పాప మీద బెంగతోజ్వరం వచ్చింది

ఓ ఛాంపియన్‌... పెళ్లి చేసుకొని ఇల్లాలైంది.

తల్లిగా మారి... బిడ్డ ఆలనాపాలన చూసుకుంది.

పునరాగమనాన్ని ఘనంగా చాటింది. ఆ ఛాంపియనే కోనేరు హంపి. ప్రపంచంలోనే అత్యంత చిన్న వయసులో గ్రాండ్‌మాస్టర్‌ టైటిల్‌ సాధించిన అమ్మాయి జుడిత్‌ పోల్గర్‌ తర్వాత 2600 ఎలో రేటింగ్‌ అధిగమించిన ఏకైక క్రీడాకారిణి ఆమె.

ఫిడె ప్రపంచ గ్రాండ్‌ప్రి టోర్నీల్లో ఏడు టైటిళ్లు సొంతం చేసుకున్న ఛాంపియన్‌. ఇలా ప్రతిష్టాత్మక టోర్నీలన్నింట్లోనూ తనదైన ముద్రవేసిన ఆ తెలుగమ్మాయి రెండేళ్ల విరామం తర్వాత గ్రాండ్‌ప్రి టైటిల్‌తో మరోసారి పతాక శీర్షికల్లో నిలిచింది. ఆటకు దూరంగా ఉన్న ఈ రెండేళ్లు గడిచిన విధానం.. కుమార్తెతో మధురానుభూతులు, భర్త ప్రోత్సాహం, తండ్రి అండదండల గురించి ‘హాయ్‌’తో మాట్లాడారు.

రెండేళ్లు ఆటకు దూరంగా ఎలా ఉండగలిగారు?

2016 డిసెంబరు నుంచి 2018 సెప్టెంబరు వరకు చెస్‌కు దూరంగా ఉన్నా. 24 ఏళ్లు ఒక లైఫ్‌స్టైల్‌లో బతికా. ఆటకు దూరంగా ఉన్న రెండేళ్లు భిన్నంగా గడిచిపోయాయి. మొదట్లో కష్టంగా అనిపించింది. రోజూ గంటలకొద్దీ బిజీగా ఉండే నేను ఖాళీగా ఉండటం ఇబ్బందిగా ఉండేది. కొన్ని రోజుల్లోనే అంతా సర్దుకుంది. అమ్మాయిల జీవితంలో అమ్మతనం తప్పదు. పాప కడుపులో ఉన్నప్పటి నుంచి ఏడాది వచ్చే వరకు ప్రతి క్షణాన్నీ ఆస్వాదించా. తను చూసినా.. కదిలినా ఏదో తెలియని ఆనందం. ప్రాణం కన్నా ఎక్కువగా ఇష్టపడిన చెస్‌కు రెండేళ్లు దూరంగా ఉండగలగడానికి కుమార్తే కారణం.●

మళ్లీ బరిలోకి దిగడం కష్టమనిపించలేదా?

రెండు నెలలు సాధన చేశా. 15 రోజుల ముందు చైనీస్‌ లీగ్‌ ఆడా. అక్కడ ఎక్కువ రేటింగ్‌ ఉన్న క్రీడాకారులు లేకపోయినా అందరూ ప్రతిభావంతులే ఉంటారు. స్థానికంగా బాగా ఆడతారు. విదేశీ క్రీడాకారుల్ని ఆహ్వానించి ఆటను మెరుగు పరుచుకుంటారు. వారితో ఆడటం నాకు కలిసొచ్చింది. ఈ ఏడాది జనవరిలో జిబ్రాల్టర్‌లో బాగా ఆడా. అందరూ మంచి క్రీడాకారులే వచ్చారు. ఒక్క గేమ్‌ పోయింది. గ్రాండ్‌ప్రి టైటిల్‌తో మరింత ఉత్సాహం వచ్చింది.

పెళ్లి.. పాప.. రెండేళ్ల విరామం.. మళ్లీ టైటిల్‌! పునరాగమనంలో సత్తాచాటుతానని ఊహించారా?

మరిచిపోలేని అనుభూతి ఇది. ఇంత తక్కువ సమయంలో మునుపటిలా రాణిస్తానని అనుకోలేదు. 15 రోజులు పాపను విడిచి ఉండటం ఇదే తొలిసారి.●

అహనను మరో హంపి చేస్తారా?

ఇప్పుడు తన వయసు రెండేళ్లు. ఆరేళ్లప్పుడు నేను ఆడటం మొదలుపెట్టా. 4, 5 ఏళ్లు వచ్చాక అహన ఆసక్తి ఏంటో తెలుస్తుంది. తనకేది ఇష్టమైతే అదే నేర్పిస్తా. చెస్‌ నేర్చుకోమని బలవంత పెట్టను. చెస్‌ ఇష్టమంటే నేర్పించడానికి సిద్ధమే. కానీ అమ్మానాన్నలా నేను తన వెన్నంటి ఉండటం కష్టమే. చిన్నప్పుడు నాన్న.. ఆ తర్వాత అమ్మ టోర్నీల కోసం నాతో వచ్చేవారు. అది నా వల్ల అవుతుందా? అంత కష్టపడగలనా? అన్నదే నా అనుమానం. వారిలా కష్టపడటం.. సమయం కేటాయించడం అంత సులువు కాదు.

