తిరుగుబాటు పుట్టింది ఇక్కడే!

నేస్తాలూ బాగున్నారా! చిన్నూని వచ్చేశా.. మీకిష్టమైన కబుర్లు తెచ్చేశా..! ఈ సారి నేను చూసిన కోట ఎంత బాగుందో.. చుట్టూ నీళ్లు.. మధ్యలో అందమైన దుర్గం.. తమిళనాడు రాష్ట్రం వెల్లూరులో ఉందిది. ఇక ఎందుకాలస్యం ఆ విశేషాలు చదివేయండి.

ఈ కోట చరిత్ర గురించి చెప్పాలంటే చాలా ఉంది. 16వ శతాబ్దంలో దీన్ని నిర్మించారు. విజయనగర సామ్రాజ్యానికిి సామంతులుగా ఉన్న నాయకరాజులు వెల్లూరు కోటను కట్టించారట. 136 ఎకరాల సువిశాల ప్రాంగణంలో ఉందిది. చుట్టూ ఎత్తయిన రాతి గోడ నేటికీ చెక్కుచెదరకుండా ఉండటం విశేషం.

* కోటను నిర్మించిన తీరే నాకు గమ్మత్తుగా అనిపించింది. కోటలోకి వెళ్లడానికి ఒకే మార్గం ఉంది. ఆ దారి తప్ప మిగతా కోట చుట్టూతా భారీ కందకం(శత్రువులు కోటలోకి ప్రవేశించకుండా దాని చుట్టూ తవ్వే పెద్దగొయ్యి) ఉంది. అందులో అన్ని కాలాల్లో నీళ్లుండేవి. దీనిలో వందల సంఖ్యలో మొసళ్లు ఉండేవి. శత్రువులు ఎవరైనా కోటలో ప్రవేశించాలని నీటిలోకి దిగితే వాటికి బలయ్యేవారు. ఇప్పుడు మొసళ్లు లేవనుకోండి. ఎంచక్కా చేపలు పెంచుతున్నారు. నేనైతే బోటు షికారూ చేశాను.

* ఈ సుందరమైన కోటలో పాగా వేయడానికి ఎందరో ప్రయత్నించారు. 17వ శతాబ్దంలో బీజాపూర్‌ సుల్తాన్‌ ఆదిల్‌షా కోటను హస్తగతం చేసుకున్నాడు. రెండు దశాబ్దాల తర్వాత మరాఠా వీరులు వెల్లూరు కోటను గెలిచారు. కొన్నేళ్లకు మొఘలులూ ఆక్రమించుకున్నారు. ఆ తర్వాత కోట ఆంగ్లేయుల పరమైంది. ఇప్పుడీ కోట భారత పురాతత్వ శాఖ అధీనంలో ఉంది.

* కోటలోని కొన్ని నిర్మాణాలను ఆంగ్లేయుల హయాంలో కూల్చివేశారని గైడ్‌ అంకుల్‌ చెప్పారు. వాటి స్థానంలో భారీ భవనాలు నిర్మించారట. నేటికీ వాటిని చూడొచ్ఛు●

* ఈ భవంతుల పేర్లు ఆశ్చర్యం కలిగించాయి. టిప్పు మహల్‌, హైదర్‌మహల్‌, క్యాండీ మహల్‌, బాద్‌షా మహల్‌, బేగం మహల్‌ పేరుతో భవనాలు ఉన్నాయి. టిప్పుసుల్తాన్‌ కన్నుమూసిన తర్వాత ఆయన భార్య, పిల్లలు, తల్లిని వెల్లూరు కోటలోనే కొన్నాళ్లు బందీలుగా ఉంచారట. అలా వీటికి ఆ పేర్లు వచ్చాయి. శ్రీలంకలోని క్యాండీ రాజ్యం చివరి రాజు విక్రమరాజ సింఘెను కుటుంబంతో పాటు 17 ఏళ్లు వెల్లూరు కోటలోనే నిర్బంధించారట. ఆయన్ను బందీగా ఉంచిన ప్యాలెస్‌ను క్యాండీ మహల్‌గా పిలుస్తారు. కొన్ని భవనాల్లో ప్రస్తుతం ప్రభుత్వ కార్యాలయాలు నిర్వహిస్తున్నారు.●

* సిపాయిల తిరుగుబాటు 1857లో జరిగిందని చదువుకున్నాం. అయితే 1806లోనే వెల్లూరు కోటలోనూ సిపాయిల తిరుగుబాటు జరిగిందని అక్కడ ఉన్న శిలాఫలకాల్లో ఉంది. అప్పట్లో సిపాయిలు తలపాగా చుట్టుకునేవారట. అయితే వాటి స్థానంలో టోపీలు ధరించాలని అధికారులు ఆదేశించడంతో సిపాయిల్లో తిరుగుబాటు మొదలైంది. అందరూ మూకుమ్మడిగా బ్రిటిష్‌ సైనికులపై దాడి చేశారట. అయితే, ప్రత్యేక బలగాలను రంగంలోకి దింపి తిరుగుబాటును అణచివేశారట. ఈ సంఘటన వెల్లూరు తిరుగుబాటుగా చరిత్రలో నిలిచిపోయింది.●

* ఈ కోటలో దేవాలయాలు, మసీదు, చర్చి ఉన్నాయి. జలకంఠేశ్వర ఆలయం అద్భుతమైన శిల్పసంపదతో అలరారుతోంది. పురాతనమైన మసీదు నేటికీ ఆకట్టుకుంటోంది. ఆంగ్లేయుల హయాంలో 1846 ప్రాంతంలో చర్చిని నిర్మించారు. ఓ మ్యూజియం కూడా ఉందిక్కడ.

* వెల్లూరు చెన్నై నుంచి 138 కి.మీ. దూరంలో ఉంటుంది.ఇక్కడ అందమైన ఉద్యానవనాలూ చూశాను.

సరే ఉంటామరి.. ఇప్పటికే చాలా విశేషాలు చెప్ఫా. బై బై!!