చిన్నారి పెద్ద లైబ్రరీ !

చిచ్చర పిడుగులు

చిన్నారి పెద్ద లైబ్రరీ !

పన్నెండేళ్ల అమ్మాయి...
పుస్తకాలు చదివితేనే మెచ్చుకుంటాం...
మరి అదే వయసు చిన్నారి ఓ గ్రంథాలయాన్నే ఏర్పాటు చేస్తే? అదెంత గొప్ప విషయం?
ఎంతగా అభినందించాలి?
ఇంతకీ ఎవరా అమ్మాయి? ఏంటా కబుర్లు?

అనగనగా ఓ గ్రంథాలయం ఉంది. అందులోని పుస్తకాలు చదువుకోవడానికి పిల్లల నుంచి పెద్దల వరకూ చాలా మందే వస్తుంటారు. ఎలాంటి రుసుము లేకుండానే లైబ్రరీ సభ్యత్వం తీసుకుంటారు. నచ్చిన పుస్తకం ఇంటికీ పట్టుకెళ్లి చదివి తీసుకొస్తారు. ఇదేదో ప్రభుత్వ గ్రంథాలయం కాదు. ఓ చిన్నారి ఏర్పాటు చేసిన ఉచిత లైబ్రరీ ముచ్చట్లు.

* ఈ అమ్మాయి పేరు యశోద. వయసు 12 సంవత్సరాలు. ఏడో తరగతి చదువుతోంది. ఉండేది కేరళలోని కొచ్చి నగరంలో.
* తను ఏర్పాటుచేసిన ‘యశోద గ్రంథాలయం’లో ఇప్పుడు వందో, రెండు వందలో కాదు 3,500 పుస్తకాలున్నాయి. ఇవన్నీ ఆంగ్లం, మలయాళం, హిందీ, తమిళం, కొంకణి ఇలా రకరకాల భాషల్లో ఉన్నాయి.
* ఇంతకీ చిన్న వయసులోనే యశోదకి ఇంత పెద్ద ఆలోచన ఎలా వచ్చిందంటే... ఇదివరకు అన్న, నాన్నలతో కలిసి పుస్తకాలు చదువుకోవడానికి లైబ్రరీకి వెళ్లేదట. ఓరోజు మెంబర్‌షిప్‌ కోసం వాళ్ల నాన్న డబ్బులు కట్టడం చూసింది. అప్పుడే ‘ఎంతో జ్ఞానం పంచే పుస్తకాలు అందరికీ అందుబాటులో ఉండవా? అసలు డబ్బులు కట్టలేని వారు పుస్తకాలు చదవలేరా?’ అనే సందేహం వచ్చి ఉచితంగా గ్రంథాలయం ఏర్పాటు చేయాలనుకుంది. అదే విషయాన్ని నాన్నతో పంచుకుంది. తన ఆలోచనను సోషల్‌ మీడియాలో ఉంచి సాయం కోరింది.
* ఇంకేముంది చిన్నారి చేయాలనుకున్న గొప్ప పనికి వీలైనంత సహాయం చేయడానికి బంధువులు, తెలిసినవారు ఇలా చాలామందే ముందుకు వచ్చారు. తన ఇంటి మొదటి అంతస్తునే గ్రంథాలయంగా తీర్చిదిద్దింది. 2019 జనవరిలో ప్రారంభించింది.
* వంద పుస్తకాలతో మొదలై కొద్ది రోజుల్లోనే వేల పుస్తకాలతో నిండిపోయింది. ఇక్కడికి వచ్చే వారి సంఖ్యా పెరిగిపోయింది.
* యశోద స్కూలుకు వెళ్లినప్పుడు మినహా మిగతా సమయంలో ఈ గ్రంథాలయం పనులు చూసుకుంటుందట. తను లేనప్పుడు మాత్రం ఆ బాధ్యతల్ని ఇంట్లోవాళ్లకి అప్పజెపుతుంది. చిన్నారి నేస్తం ఆలోచన అదిరిపోయింది కదూ!