పాప... ప్రాక్టీస్‌ను ఎలా సమన్వయం చేస్తున్నారు?

పెళ్లికి ముందు ఏకబిగిన రోజుకు 8 గంటలు సాధన చేశా. ఒక్కోసారి విరామమూ ఉండేది కాదు. ఇప్పుడంత సమయం దొరకదు. కంటిన్యుటీ ఉండదు. తక్కువ సమయం ఉంటుంది. నాకో ఇల్లు కూడా ఉంది. బాధ్యతలు ఉంటాయి. అన్నింటినీ సమన్వయం చేసుకోవాలి. అమ్మవాళ్లు విజయవాడలోనే ఉంటారు కాబట్టి ఉదయం 10.30 నుంచి సాయంత్రం 4 గంటల వరకు అహన వాళ్ల దగ్గరే ఉంటుంది. ఆ నాలుగైదు గంటల సమయంలోనే చెస్‌ సాధన చేస్తా. మిగతా సమయమంతా అహన నా దగ్గరే ఉంటుంది. ●

మళ్లీ చెస్‌ ఆడతానని అనుకున్నారా?

చెస్‌కు దూరమవ్వాలని ఎప్పుడూ అనుకోలేదు. విరామం అవసరం కాబట్టి తీసుకున్నా. పాప పుట్టి.. ఏడాది వయసొచ్చే వరకు ఆటకు దూరంగా ఉండాలని అనుకున్నా. మళ్లీ ఆడతానన్న నమ్మకమైతే ఉండేది. సమయం కోసం ఎదురుచూశా. అహన పుట్టిన ఏడాది వరకు పెద్ద టోర్నీలు వచ్చినా ఆడలేదు. ఐతే మళ్లీ ఆట మొదలుపెట్టినప్పుడు అత్యున్నత స్థాయికి చేరుకోగలనా? మునుపటిలా రాణించగలనా? ప్రొఫెషనల్‌ స్థాయికి చేరుకుంటానా? అన్న సందేహాలు మనసులో ఉండేవి. ఫిడె ప్రపంచ గ్రాండ్‌ప్రి విజయంతో అనుమానాలన్నీ తొలగిపోయాయి. నామీద నాకు నమ్మకం ఏర్పడింది. ఆత్మవిశ్వాసం పెరిగింది.

జూనియర్‌ హంపి విశేషాలేంటి?

అన్వేష్‌లోని ఎ.. హంపిలోని హెచ్‌ అక్షరాలు కలిసేలా అహన పేరు పెట్టాం. తనకిప్పుడు రెండేళ్లు. బాగా మాట్లాడుతుంది. చెస్‌ గురించి పెద్దగా తెలియదు. ల్యాప్‌టాప్‌లో నేను చెస్‌ ఆడుతుంటే చూస్తుంటుంది.

టోర్నీలో చెస్‌ బోర్డు ముందున్నప్పుడు పాప గుర్తొస్తే ఏం చేస్తారు?

ఒక్కసారి బోర్డు దగ్గరికి వెళితే అన్నీ మరిచిపోవాలి. మైండ్‌ క్లియర్‌గా ఉంచుకోవాలి. నూటికి నూరు శాతం ఏకాగ్రత చెస్‌ మీదే ఉండాలి. అలా లేకపోతే ఆడటం కష్టం. మొదట్లో కొంచెం ఇబ్బందిగా అనిపించింది. ప్రాక్టీస్‌తో అలవాటు అవుతుంది. మానసికంగా దృఢంగా ఉంటేనే చెస్‌ ఆడగలం.

ఇప్పుడు టోర్నీలకు ఒక్కరే ఎలా వెళ్లగలుతున్నారా?

పెళ్లికి ముందు వరకు నాన్న లేదా అమ్మ నాతో టోర్నీలకు వచ్చేవారు. ఇప్పుడు ఒంటరిగా వెళ్తున్నా. ఇంతకుముందు వెళ్లిన దేశాలకు.. తెలిసిన ప్రాంతాలకైతే ఫర్వాలేదు. ఎప్పుడూ వెళ్లని చోటుకు.. రోడ్డు ప్రయాణం ఎక్కువ ఉండే ప్రాంతాలకు వెళ్లాలంటే భయమేసింది. అలాంటి సమయాల్లో నాకీ టోర్నీలు అవసరమా? అనిపించేది. ఒకసారి ప్రపంచ నాకౌట్‌ ఛాంపియన్‌షిప్‌కు వెళ్లాల్సొచ్చింది. రష్యాలోని మారుమూల ప్రాంతంలో టోర్నీ. వెళ్లడం నా వల్ల కాదని మా ఆయనతో చెప్ఫా దీంతో అన్వేష్‌ నాతో పాటు వచ్చారు. పునరాగమనం తర్వాత టోర్నీల కోసం ఏడు సార్లు విదేశాలకు వెళ్లా. ఎప్పుడు వెళ్లినా వారంలోనే తిరిగొచ్చేశా. గ్రాండ్‌ప్రి కోసం 15 రోజులు ఉన్నా. ఇన్ని రోజులు పాపకు దూరంగా ఉండటం ఇదే తొలిసారి.●

