రెండోసారి కరోనాతో కడప యువ వైద్యుడి మృతి

బద్వేలు:  రెండోసారి కరోనా సోకి ఓ ప్రభుత్వ వైద్యుడు ప్రాణాలు కోల్పోయారు. ఈ ఘటన కడప జిల్లాలో చోటుచేసుకుంది. వివరాల్లోకి వెళ్తే.. బద్వేలు ప్రభుత్వాసుపత్రిలో పనిచేస్తున్న చిన్న పిల్లల వైద్యుడు నందకుమార్‌(28)కు మూడు నెలల కిందట కరోనా సోకింది. దీంతో ఆయన గుంటూరులోని ఎన్‌ఆర్‌ఐ ఆస్పత్రిలో చికిత్స పొంది కోలుకున్నారు. అనంతరం యథావిధిగా విధులకు హాజరయ్యారు. అయితే 15 రోజుల క్రితం జ్వరం రావడంతో కరోనా పరీక్ష చేయించుకోగా మరోసారి పాజిటివ్‌ అని తేలింది.  దీంతో ఇంటి వద్దే ఐసోలేషన్‌లో ఉంటూ చికిత్స తీసుకున్నారు.

అయినా తగ్గకపోవడంతో కడప రిమ్స్‌కు.. వైద్యుల సలహా మేరకు అక్కడ నుంచి తిరుపతి స్విమ్స్‌కు వెళ్లారు. అక్కడ పరిస్థితి విషమించడంతో రెండు రోజుల క్రితం చెన్నైలోని అపోలో ఆస్పత్రిలో చేరారు. ఈ క్రమంలో చికిత్స పొందుతున్న ఆయన పరిస్థితి మరింత విషమించడంతో ఆదివారం మధ్యాహ్నం మృతి చెందారు. చిన్న వయసులోనే వైద్య వృత్తిలోకి వచ్చి ఎంతో భవిష్యత్‌ ఉన్న నందకుమార్‌ను కరోనా పొట్టన పెట్టుకుందని కుటుంబీకులు, తోటి వైద్యులు, సిబ్బంది కన్నీరుమున్నీరవుతున్నారు.