పేదపిల్లలే పెద్ద జర్నలిస్టులు!

పేదపిల్లలే పెద్ద జర్నలిస్టులు!

పదేళ్ల పిల్లాడే కానీ మాటల మాంత్రికుడు...పదకొండేళ్ల చిన్నారే ఎన్నెన్నో హావభావాలు పలికిస్తుంది... వయసు చిన్నయినా ప్రపంచ విషయాలపై మాట్లాడేస్తారు... ఆకట్టుకునే కథనాలు చేసేస్తారు ఇలాంటి పిల్లలంతా... ఇంతకీ ఎక్కడ? ఎవరు వీళ్లంతా?
టీవీ ఛానెల్‌కి వ్యాఖ్యాతలు, రిపోర్టర్లు, ఎడిటర్లు, వీడియోగ్రాఫర్లు ఉన్నట్టే ‘స్క్రాపీ న్యూస్‌ సర్వీస్‌’కి కూడా ఉన్నారు. అయితే వీళ్లంతా పెద్దలు కాదు. మరెవరు? చిన్న పిల్లలు. పది నుంచి పద్నాలుగేళ్ల వయసున్న చిన్నారులే. బుజ్జాయిల కోసం బుజ్జాయిలే నడుపుతున్న న్యూస్‌ సర్వీస్‌ ఇది.

* ముంబయిలోని ఫిష్షింగ్‌ విలేజ్‌లో పేద పిల్లలతో ప్రారంభమైన ఈ వార్తా సర్వీస్‌ ఇప్పుడు దేశవ్యాప్తంగా విస్తరించింది. దిల్లీ, బెంగళూరు, బిహార్‌, ఝార్ఖండ్‌ ఇలా బోలెడు నగరాల్లోకి చేరిపోయింది. ఈ ఛానెల్‌ రిపోర్టర్లు, వ్యాఖ్యాతలు అంతా కలిపి రెండు వేలకుపైగా చిన్నారులున్నారు.

* ఇక ఈ ఛానెల్‌ న్యూస్‌రూమ్‌ చూస్తేనే తెలిసిపోతుంది దీని ప్రత్యేకత. వెదురు బొంగులతో నిరుపయోగంగా ఉన్న వస్తువులతో అందంగా నిర్మించి ఉంటుంది. పాత వస్తువుల్ని కొత్తగా, అవసరమైన వస్తువులుగా మలుచుకోవచ్చనే విషయాన్ని చక్కగా చూపిస్తుంది ఈ స్క్రాపీ ఛానల్‌. అంతేకాదూ... పర్యావరణం, పారిశుద్ధ్యం, భూతాపం వంటి పెద్ద పెద్ద విషయాలతోపాటు ఆట మైదానాలు, ఈతకొలనుల కొరత వంటి పిల్లలకు సంబంధించిన అంశాలపైనా కథనాలు ఇస్తుంటారు. కొన్నిసార్లు పెద్దవాళ్లు బిజీబిజీగా ఉండి సమస్యల్ని పరిష్కరించలేరు. ఉదాహరణకు దిల్లీలోని కాలుష్యం. ఇలాంటి విషయాలపై అవగాహన కల్పించడానికి ఈ బుజ్జాయిలు ప్రత్యేక కథనాలు చేస్తుంటారు. అప్పుడప్పుడూ కథనాలకు తగ్గట్టు అభిప్రాయాల్ని తీసుకోవడానికి చిన్నారుల తల్లిదండ్రులు, స్థానికులతో ఇంటర్వ్యూలూ తీసుకుంటారు.

* ఇందులో అంశాలన్నీ పిల్లలే ఎంచుకుంటారు. కావాల్సిన స్క్రిప్ట్‌ మాత్రం కొన్నిసార్లు స్వచ్ఛంద కార్యకర్తలతో రాయించుకుంటారు. వ్యాఖ్యాతలు, రిపోర్టర్లు, వీడియో ఎడిటర్లుగా పాత్ర పోషించేది పిల్లలే.

* అసలు ఈ బుజ్జి వ్యాఖ్యాతలు మాట్లాడటం చూస్తుంటే ఆశ్చర్యపోవాల్సిందే. ‘హలో అండ్‌ వెల్‌కమ్‌ టూ ది చిల్డ్రన్స్‌ స్క్రాపింగ్‌... టుడేస్‌ షో ఈజ్‌ ఎబవుట్‌ రిక్లైమింగ్‌ అవర్‌ లాస్ట్‌ ప్లేగ్రౌండ్స్‌...’ అంటూ తీసుకున్న అంశంపై ఆంగ్లం, హిందీ భాషల్లో గడగడా భలేగా మాట్లాడేస్తారు.

* ఈ వీడియోల్ని యూట్యూబ్‌ వంటి ఆన్‌లైన్‌ సైట్లలో ఉంచేస్తారు. ఈ న్యూస్‌ సర్వీస్‌కి ప్రత్యేకమైన వెబ్‌సైట్‌తోపాటూ యాప్‌ కూడా ఉంది.

* ఇంతకీ ఈ పిల్లలంతా ఎవరు? వీరికి ఆలోచన ఎలా వచ్చింది అంటే? ‘గోయింగ్‌ టూ స్కూల్‌’ (జీటీఎస్‌) అనే స్వచ్ఛంద సంస్థ గురించి చెప్పుకోవాల్సిందే. కొత్త ఆలోచనలతో ప్రపంచాన్ని మార్చవచ్చనేది స్క్రాపీ న్యూస్‌ సర్వీస్‌ లక్ష్యం. సమస్యల్ని ఎలా ఎదుర్కోవాలి? బృందంగా ఎలా పనిచేయాలి? ఎలా చొరవ చూపాలి? అనే విషయాల్ని పేద పిల్లలకు నేర్పించి వారిలోని సృజనాత్మకతను బయటకు తీయాలనే ఆలోచనతో 2015లో దీన్ని ప్రారంభించింది ఈ సంస్థ. ప్రభుత్వ పాఠశాలల్లోని విద్యార్థుల్లో పిల్లల్ని ఎంపిక చేసి శిక్షణ ఇచ్చి చిన్నారుల్ని ప్రోత్సహిస్తోంది.

చిచ్చర పిడుగులు