close

ప్రధానాంశాలు

టర్నర్‌ @00000 నాటౌట్‌

జైపూర్‌ : 00000 ఇది ఏదో పిన్‌కోడో లేక పాస్‌వర్డో అనుకునేరు. టీ20ల్లో ప్రమాదకర బ్యాట్స్‌మన్‌, ఆస్ట్రేలియన్‌ ఆటగాడు అష్టొన్ టర్నర్‌ గత ఐదు మ్యాచుల్లో పరుగుల రికార్డు ఇది. భారత్‌, ఆస్ట్రేలియా మధ్య జరిగిన వన్డే సిరీస్‌లో ఒకే మ్యాచ్‌తో అందరి దృష్టిని ఆకర్షించాడు. బిగ్‌బాష్‌ లీగ్‌లో టర్నర్‌ ప్రదర్శన చూసిన రాజస్థాన్‌ రాయల్స్‌ యాజమాన్యం కూడా అతగాడిపై ఎన్నో ఆశలు పెట్టుకుంది. అయితే, రాజస్థాన్‌ తరఫున ఆడిన మూడు మ్యాచుల్లోనూ వరుసగా డకౌట్‌ అయ్యాడు. అంతకుముందు బిగ్‌బాష్‌ లీగ్‌లో చివరి రెండు మ్యాచ్‌ల్లో కూడా సున్నాకే వెనుదిరిగాడు. ఇలా వరుసగా డకౌట్‌ అవుతూ కనీసం బౌలర్లకు కూడా అందని రికార్డు సొంతం చేసుకున్నాడీ ఆస్ట్రేలియన్‌ హార్డ్‌ హిట్టర్‌. ఈ ఐపీఎల్‌లో ఘోరంగా విఫలమైన ఆటగాళ్లలో మొదటి స్థానంలో ఉన్నాడు.

దిల్లీ క్యాపిటల్స్‌తో జరిగిన మ్యాచ్‌లో ఇషాంత్‌శర్మ బౌలింగ్‌లో డకౌట్‌తో ఐపీఎల్‌ అరంగేట్రం చేశాడు. ఆ తర్వాత ముంబయి ఇండియన్స్‌, కింగ్స్‌ ఎలెవన్‌ పంజాబ్‌తో జరిగిన మ్యాచ్‌లో కూడా సున్నాకే పెవిలియన్‌ చేరాడు. ఎన్నో అంచనాలు పెట్టుకున్న ఆటగాడు తీవ్రంగా నిరాశపరచడంతో క్రికెట్‌ అభిమానులు ట్విటర్‌ వేదికగా టర్నర్‌పై తీవ్రమైన విమర్శలు గుప్పిస్తున్నారు. వరుసగా ఐదు మ్యాచుల్లో డకౌటైన టర్నర్‌ ఒలింపిక్‌ చిహ్నాన్ని సొంతం చేసుకున్నాడంటూ వ్యంగ్యాస్త్రాలు విసురుతున్నారు. మరికొంతమందేమో నీ రికార్డు మరే చెత్త బ్యాట్స్‌మెన్‌కు కూడా సాధ్యం కాదంటూ తమ అసహనం వ్యక్తం చేస్తున్నారు.



మరిన్ని

దేవతార్చన

© 1999- 2019 Ushodaya Enterprises Pvt.Ltd,All rights reserved.
Designed & Developed by Margadarsi Computers.
For Editorial Feedback - eMail: infonet@eenadu.net