వెన్నకాని వెన్న... వెన్న లేకున్నా నేనున్నా!

హాయ్‌ ఫ్రెండ్స్‌... బాగున్నారా? నేను ఆవకాడో చెట్టును... నా ఫలాన్ని వెన్నపండు అంటారు తెలుసా..! నా విశేషాలు మీతో పంచుకుందామని ఇదిగో.. ఇలా వచ్చాను. ఇంకెందుకాలస్యం.. చదివేయండి మరి!

క్రీస్తు పూర్వం నుంచే...
* నేను మధ్య మెక్సికో ప్రాంతానికి చెందిన చెట్టును.
* పెర్సీ అమెరికానా.. నా శాస్త్రీయ నామం.
* సుమారు 66 అడుగుల ఎత్తు పెరుగుతాను.
* నా ఫలాలను క్రీస్తు పూర్వం 10 వేల సంవత్సరాల నుంచే తింటున్నారు.
* దక్షిణ, మధ్య అమెరికాల్లో క్రీస్తు శకం 900 సంవత్సరాల నుంచి సాగు చేస్తున్నారు.
* నేను సారవంతమైన ఎర్రనేలల్లో పెరుగుతాను.
* మీ దేశంలో దక్షిణాది రాష్ట్రాల్లో అక్కడక్కడా.. ఇప్పుడిప్పుడే నన్ను పెంచుతున్నారు.
* విత్తనం నాటిన 4 నుంచి 6 సంవత్సరాలకు కాయలు కాస్తాను.
* చొక్వెట్‌, హాస్‌, గ్వెన్‌, లుల, పింకర్టన్‌, రీడ్‌, బెకాన్‌, బ్రాగ్డెన్‌, ఏట్టింగర్‌ అనేవి నాలో రకాలు. ఇందులో కొన్ని కాయలు ఆకుపచ్చగా, కొన్ని నలుపు రంగులో ఉంటాయి.
* నలుపురంగులో కనిపించే హాస్‌, ఆకుపచ్చరంగులో కనిపించే గ్వెన్‌ రకాలు ఎక్కువగా సాగు చేస్తున్నారు.
* నా పండు లోపల మెత్తగా ఉంటుంది. తింటే కొద్దిగా ఆవు వెన్న రుచిలా అనిపిస్తుంది. చిరు చేదుగానూ ఉంటుంది.

పండుతో ప్రయోజనాలు
* వెన్న పూస దొరకని సమయాల్లో చిన్న పిల్లలకు నా పండు మంచిదని పెడతారు.
* నా పండ్లలో ఎక్కువ శాతం కొవ్వు ఉన్నప్పటికీ గుండెకు మేలు చేస్తుంది. ఎందుకంటే బీ6, ఫోలిక్‌ ఆమ్లం ఎక్కువగా ఉంటుంది.
* 100 గ్రాముల నా పండు గుజ్జు తింటే మీకు 160 కిలో కేలరీల శక్తి వచ్చేస్తుంది.
* అరటి పండులో కంటే ఎక్కువ పొటాషియం నా పండులోనే ఉంటుంది.
* ఇంకా మీకు ఎ, బి, ఇ విటమిన్లూ లభిస్తాయి. వీటితో పాటు సమృద్ధిగా పీచు పదార్థం, ఖనిజాలు ఉంటాయి.
* వెన్నకు బదులుగా నన్ను కొన్ని హోటళ్లలో మాంసాహార వంటకాల్లో వాడతారు.
* నా పండు గుజ్జును సలాడ్లు, ఇంకా బోలెడు రకాల ఐస్‌క్రీంల తయారీలోనూ వాడతారు.
* నా పండు తినడం వల్ల మీ గుండెకు, చర్మానికి మంచిది. ఇన్సులిన్‌ ఉత్పత్తి సమన్వయం అవుతుంది. కీళ్ల నొప్పులు తగ్గుతాయి.
* అన్నీ ఓకే కానీ.. నా ఆకులు, బెరడు కాస్త విషపూరితం. ఇవి.. ఆవులు, గేదెలు, మేకలు, కుందేళ్లు, పక్షులు, గుర్రాలకు హాని చేస్తాయి.

ఒకే ఒక గింజ!

* పండు మధ్యలో ఒకే ఒక గింజ ఉంటుంది. వీటిని కొన్ని ఔషధాల తయారీలో వాడుతారు.
* దాల్చినచెక్క, కర్పూర చెట్టు, బే లౌరెల్‌ చెట్లు చాలా వరకు నన్ను పోలి ఉంటాయి.
* నన్ను అవకాడో, వెన్న పండు అనే కాదు, అలగేటర్‌ పియర్‌ అనీ పిలుస్తుంటారు.

* మామిడి కాయతో ఆవకాయ ఎలా తయారుచేస్తారో.. అలాగే అవకాడోతోనూ నిల్వపచ్చడి చేసు కోవచ్చు.
* కేలరీలు, ఆరోగ్యవంతమైన కొవ్వు అధికంగా ఉండటం వల్ల సహజ సిద్ధంగా బరువు పెరగాలనుకునే వారికి అవకాడో ఉపయోగ పడుతుంది.

ఇప్పటికే మీతో చాలా విషయాలు చెప్పా... నేను ఉంటాను మరి.. బై...బై.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App