అభిమానులు కొడతామన్నారు

రవీంద్ర ప్రసాద్‌ పట్నాయక్‌...

ఎవరీయన అంటారా?

‘రాను రానంటూనే సిన్నదో...’ అని అబ్బాయిల గుండెల్లోకి వెళ్లిపోయిన గాయకుడు..

‘మనసంతా నువ్వే... నా మనసంతా నువ్వే’ అంటూ అమ్మాయిల హృదయాలను మీటిన సంగీత దర్శకుడు..

‘వానా...వానా..వానా.. నీలాకాశంలోన’... అంటూ అంధుడిగా తెలుగు ప్రేక్షకులను కట్టిపడేసిన నటుడు..

‘బ్రోకర్‌’, ‘మనలో ఒకడు’... అని సమాజాన్ని జాగృతం చేసే చిత్రాలు తీసిన దర్శకుడు...

అర్థమైందనుకుంటా ఆయనే ఆర్పీ పట్నాయక్‌ అని...

ప్రస్తుతం ఎంకి పాటలకు పట్టాభిషేకం చేసే ప్రయత్నంలో తలమునకలై ఉన్న ఆయనను ‘హాయ్‌’ పలుకరించింది.

త్రివిక్రమ్‌ పాటలకు ట్యూన్‌ కట్టేవాణ్ని

చిన్నప్పటి నుంచీ పాటలు బాగా పాడేవాణ్ని. స్పేస్‌ఫిజిక్స్‌ చదివే రోజుల్లో నా ఫ్రెండ్‌ నందన్‌ పాటలు రాస్తే... నేను వాటికి ట్యూన్‌ కట్టి పాడేవాణ్ని. అలా నా మీద నాకు నమ్మకం వచ్చింది. తర్వాత పరిశ్రమలో స్థిరపడాలని ఇలా వచ్చాను. ఇక్కడ నేను, త్రివిక్రమ్‌ శ్రీనివాస్‌, సునీల్‌ ఒకే రూంలో ఉండేవాళ్లం. మూడేళ్లపాటు కలసి ఉంటూ సినిమా ప్రయత్నాలు చేసేవాళ్లం. రాత్రిపూట అలా చాప మీద పడుకొని...త్రివిక్రమ్‌ ఏదో రాసి వినిపించేవాడు. నేను దానికి ట్యూన్‌ కట్టేవాణ్ని. మా ఇద్దరి ప్రతిభ ఎలా ఉందో తీర్పు చెప్పేవాడు సునీల్‌. అలా ఎన్నో పాటలు గదిలో పాడుకునేవాళ్లం. సినిమాల్లోకి రాకముందు ‘ఆనందం’ అని నేను ఓ ప్రైవేటు ఆల్బమ్‌ చేశాను. అందులో పాటలన్నీ త్రివిక్రమ్‌ రాసినవే. ‘నీ కోసం’ సినిమాతో నా ప్రస్థానం ప్రారంభమైంది. ‘చిత్రం’ నాకు బ్రేక్‌ ఇచ్చింది. ఇక అప్పటి నుంచి వెనక్కి తిరిగి చూసుకోలేదు. ఇప్పటికీ మేం ముగ్గురం కలిస్తే సరదాగా ఉంటాం.

ఎంకి పాటకు పట్టాభిషేకం

ఎంతో గొప్ప సాహిత్యం, స్వచ్ఛమైన ప్రేమ నిండినవి ఎంకి పాటలు. అయితే ఈ విషయం ఈతరానికి చేరలేదు. మొదట్లో నేనూ వీటి గురించి పెద్దగా ఆసక్తి చూపలేదు. ఒకసారి కడపలో ఓ ఇంటికి వెళ్లాను. అక్కడ నాకు ఎంకి పాటల పుస్తకం కన్పించింది. దాన్ని చేతిలోకి తీసుకొని చదువుతూ... పాటలా పాడేస్తున్నాను. ‘గుండె గొంతుకలోన కొట్లాడతాది’ పదాలు నన్ను ఆకర్షించాయి. ఇక అలా పేజీలు తిరగేస్తూ వెళ్లిపోయాను. ఆ పాటలు ఎక్కడో నా హృదయాన్ని తాకాయి. వెంటనే ఆ పుస్తకాన్ని హైదరాబాద్‌కు తీసుకొచ్చాను. మొత్తం చదివాను. ఆ పాటల్లోని పదాల్లో ఎంతో భావుకత ఉంది. వీటిని ఆధునిక యువతకు అందించాల్సిన అవసరం ఎంతైన ఉందనిపించింది. ఆదిత్య మూజిక్స్‌తో మాట్లాడి బాణీలు కట్టాను. నాయుడుబావ పదాలను నా గొంతుతో పాడాను. నండూరి సుబ్బారావుగారి ముని మనమరాలు శృతి నండూరి.. ఎంకి పాత్రకు గాత్రమివ్వడం ప్రత్యేకత. మొత్తం 78 పాటలకు బాణీలు కట్టాం. ఇప్పటికే యూట్యూబ్‌లో ‘ఎంకి పాట.. ఆర్పీ నోట’ పేరుతో నాలుగు పాటలు ఉన్నాయి. త్వరలోనే మిగతా పాటల్ని విడుదల చేస్తాం. ఆ దేవుడు, నండూరి సుబ్బారావే ఇంత మంచి పాటలను ఈతరానికి అందించే బృహత్తర అవకాశం నాకు ఇచ్చారని సంతోషిస్తుంటాను.