విరామానికి ముందు, తర్వాత మీలో ఎలాంటి మార్పొచ్చింది?

పెళ్లయ్యాక.. పిల్లలు పుట్టాక మనుపటిలా ఫిట్‌నెస్‌ ఉండదు. వరుసగా 11 రౌండ్లు ఆడటం కష్టంగా అనిపిస్తుంది. 4, 5 రౌండ్లకు సరిపోయేంత సామర్థ్యమే ఉంటుంది. వరుసగా 3, 4 టోర్నీలు కూడా ఆడలేం. అలసిపోతాం. అదే సమయంలో ప్రత్యర్థుల వయసు తక్కువగా ఉంటుంది. ఇప్పటి యువ క్రీడాకారులకు ప్రొఫెషనల్‌ ట్రెయినరూ ఉంటున్నారు. వారితో సమానంగా పోటీపడాలి. దీనికి అనుభవమే ఉపయోగపడుతుంది.

పాపకు దూరంగా ఉంటూ ఎలా ఆడగలుగుతున్నారు?

పాపకు దూరంగా ఉండటం.. టోర్నీ వాతావరణానికి అలవాటు పడటం మొదట్లో కష్టంగా అనిపించింది. వదిలి వెళ్లడం చాలా బాధించింది. అహనను విడిచి ఉండలేకపోయా. 2, 3 టోర్నీల వరకు అలవాటు పడలేకపోయా. ఆ సమయంలో టోర్నీల్లోనూ బాగా ఆడలేకపోయా. జిబ్రాల్టర్‌ టోర్నీకి వెళ్లినప్పుడు పాప మీద బెంగతో జ్వరం వచ్చేసింది. మళ్లీ తేరుకుని టోర్నీని బాగానే ముగించా. కొన్నాళ్లకు అంతా సర్దుకుంది. టోర్నీకి వెళితే ప్రతిరోజు పాపతో వీడియో కాల్‌ మాట్లాడతా. అహన అమ్మ దగ్గర ఉండటం నాకు కలిసొస్తుంది.●

అన్వేష్‌ సహకారం ఎలా ఉంటుంది?

ఆయనకు చెస్‌ గురించి పెద్దగా తెలియదు. అయినా నాకు పూర్తి మద్దతుగా నిలుస్తాడు. నేనేం చేసినా అండగా ఉంటాడు.

ఇప్పటికీ నాన్న అశోక్‌ వెంట వస్తారా?

ఇంట్లోనే ప్రాక్టీస్‌ చేసుకుంటున్నా. కానీ టోర్నీలకు వెళ్లినప్పుడు నాన్న మార్గనిర్దేశం అవసరం. గేమ్‌ అవగానే మొదట నాన్నకే ఫోన్‌ చేస్తా. గేమ్‌ గురించి.. వ్యూహం గురించి మాట్లాడతా. పెళ్లి తర్వాత ఇంటికి దూరమైనా.. ఆట పరంగా ఇప్పటికీ నాన్నే నన్ను నడిపిస్తున్నాడు.

నంబర్‌వన్‌కు ఎంత దూరంలో ఉన్నారు?

ఇప్పుడే చెప్పలేను. ఇక్కడ్నుంచి పోటీ తీవ్రంగా ఉంటుంది. ప్రస్తుతం 2560 రేటింగ్‌ పాయింట్లతో ఉన్నా. గ్రాండ్‌ప్రి విజయంతో రేటింగ్‌ 2577కు చేరుకుంటుంది. అంటే మూడో ర్యాంకుకు వెళ్తా. ప్రస్తుత ప్రపంచ ఛాంపియన్‌, రెండో ర్యాంకర్‌ వెంజున్‌ జు (చైనా)కు నాకు తేడా 10 పాయింట్లలోపే. నంబర్‌వన్‌ యిఫాన్‌ (2659- చైనా) రెగ్యులర్‌గా ఆడట్లేదు. ఏదేమైనా గతంలో మాదిరిగా దూకుడుగా వెళ్లదల్చుకోలేదు. ఒత్తిడి అనవసరం అనిపిస్తుంది. అత్యుత్తమ ఆటతీరు కనబరచడమే లక్ష్యం.