ఆ రెండు శాఖల్లో ఖాళీలు ఉండొద్దు: కేసీఆర్‌

తాజా వార్తలు

Published : 14/07/2021 18:31 IST

ఆ రెండు శాఖల్లో ఖాళీలు ఉండొద్దు: కేసీఆర్‌

హైదరాబాద్: తెలంగాణలో ధాన్యం నిల్వ, మిల్లింగ్‌ సామర్థ్యాన్ని మరింత పెంచాలని ముఖ్యమంత్రి కేసీఆర్ ఆదేశించారు. కొత్తగా పారాబాయిల్డ్  మిల్లులను గణనీయంగా ఏర్పాటు చేయాలన్నారు. ఇందుకోసం అత్యంత క్రియాశీలకంగా చర్యలు చేపట్టాలని పరిశ్రమల శాఖను సీఎం ఆదేశించారు. వరుసగా రెండో రోజు మంత్రివర్గ సమావేశంలో వ్యవసాయ శాఖకు సంబంధించిన అంశాలపై ప్రధానంగా చర్చించారు. ఏడాది కాలంగా వ్యవసాయ రంగంలో జరిగిన పురోగతి, ధాన్యం దిగుబడి, సాగు విస్తీర్ణం, తదితర విషయాలను వ్యవసాయశాఖ మంత్రి సింగిరెడ్డి నిరంజన్ రెడ్డి, అధికారులు వివరించారు. వానాకాలం సాగుకు సంబంధించి విత్తనాలు, ఎరువుల లభ్యత, వర్షపాతం తదితర అంశాలపై కేబినెట్ చర్చించింది. ఏడేళ్ల కాలంలో తెలంగాణ వ్యవసాయ ప్రస్థానం, సాధించిన విజయాలను సీఎం కేసీఆర్ సమావేశంలో ప్రస్తావించారు.

నాణ్యమైన ఉచిత విద్యుత్, సాగునీటి ప్రాజెక్టుల నిర్మాణంతో వ్యవసాయానికి అనువుగా ఉన్న భూములన్నింటినీ రైతులు సాగు చేస్తున్నారని వివరించారు. రాష్ట్రంలో సాగువిస్తీర్ణం పెద్దఎత్తున పెరిగిందన్నారు. రైతుబంధు సహా సకాలంలో ఎరువులు, విత్తనాలు, తదితర రైతు సంక్షేమ కార్యక్రమాల ఫలితంగా గతేడాది రాష్ట్రంలో రికార్డు స్థాయిలో మూడు కోట్ల టన్నుల ధాన్యం ఉత్పత్తి జరిగిందన్నారు. రైతులు మరింత ఉత్సాహంతో వరి పండించే పరిస్థితులు రాష్ట్రంలో నెలకొన్నాయని.. వచ్చే ఏడాది ధాన్యం ఉత్పత్తి మరింత పెరిగే అవకాశాలున్నాయని పేర్కొన్నారు. అందుకు అనుగుణంగా ధాన్యం నిల్వ, మార్కెటింగ్‌పై పూర్తిస్థాయిలో దృష్టి సారించాలని అధికారులను ఆదేశించారు.

రెండు శాఖల్లో ఖాళీలు ఉండకూడదు..

సందర్భానుసారంగా అవసరాలను గుర్తించి అధికారులు, నిపుణులు సంయుక్తంగా రైతులకు శిక్షణ కార్యక్రమాలు నిర్వహించాలని సీఎం ఆదేశించారు. పౌరసరఫరాల శాఖ సహా వ్యవసాయశాఖలో ఉన్న ఖాళీలను వెంటనే భర్తీ చేయాలన్నారు. పండిన ధాన్యం పండినట్లే ఫుడ్ ప్రాసెసింగ్‌లో భాగంగా మిల్లింగ్ చేసి ఎక్కడ డిమాండ్ ఉంటే అక్కడికి సరఫరా చేయాలన్నారు. ఈ దిశగా అన్ని చర్యలు తీసుకోవాలని సంబంధిత శాఖల అధికారులను ఆదేశించారు. అవసరమైతే ఆయా రంగాల్లో నిపుణుల సలహాలు, సూచనలు తీసుకోవాలన్నారు. కొత్తగా ముందుకొచ్చే అన్ని రకాల వ్యవసాయ ఉత్పత్తుల పరిశ్రమలను ప్రోత్సహించాలన్నారు. రాబోయే రోజుల్లో రాష్ట్రంలో ధాన్యం ఉత్పత్తి పెరగనున్న నేపథ్యంలో ధాన్యం నిల్వ, మిల్లింగ్, మార్కెటింగ్ సహా కొత్త పరిశ్రమల ఏర్పాటుకు తీసుకోవాల్సిన చర్యలపై వ్యవసాయ శాఖ మంత్రి నిరంజన్ రెడ్డి ఆధ్వర్యంలో మంత్రివర్గ ఉపసంఘాన్ని ఏర్పాటు చేశారు. మంత్రులు గంగుల కమలాకర్, హరీశ్ రావు, కేటీఆర్, ఇంద్రకరణ్ రెడ్డి, పువ్వాడ అజయ్ కుమార్, సబితా ఇంద్రారెడ్డి, ప్రశాంత్ రెడ్డి, జగదీశ్ రెడ్డి ఈ కమిటీలో సభ్యులుగా ఉంటారు.

ఆయిల్ పామ్‌ రైతులకు రాయితీ..

రాష్ట్రంలో ఆయిల్ పామ్‌ పంట సాగు ప్రోత్సహించాలని రాష్ట్ర మంత్రివర్గం నిర్ణయించింది. రానున్న 2022-23 సంవత్సరానికి 20 లక్షల ఎకరాల్లో ఆయిల్ పామ్ సాగు చేపట్టే దిశగా రైతులను చైతన్యపరిచి ప్రోత్సహించాలని మంత్రివర్గం నిర్ణయం తీసుకుంది. ఆయిల్ పామ్ సాగు చేసే రైతులకు ఎకరాకు.. మొదటి ఏడాది రూ.26వేలు, తరువాతి రెండేళ్లు ఏటా రూ.5 వేల చొప్పున పంట పెట్టుబడి ప్రోత్సాహకం కింద రాయితీగా అందించాలని నిర్ణయం తీసుకుంది. దీనిలో భాగంగా అటవీ శాఖ, అటవీ అభివృద్ధి సంస్థతో పాటు పంచాయతీరాజ్, గ్రామీణాభివృద్ధి శాఖలు సంయుక్తంగా ఆయిల్ పామ్ మొక్కల నర్సరీలు పెంచాలని కేబినెట్ సూచించింది. ఈ పంట సాగు విధానం గురించి మరింతగా తెలుసుకునేందుకు మంత్రులు, ప్రజాప్రతినిధులు, అధికారులతో కూడిన అధ్యయన బృందం.. కోస్టారికా, మలేసియా, థాయ్‌లాండ్, ఇండోనేషియా తదితర దేశాల్లో పర్యటించాలని మంత్రివర్గం ఆదేశించింది. టీ ఐడియా, తెలంగాణ స్పెషల్ ఫుడ్ ప్రాసెసింగ్ జోన్ల నిబంధనల ప్రకారం ఆయిల్ పామ్ ప్రాసెసింగ్ యూనిట్లకు ప్రోత్సాహకాలు అందించాలని అధికారులను మంత్రివర్గం ఆదేశించింది.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జాతీయ- అంతర్జాతీయ
మరిన్ని