మంచి అవకాశం కోసం చూస్తున్నా..!

అభిమానుల కోసమైనా మంచి సంగీతం అందించాలని చూస్తున్నా. మంచి కథ వస్తే తప్పకుండా సంగీత దర్శకత్వం వహిస్తా. నేను సొంతంగా రెండు కథలు సిద్ధం చేశాను. ఒకటి సామాజిక కోణం, మరోకటి హారర్‌ కథ. రెండింటిలో ఏది ముందు పట్టాలకు ఎక్కుతుందో త్వరలోనే చెబుతా.

మాది ఉమ్మడి కుటుంబం

మాది పార్వతీపురం పక్కన సింగనాపురం. మా నాన్నగారు ఉద్యోగరీత్యా కొన్నిరోజులు ఒడిశాలో పనిచేశారు. మా ప్రాంతంలో కొన్ని కుటుంబాలకు సర్‌నేమ్‌గా పట్నాయక్‌ వస్తుంది. అలా మాకు వచ్చింది. మేం ముగ్గురం అన్నదమ్ములం. ఇప్పటికీ అంతా కలిసే ఉంటాం. మొత్తం 11 మందిమి ఒకే ఇంట్లో ఉంటాం. మా మధ్య ఎలాంటి భేదాభిప్రాయాలు లేవు. ఉమ్మడిగా ఉన్నప్పుడు చిన్న కలతలు వచ్చినా... మాట్లాడుకొని సర్దుకొంటాం. నా జీవిత భాగస్వామి పేరు లావణ్య. మాది ప్రేమ వివాహం అనుకుంటారు చాలా మంది. కానీ మాది పెద్దలు కుదిర్చిన పెళ్లి. మా అమ్మాయి వెన్నెల. ఏడో తరగతి చదువుతోంది. తనూ సంగీతం నేర్చుకుంటోంది.

ఇంతగా అభిమానిస్తున్నారా?

ఒక సినిమా విషయంలో తలెత్తిన వివాదం నా మనసును కలిచి వేసింది. దాంతో నేను ఇక సంగీతం చేయను అని ప్రకటించాను. అప్పుడు అభిమానులు సంగీతం మానేస్తే మిమ్మల్ని కొడతామని బెదిరించారు. అది నాకు ఎంతో సంతోషాన్నిచ్చింది. నన్ను ఇంతగా అభిమానిస్తున్నారా? అనిపించింది. ఒకసారి ఓ జంట నా దగ్గరకు వచ్చింది. వాళ్లిద్దరూ నా పాటలు వినే ప్రేమించుకున్నారట. పెళ్లిచేసుకున్నారు. తర్వాత వాళ్లకు పుట్టిన పాపకు పేరు పెట్టాలని నా దగ్గరికొచ్చారు. ఓ సంగీత దర్శకుడిగా నాకు ఇంతకన్నా ఆనందం ఏముంటుంది. ‘బ్రోకర్‌’ సినిమా చూసిన ఓ వడ్డీవ్యాపారి తాను మారిపోయి సేవా కార్యక్రమాలు చేయడం మొదలుపెట్టారు. దర్శకుడిగా నాకు తృప్తినిచ్చిన విషయమిది.

ఇష్టమైన సంగీత దర్శకులు: ఇళయరాజా, ఆర్డీ బర్మన్‌, ఏఆర్‌ రెహమాన్‌

మెచ్చిన గాయకులు: ఎస్పీ బాలసుబ్రమణ్యం, కిషోర్‌కుమార్‌

ఆహారం: ఆరేళ్ల క్రితమే నాన్‌వెజ్‌ మానేశాను. శాకాహారాలన్నీ ఇష్టంగానే తింటాను.

వ్యాయామం: మనసును ప్రశాంతంగా ఉంచుకోవడమే నా ఆరోగ్య రహస్యం. అంతకుమించి ప్రత్యేకంగా వ్యాయామాలు ఏమీ చేయను.

స్నేహితుడు: రామ్‌ధన్‌ నా ఆత్మీయ నేస్తం. మనసులో ఏదీ పెట్టుకోకుండా... నా తప్పుఒప్పులను చెబుతాడు. మనం ఏదైనా సాధిస్తే మనం ఎంత సంతోషిస్తామో... అంతే సంతోషించే స్నేహితులు అవసరం. అలాంటివాడు రామ్‌ధన్‌.

- వీరా కోగటం, ఫొటోలు : దండా శ్రీనివాస్‌రావు

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App