AP News: సీమ పందుల కోసం సినీ ఫక్కీలో దాడి

తాజా వార్తలు

Updated : 02/07/2021 10:53 IST

AP News: సీమ పందుల కోసం సినీ ఫక్కీలో దాడి

నక్కపల్లి, న్యూస్‌టుడే: జాతీయ రహదారిపై పోలీసులు ఉండగానే సీమ పందుల వ్యాన్‌పై దాడి చేసి వాహనాన్ని ఎత్తుకెళ్లేందుకు సుమారు 100 మంది దుండగులు ప్రయత్నించారు. విశాఖ జిల్లా నక్కపల్లి మండలం కాగిత టోల్‌గేట్‌ వద్ద గురువారం రాత్రి ఈ ఘటన చోటుచేసుకుంది. విజయనగరంలోని సీమ పందుల ఉత్పత్తి కేంద్రం నుంచి మున్సిపల్‌ అధికారులు సుమారు 40 విత్తన పందులను తరలిస్తున్నారు. గురువారం సాయంత్రం విజయనగరం-విశాఖ జిల్లాల సరిహద్దులో విజయనగరం నుంచి భారీగా వచ్చిన ఎస్కార్ట్‌ పోలీసులు పందుల వ్యాన్‌ను విశాఖ జిల్లా ఎస్కార్టు సిబ్బందికి అప్పగించారు. ఇది చెన్నై వెళుతుందని, విశాఖ జిల్లా సరిహద్దు వరకు రక్షణగా వెళ్లాలని సూచించారు. అక్కడి నుంచి బయలుదేరిన వ్యాన్‌ కాగిత టోల్‌గేట్‌ వద్దకు రాగానే సుమారు 100 మంది వరకు ద్విచక్ర వాహనాలపై వచ్చి దాడి చేశారు. డ్రైవర్‌ సహా ముగ్గురు వ్యక్తులను కొట్టి బయటకు లాగేశారు. వ్యాన్‌ను విశాఖ వైపు వెనక్కి తిప్పారు.

మిగిలిన వారంతా ద్విచక్ర వాహనాలపై అనుసరించారు. రక్షణగా వచ్చిన పోలీసులు దెబ్బలు తిన్నవారిని వాహనంలో ఎక్కించుకుని పారిపోతున్న వారిని వెంబడించారు. నక్కపల్లి చేనేత కాలనీకి చేరుకోగానే దుండగులు వ్యాన్‌ను ఓ వీధిలో వదిలేసి, తాళాలు తీసుకుని పరారయ్యారు. వెనకే వచ్చిన వారంతా పోలీసులకు చిక్కకుండా సమీప తోటలు, వారసంతలోకి పరుగులు తీశారు. పోలీసులు అక్కడికి చేరుకుని.. కాలనీవాసుల సహకారంతో దుండగులను పట్టుకోవడానికి ప్రయత్నించగా ఎవ్వరూ దొరకలేదు. రెండు ద్విచక్ర వాహనాలను స్వాధీనం చేసుకున్నారు. 


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జాతీయ- అంతర్జాతీయ
మరిన్ని