ఆహారమే ఆరోగ్యం!

గోపాలపురాన్ని పాలిస్తున్న రాజేశ్వర వర్మ కొంతకాలంగా ఓ వింత వ్యాధితో బాధపడుతున్నాడు. అది ఆకలి లేకపోవడం! ఏ ఆహారం తిన్నా రుచించకపోవడం! రాజవైద్యులు పరీక్షలు చేసి చూడగా ఏ లోపమూ కనిపించలేదు. ఏ మందులు ఇవ్వాలో తెలియక, ఈ వ్యాధిని ఎలా తగ్గించాలో అర్థం కాక మథనపడుతున్నారు. అది గమనించిన మంత్రి సుమేరుడు ఇక లాభం లేదని భావించి ‘రాజుగారు వింత వ్యాధితో బాధపడుతున్నారు. దాన్ని తగ్గించిన వారికి తగిన బహుమానం అందుతుంది’ అంటూ దండోరా వేయించాడు.
విషయం తెలుసుకున్న రాజ్యంలోని వైద్యులు చాలామంది వారివారి ప్రయత్నాలు చేశారు. కానీ.. ఏమీ లాభం లేదు. రాజ్యంలోని దక్షిణ ప్రాంతానికి చెందిన ప్రజావైద్యుడు జ్ఞానకీర్తికి విషయం తెలియడంతో రాజుగారి వ్యాధి నయం చేయగలనని మంత్రిని సంప్రదించాడు. మంత్రి దానికి అంగీకరించాడు. ‘నేను ముందు రాజుగారికి వంట చేసే వ్యక్తులను కలవాలి. ఆ ప్రాంతాన్ని చూడాలి. ఆ తర్వాతే వైద్యం ప్రారంభించగలను’ అన్నాడు జ్ఞానకీర్తి. మంత్రి ఆశ్చర్యంగా వైద్యుడి వైపు చూశాడు. రాజుగారి ఆరోగ్యం కుదుట పడితే అదే పదివేలు అనుకొని సరేనన్నాడు. వంటవారిని కలిసిన వైద్యుడు వారు వంట చేసే ప్రదేశం, అక్కడ ఉన్న సామగ్రిని పరిశీలించి, వారిని కొన్ని వివరాలు అడిగి తెలుసుకున్నాడు.
అనంతరం రాజుగారి వద్దకు వచ్చి అతణ్ని పరీక్షించాడు. తర్వాత కొన్ని ప్రశ్నలు వేశాడు. ‘మహారాజా! మీ వ్యాధిని నేను నయం చేయగలను’ అని భరోసా ఇచ్చాడు. ‘కానీ నేను చెప్పిన విధానాన్ని మీరు తప్పక పాటించాలి. ముందుగా మీరు రెండు రోజుల పాటు ఆహారాన్ని తీసుకోవడం మానేయాలి. కేవలం నేను ఇచ్చే పానీయాలు మాత్రమే తాగాలి. ఆ తర్వాత నా పర్యవేక్షణలో వండించిన ఆహారాన్ని అందిస్తాను’ అన్నాడు. ‘సరే ఆ విధంగా చేయండి’ అని రాజు అంగీకరించాడు.
కొన్ని రోజులు గడిచాయి. రాజుగారు ఆహారాన్ని తింటూ ‘అద్భుతం! మహాద్భుతం! నాకు చాలా ఆకలిగా ఉంది. ఈ ఆహారం చాలా రుచిగా కూడా ఉంది. మీ వైద్యం చాలా బాగా పనిచేసింది. నా వ్యాధిని అది పూర్తిగా నయం చేసింది. మహామహా వైద్యులకు సాధ్యం కానిది మీకు ఎలా సాధ్యమైంది’ అని వైద్యుడైన జ్ఞానకీర్తిని అడిగాడు.
‘మహారాజా మీకు వైద్యం చేయడానికి ముందు మీ వంటశాలను పరిశీలించాను. మీ వంటవారిని కొన్ని ప్రశ్నలడిగాను. మీరు తీసుకునే ఆహారంలో పంచభక్ష్య పరమాన్నాలు, అధికంగా నూనెలో వేయించిన ఆహారపదార్థాలున్నాయి. అటువంటివి రోజూ తినడం వల్ల మీ జీర్ణవ్యవస్థ మందగించింది. నాలుకలోని రుచి తెలుసుకునే వ్యవస్థ కూడా తాత్కాలికంగా పనిచేయడం మానేసింది. దీంతో మీకు ఆహారం రుచి తెలియలేదు. ఇది గమనించి నేను రెండు రోజులపాటు మీకు ఆహారాన్ని ఇవ్వకుండా కేవలం ద్రవపదార్థాలను ఇవ్వడం వల్ల జీర్ణవ్యవస్థ తిరిగి మామూలు స్థితికి వచ్చింది’ అన్నాడు. దానికి రాజు సంతోషం వ్యక్తం చేశాడు.
‘పైగా మీరు ఇప్పుడు తిన్న ఆహారం మన రాజ్యంలోని సామాన్య ప్రజలు తినేది. మంచి ఆహారం అంటే ఖరీదైనది అని మాత్రమే కాదు. పోషక విలువలున్న సమతుల ఆహారం అని అర్థం’ అని వైద్యుడు వివరించాడు. ‘మీ వంటి నిశిత పరిశీలన కలిగిన వైద్యుడు మా రాజ్యంలో ఉండటం మా అదృష్టంగా భావిస్తున్నా’ అని రాజు వైద్యుణ్ని సత్కరించాడు.