకాకుళం), న్యూస్‌టుడే: మధుమేహ బాధితులకు ఉపశమనం కలిగిస్తూ భారతీయ వైద్యుల బృందం చేపట్టిన పరిశోధనలు మంచి ఫలితాలనిస్తున్నాయి. పనసకాయలో మధుమేహాన్ని అదుపుచేసే గుణాలు ఉన్నాయని శ్రీకాకుళం సర్వజనాసుపత్రిలో మెడిసిన్‌ విభాగంలో అసోసియేట్‌ ప్రొఫెసరుగా పని చేస్తున్న ఎ.గోపాలరావుతోపాటు మరికొందరు వైద్యులు గుర్తించారు. దీనికి సంబంధించి ఆయన బృందం చేసిన పరిశోధనలపై అంతర్జాతీయ జర్నల్‌లో వ్యాసం ప్రచురితమైంది. పనసకాయలో మధుమేహాన్ని అదుపు చేసే ఫైబర్‌, మినరల్స్‌, యాంటీ డయాబెటిస్‌ పదార్థాలు ఉంటాయని ఈ సందర్భంగా గోపాలరావు వెల్లడించారు. ఈ కాయతో లభించే పదార్థాలతో పుణేలోని ఓ కంపెనీ పౌడర్‌ తయారు చేస్తోందని తెలిపారు. ‘దీనిలో మధుమేహ వ్యాధిగ్రస్థులకు ప్రయోజనం ఉంటుందేమోనని ప్రయోగాలు చేశాం. ఇందులో భాగంగా 2019 మే నెలలో నాతోపాటు సహచర వైద్యులు కె.సునీల్‌ నాయక్‌, రీసెర్చ్‌ వైద్యులు మురళీధర్‌, శ్రీనివాస్‌ సంయుక్తంగా 40 మందిపై ఏడాదిపాటు పరిశోధన చేశాం. ఆసుపత్రిలో ఏడాది కాలంగా మధుమేహ వ్యాధి అదుపునకు మాత్రలు వినియోగిస్తున్న వారికి గ్లైకాసిలేటెడ్‌ హిమోగ్లోబిన్‌ (హెచ్‌బీఏ1సి) పరీక్షలు నిర్వహించాం. ఈ పరీక్షలో ఆరు పాయింట్లు లోపు ఉన్న వారికి చక్కెర ఉండదు. 6 దాటి 8 పాయింట్లు వచ్చిన వారిని 40 మందిని గుర్తించి జాక్‌ఫ్రూట్‌ పౌడర్‌తో పాటు, ఇతర డమ్మీ మందులు (ప్లాసిబో-వీట్‌ఫ్లోర్‌) ఇచ్చాం. మూడు నెలలు నిశితంగా పరిశీలించాం. ముఖ్యంగా టైప్‌2 మధుమేహ వ్యాధి పీడితుల్లో ప్లాస్మా గ్లూకోజ్‌ స్థాయి తగ్గించడంతో ఇది ప్రభావవంతంగా పని చేస్తుందని గుర్తించాం. మే 2019 నుంచి ఫిబ్రవరి 2020 వరకు ఎంపిక చేసిన 18 నుంచి 60 ఏళ్ల వయసు వారిలో చక్కెర వ్యాధి అదుపులోకి వచ్చింది. ఇందులో ఆశించిన ఫలితాలు వచ్చాక ‘నేచర్‌’ జర్నల్‌కు పరిశోధనా పత్రాన్ని సమర్పించాం. మన ప్రాంతంలో అందుబాటులో ఉండే పనసకాయ పౌడర్‌ను ప్రతి రోజూ భోజనంలో ఒక టేబుల్‌ స్పూన్‌ తీసుకుంటే చక్కెర అదుపులోకి వస్తుంది. గత జనవరిలో జరిగిన స్టార్టప్‌ ఇండియా కాన్ఫరెన్స్‌లో ప్రధాని నరేంద్ర మోదీ దృష్టికి ఈ పరిశోధనను తీసుకెళ్లారు’ అని గోపాలరావు వివరించారు.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జాతీయ- అంతర్జాతీయ
మరిన్ని